Ocicimihiwa Nthowa na Meecelo ahu ni Ohipaka wahu Makupa Ntoko Akiristu—Mwaha ola onarweela mu Anuário a Anamoona a Yehova a 2014
Sera Leyowa ni Guine
Epaaxina 120
Ekaraxa Yaari “Pasaporti” Aya
“Mu eyaakha ya 1987, achu ophwaha 1.000 yaaphwanyeya o muthukumano wa muceche ‘Confiança em Jeová’ o Guékédou, Guine. Woona wi epooma ya muthukumano wa muceche yaari waacamela o Sera Leyowa ni munlaano wa o Liberia, anna ancipale yaarwa mu ilapo seiho yaalakelela oyaakawo ni okooka nihiku nnihiku wamala muthukumano. Hiiha, awo hiyaarino itukumento sa mukwaha saachuneya. Mwawiihiiha anna yeemelela muthukumano wa muceche yaahilakana ni alipa ooweherya munlaano nave awo yaahiiwanana. Anna yaaya omuthukumano wa muceche yaaphwanela okhalano etokumento emoha—ekaraxa aya ya muthukumano wa muceche! Vaavaa mapilisa yaaweherya munlaano yoonaaya ekaraxa yancano, awo moohilekela yaamweemererya wi anna evire.”—Everett Berry, aari misiyonaario.
Epaaxina 149
Hiyaano Naakophola wa Asurutatu Oomwaryeya
Othanaru Mutokweene a asurutatu ni asurutatu axexe a nikhuuru noomwaryeya, yaarwa vaate vahu. Nave yaanileela wi nihipwahevo, mwawiihiiha natitelela othokororya yoorepela ya nihiku ni opaka mithukumano vaate vahu. asurutatu akina yaaloca: “nyuwaano munaalakhanya yoorepela ya nihiku. Nyuwaano mwa anamoona a Yehova.” Awo hiyaarino nchuno na Piipiliya, nyenya yaanancicimiha.
Nihiku nimoha, mutokweene mmoha a asurutatu aarwa wi awoone asurutatu yaaphwanyeya owaani. Owo aamulocela munna Amara, nave awo yaavahana mooni. Voocharela mutokweene a asurutatu aaloca wa asurutatu: “mulopwana ola mutokweene aka ni mutokweene anyu tho. Wakhala wi muchu ookhwannya niihi nawe nimoha naari na mmoha ari ni yoowo, enahaala okhala yawoopiha wa nyuwaano. Mohiiwa?” Yaahaakhula “Aai, pwiya!” Mutokweene a asurutatu, voocharela, aaninnya ekaarata alamulelaka wi a Frente Revulucionária Unida ehineerele echu yoonanara, woona wi naari achu a murecele.
Sivinrevo miyeeri sincipale, makhuuru oomwaryeya yaapacerya owana yaaworu, mwawiihiiha naachawela o Liberia. Weiwo naahoopopihiwa nnikhuuru nikina noomwaryeya. Naaloca: “Hiyaano na Anamoona a Yehova.” Musurutatu mmoha aahikoha “vano tiheeni Yohane 3:16 onaloceiye.” Vaavaa naaloncaahu yeeyo yoorepela eyo enalocaaya awo yaanihiya wi nipwahe.
Vahoolo vaya, namphwanya mutokweene a asurutatu mukina a nikhuuru noomwaryeya. Mwawiihiiha owo aniveka wi miyaano vamoha ni munna Amara nimuhoole. Naanoova wiiphiwa. Voocharela musurutatu oomwaryeya owo aanleela wi aamuhuserya Piipiliya ni anamoona a Yehova ehaakumve ekhoco. Owo aaninnya ikhorowa nave aakuxa ekaarata yaari ni hiyaano wi aannye anna yaari muloko wawaacamela. Voocharela anna apiili yaaruuha soolya nave yaanikuxa enikeriha nipuro naphaama.
[Epaaxina Ohirivo Echu 4, 5, 6]