Afrika​—Osivela Onnanisuwanyeiha Mwaha ola onarweela mu Anuário a Anamoona a Yehova a 2014

Epaaxina 48, eparakrafo 1, ophiyerya 49, eparakrafo 2

“Yehova ni Ankeelo anahaala okhala asinthamwene aka”

Mariya a iyaakha 70 onakhala o Keniya aanapaka makupa a Ekerexa prespiteriyana ekumi awe yoothene. Owo aari mulipa a wiyathi ikhorowa saaphariheliwe mu oteka Ekerexa ya ekulucu awe. Vaavaa mmoha a anamwane awe aasilopwana aakhanleiye Namoona, owo hasiveliwe. Mwaana owo aahaawopa oya mmithukumanoni, nyenya awo yaakhooca, elocaka wi yaachuna owiriyana michaka sa Piipiliya pahiru mu elocelo aya, ohiya mu Esuwayili. Wookuchula awo yaaheemererya nwopelo wa muthukumano wa muceche yoowo waaya olociwa mu elocelo ya Ekikuyu. Omuthukumano awo yaakilaathi mu nipuro na achu awuuluvala. Yaatepa otikhiniheya nthowa na othokororyiwa mweepewe ni osivela. Awo yaaloca wi hantonko woona osivela ntoko yoole okerexa waya. Awo yaahiwiriyana moomaaleleya miyaha soothene nave yaasiveliwa ni yeeyo yiiwalaaya. Vaavaa awo yaavahiwaaya yoohuserya ya Piipiliya ephariheliwaka eproxura Mmuwiriyane Muluku, mwawaakuveya awo yaaheemererya.

Emanle ohuserya mu miyeeri vakhaani, awo yaalakelela okhala mmoha a Anamoona a Yehova, mwa yeeyo awo yaahiya ekerexa aya. Ahooleli a ekerexa yaatepa onyeenyeya. Yaamwiichana mukukhula aakhala mu epooma etokotoko ya o Nairopi wi arwe aloce ni yoowo. Mukukhula aaheererya omulekecha wi ahikhumemo mu ekerexa, nyenya Mariya ahiikhalelaru oolipa murima. Mukukhula aamukoha “Wakhuma mu ekerexa taani oni akhale nthamwene aa? Weyaano wookhalano asinthamwene ancipale amwaacamani yaawo onakhalaaweno vamoha okerexa.”

Mariya aahaakhula “Yehova ni ankeelo tanahaala okhala asinthamwene aka, vamoha ni Anamoona a Yehova anahaala tho okhala asinthamwene aka.”

Ooceenleiye omulekecha Mariya, mukukhula aapwahavo. Mariya aahititelela oya vahoolo mu omuhuserya wawe Piipiliya nave aanaphwanyeya mmithukumano soothene Seekiristu, naamwi arakamenle nipuro na mithukumano. Hiihaanoru, vaavaa ooceenleiye ekaaro ya oyano omuthukumano, owo aaheeca ni meco vapwilani wi aye omuthukumano. Naamwi ikariwaka ni amwaacamani awe, Mariya ori oolakelela waakhwaniherya yoochuna awe ya opatisiwa.

Europa

Epaaxina 69, eparakrafo 1, ophiyerya epaaxina 70, eparakrafo 2

“Nyuwaano hamuhuwenle?”

Muthiyana mmoha a Somali yoowo aakhala o Suwesiya aawompwa wi aye o mithukumano mu Empa ya Omwene, nave owo aalakelela oyawo. Ichu hisaamweecenle phaama. Haavo aamulocinhe; achu oothene yoona onweha. Owo aatepa okhala oohica. Muchu mukina yoowo onne ohica wawe aamukoha: “Nyuwaano hamuhuwenle?”

Muthiyana owo aahaakhula “aai kinuupuwela hiiha!” Voocharela owo aarowa oohiceene. Vavaa aakumanneiye ni Anamoona yaawo yaanwompe owo aahaaleela wi harwa akookelawo wanaawiili. Awo yaamukoha tiheeni yeeren’ye woona wi hiyaamoonne mu Empa ya Omwene. Emanle ochekula vooloca sa mwaha yoola, awo yaaphiyerya osuwela wi owo aahuwela avolowa mu ekerexa ekina!

Anna yaamuceenyerya wanaawiili wi aye mu Empa ya Omwene. Owo aheemererya oyawo, nyenya aaloca wi ahaala omaliha aminutu khumi pahiru wakhala wi hasiveliwe. Nyenya, vaavaa owo aavolonweiye mu Empa ya Omwene, achu oothene mmuloko yaamwaakhela phaama! Owo aasiveliwa vancipale ni muthukumano, mwawiihiiha aari ookuchula okhuma mu Empa ya Omwene simanle mithukumano. Ovinyerya vaavaa, owo aanaya mmithukumanoni moohihiyererya, vano owo mulaleeryi oopatisiwa.

[Mwaneene a eruku va epaaxina 4]

ILAPO

47

ACHU

741,892,871

ALALEERYI

1,601,915

SOOHUSERYA SA PIIPILIYA

862,555

[Epaaxina Ohirivo Echu 5, 6]