Amiravo Naari Awuuluvala, Mvahe Yootakiherya Yaphaama wa Akina—Mwaha ola okuxiwe mu Anuário a Anamoona a Yehova a 2015
Europa
Yootakiherya Yaphaama ya Tiithi
Epaaxina 71, eparakrafo 2 ophiyerya epaaxina 72, eparakrafo 4
Jemima, yoowo aakhala o Espanha, aahusenrye eparipari ovinyerya woonamwane wawe. Nyenya, vaavaa aariyeno iyaakha thanu napiili, amannya yaahiya opaka makupa a Amoona a Yehova nave yaamwalana ni atiithi awe. Eyo yaatoroka mootutuxa okumi wa Jemima. Arino iyaakha khumi nararu, owo tho oohiya oya o mithukumano nave heemerenrye okhaviheryiwa ni atiithi awe mmakupa oomunepani.
Ivinre iyaakha vakhaani, Jemima aahiivoliiherya mu makhuuru a elapo ni a mathatelo aavyaka “ekhaikhai” ntakhara achu. Ohoolo waya, vaavaa aayeleenleiye muteko, atiithi awe, yiichaniwa Domingo, yaawo yaari mulipa oopintaara ipa, yaanwopa wi alapeke vamoha ni yaawo.
Nihiku nikina, elapaka vamoha, Domingo aahiivaha wi amuhusiheke Jemima Piipiliya. Nyenya owo aakhooca, alocaka wi wakhala wi ootoroka mukhalelo awe, ahaala oloca. Domingo aanasiveliwa owiriyana sooruma sa waalakhanyiwa wa Piipiliya ni irevista, nyenya mwanawe aanasiveliwa owiriyana macipo a mweelaponi ntoko pop apharihelaka ifooni.
Mu Novempro a 2012, Domingo, aathela wanaawiili, nave ahaakhela mwopelo wa oya mu Exikola ya Piipiliya wa Atheli Eekiristu. Jemima aatikhiniheya vancipale ni wiiveleela wa atiithi awe oya mu exikola ya Piipiliya mu elukuluku ya miyeeri miili ni ohiya ichu soothene oculi weemererya olapa weiwo yaahaalaaya okerihiwawo. Ela yaari ekwaha yoopacerya yeeyo Jemima iiwexenxeiye ophiyerya mweryo taani atiithi yaasiveliwaaya ni eparipari, nave owo aanachuna osuwela echu yaaweeriha.
Jemima aaya owiriyana macipo eelapo nave aapacerya owiriyana sooruma atiithi awe yaawiriyanaaya. Ela yaamweeriha opaka makoho. Nihiku nikina, vaavaa Domingo aareiye vasulu va ewelelo apintaaraka, Jemima aakoha: “Munnuupuwela wi kaaloca wi kaahaala wooleelaani wakhala wi kinnachuna omuhuserya Piipiliya? Vano kinnachuna.”
Domingo aahakalala vancipale iiwaleiye yeeyo. Mu Yaneru a 2013, yaapacerya omuhuserya Piipiliya itila piili va esumana. Exikola yaapacenrye mu April, nave yaatitelela omuhuserya Piipiliya empharihelaka interneti. Muthukumano wookuchula wa anaxikola a nikhuuru na atiithi, Jemima, nave aasiveliwa vancipale ni muthukumano yoole. Mu 14 a Tesempuru a 2013 Jemima apatisiwa.
Jemima onnaloca: “Yehova aapixa murima ni miyaano, nave koosuwela wi owo haakihin’ye meekhaaka. Owo ookivaha echu kihiitokwaaka ophwanya okhwipi: Asinthamwene eeparipari. Waataana wa onnaahu wa elapo yoothene onnakeeriha othamalela vancipale osivela otokweene Yehova oreiyeno ni hiyaano.”
Oseyaniya
Aatepa Oyeva Wii Elaleerye?
Ipaaxina 76, 77
Nihiku nimoha wooxixelo, Teariki, mmiravo a iyaakha thanu napiili onakhala o evilivili ya Tarawa yeeyo enapaka makupa a Kiribati, aari ni atiithi awe Tueti, mmuteko wa olaleerya. Vaavaa yaavolonwaaya yaahaaphwanya anaamiravo khumi ni asimwali a iyaakha variyari va makhumi meeli. Teariki atiithi awe emanle ochekula vooloca sa Omwene, mmoha a yaawo aahi: “Ninnawoonaani mwaakuxaka aniinyu mwaayaka mmuteko wa olaleerya. Ntakhara heeni? Awo aatepa oyeva wii elaleerye vooloca sa Muluku.”
Tueti ahaakhula: “Munnachuna omoona mwanaka alaleeryaaka? Miyaano kinahaala okhuma vaavaa owo onaloceiye.” Oothene yaaheemererya: “Ai, ninnachuna onwiriyana.”
Vaavaa Tueti aakhummeiye, Teariki ahaakoha ariki: “Nyuwaano moosuwela nsina na Muluku?”
Mmoha aahaakhula “Aa. Oniichaniwa Yesu!” Mukina aahi “Muluku.” Nave akina yaahaakhula eriki “Apwiya.”
Teariki Aahi: “Hankooni noone tiheeni Piipiliya onaloceiye sa yeeyo. Nimwaalakhanye vamoha Isaiya 42:5.” Amanle waalakhanya yoorepa, owo ahaakoha, “yoorepa ela enamuloca taani?”
Mmiravo mmoha aahaakhula “Muluku.” Voocharela Teariki onneemererya: “Aai Muluku eeparipari. Vano hankooni naalakhanye eciciri ya thanu nararu wi noone tiheeni Muluku onachuneiye onleela: ‘Miyaano ka Yehova. Nla ti nsina naka; nave ncicimiho naka nkirwa kimvaha mukina, naari ovuwa waka ovaha soophwaniherya.’ Moowerya wiiwa nsina na Muluku?”
Nikhuuru naahaakhula, “Yehova.”
Vano oothene yaanawiriiyana phaama, nave Teariki ahaakoha: “Ntakhara heeni ti yaphaama opharihela nsina na Muluku Yehova? Saweriwa T’arummwa 2:21 onnanleela: ‘Nave mutxhu yole oni aromole nsina na Apwiya onanvuluwa.’ Vanonto, ntakhara heeni ti yaphaama opharihela nsina na Muluku?”
Mmoha a va nikhuuru onnaakhula: “Wi nivuluxiwe.”
Voocharela Teariki Atiithi awe annavolowa, nave annakoha: “Vano, munoona hai? Anamwane ahu annawerya olaleerya? Ti yaphaama oyano vamoha mmuteko wa olaleerya?” Oothene anneemererya wi anamwane annawerya olaleerya nave wi ti yaphaama opaka makupa mmuteko yoola. Nave Teariki Atiithi awe annaloca: “Wakhala wi moomuhuserya Piipiliya nyuwaano tho munanwerya ohusiha eparipari enaphwanyeya Mpiipiliyani hiiha ntoko Teariki eenreiye.”
[Epaaxina Ohirivo Echu 5, 6]