Meecelo Aphaama Annavaha Ekari ya Waala Mmiso wa Eparipari​—Mwaha ola okuxiwe mu Anuário a Anamoona a Yehova a 2015

Afrika

Muhooleli a Ekerexa Onnawiriyana

Epaaxina 49, eparakrafo 3 ophiyerya epaaxina 51 eparakrafo 3

“Nkirwa kicompela Mukonelo wa Apwiya.” Ala masu a muhooleli a ekerexa o Afrika Oohico. Tiheeni yaamweerinhe muhooleli yoola ophiya va Mukonelo wa Apirili a 2014? Ichu saapacenrye vaavaa anna apiili a ilapo soohiyana yaaphiyalaaya vaate vawe elaleeryaka. Awo yaanasuwela wi muhooleli owo hi achune oloca ni yaawo. Munna Adaine onnathariha yeeyo yeeren’ye ariki: “Mootikhiniha, owo aahula mukhora nave aaniwopa wi nivolowe. Naavaanela mweelukuluku yincipale. Owo aatepa otikhiniheya omoona mukunya alaleeryaka mu ekulucu ya anamaripa nave alocaka elocelo aya. Muhooleli ola aapacerya omuhuserya Piipiliya moohihiyererya.”

Adaine onnaloca: “Mulopwana owo aari misiyonaario ni muhooleli a ekerexa mu iyaakha 40, nyenya aawenrye ophwanya maakhulo a makoho awe vaavaa aareiyeno iyaakha 80 sa oyariwa. Owo onnasiveliwa ni liivuru Imite a Sua Fé. Vaavaa nnahuseryaahu, owo onnahela mmuupuweloni miyaha soochuneya wi apharihele okerexa wawe. Owo aawooniha achu a ekerexa awe liivuru Piipiliya Onahusiha Eheeni Chiryene? Nave aahaaleela: ‘Vaavaa Anamoona a Yehova anaphiyaaya vaate vanyu ni liivuru yoola, nwaakhele phaama nave mwaawiriyane ntakhara wi liivuru ola oosareya muhakhu woomunepani.’”

Muhooleli owo aamuleela Adaine wi ahooleli akina a okerexa yaamulopola wi ahikookele oloca sa Anamoona a Yehova okerexa wawe. Owo haasuwela echu yaweera. Adaine aamooniherya mwaha mu Anuário a Anamoona a Yehova a 2013 yoowo waaloca sa muhooleli a malapelo oovuwa o Miyanmar. Vaavaa Adaine aalakhannyeiye yaweereya eyo, muhooleli aaloca: “Ntoko kinaahiwa miyaano! Kinaphwanela opaka yoolakelela yoochuneya, nave kinaphwanela weerano mwawaakuveya.”

Mu 14 a Apirili a 2014 muhooleli owo aaphiya va Mukonelo mu ekwaha yoopacerya, nave aaloca sa yoolakelela awe ya ohicompela Mukonelo. Aaloca yoolakelela awe ya ohiya malapelo atheru.

Repuplika Tominikana

Ipa Soomwene Sincipale Sinnatekiwa

Epaaxina 140, iparakrafo 3, ophiyerya epaaxina 141 eparakrafo 3

Nthowa na waacereryeya wa omuchara a Kiristu, sinnachuneya Ipa sa Omwene. Nthowa na yeela, mu Novempro a 2000, anna a Repuplika Tominikana yaapacerya oteka Ipa sa Omwene ekhaviheryiwaka ni nikhuuru na akhaviheryi a ilapo soothoiwa. Yookhumelela ti yawi, muloko waawerya oteka Empa ya Omwene yoolipa ni yaphaama ovinrevo miyeeri miili. Mu Setempuru a 2011, makhuuru meeli a oteka yaateka naari orehererya Ipa sa Omwene sawaakhwana 150.

Ipa seiha vamoha ni awiiveleela yaakhavihenrye otekiwa wa Ipa seiha, annavaha onamoona wa oothene. Ntoko yootakiherya, mu epooma emoha ekhaani waacamela Repuplika Tominikana, anna yaaphwanya nipuro noophwanelela otekawo Empa ya Omwene evyaani. Piyoneero avameekheiye aamukoha mwaneene waakhanle wi waahaala okhala wooweryeya othuma. Mulopwana owo aahaakhula: “Ohuukhuwe. Nkini kootumiherye wakhala wi onachuna otekavo ekerexa.”

Emanle ovaanela, mulopwana owo aaya o Puerto Plata wi amuxekurye munna awe awuuluvala yoowo aari Namoona a Yehova. Vaavaa aaphiyaleiye aahoona wi emusi emoha ya Anamoona a Yehova yaamukuxa munna awe vaavaa iiceliweiye wi emukhapelele. Emusi eyo yaanamukeriha o nikhuuru na alipa eekumi, mmithukumano ni mmuteko wa olaleerya. Mulopwana owo aamukoha munnawe ikhorowa kavi aaliveiye nthowa na okhaviheryiwa wawe. Owo aahaakhula: “Nkinaliva echu. Ala anna aka.”

Mulopwana aatepa otikhiniheya ni epewe ya Anamoona a Yehova ophiyerya wi amwiichana piyoneero avameekheiye yoole aalonce ni yoowo amuleela wi aatoroka muupuwelo awe nave wi aanachuna otumiha nipuro nawe. Munna aathuma nipuro nlo nave yaapacerya otekiwa Empa ya Omwene. Woopaceryani, mulopwana ole mwaariye aakhalano moonelo woonanara vooloca sa Anamoona a Yehova. Nyenya, vaavaa onneiye mukhalelo anna yaalapaaya mwawiiwanana mmuteko wa oteka, owo aaloca: “Nkintonko owoona achu awiiwanana ntoko yaala.”

[Epaaxina Ohirivo Echu 5, 6]