Ireferensiya Inaphwanyeya va Yoochariha ya Muthukumano Okumi ni Muteko Ahu Weekristu
7-13 A TESEMPURU
MUHAKHU WA MASU A MULUKU | ONAMUKUCHO 10-11
“Omusivela Wahu Yehova Okhale Woolipa Opwaha Osivela Emusi”
(Onamukucho 10:1, 2) Natape ni Avihu, anamwane a Aaroni yaakusha iparatho saya, ehelamo makhala a mooro vasulu vaya ehelamo erupani. Yaatetheya vamiithoni va Apwiya ehaalamulenle, mooro woohiphwanelela.2 Vaavaa Apwiya yaarumiha nikalume ni weeyela, ekhwa vamiithoni va Apwiya.
it-2 epaax. 371
Yoohilamuleliwa
Mooro ni erupani yoohilamuleliwa. Mu Onamukucho 10:1, masu awi zar mu Ehepiri (nsina neethiyana, za·rahʹ; oloca mookwasa, mmalapo) ennaphariheliwa mmukhalelo wa wooniherya “mooro woohilamuleliwa, yoowo [Muluku] aahaalamuleliweiye,” nyenya wa Natape ni Avihu, anamwane a Aroni, yaatheteya vamiithoni va Yehova, nave Yehova aahiwiipha awo orweela wa nikalume na mooro. (Onam 10:2; Nam 3:4; 26:61) Mwa yeeyo, Yehova aamuleela Aroni: “Weyo ni anamwane aa, mwavolowa mmushakalani wookumanamo, muhiwuryeke eviinyu nari yoowurya ekina yoohapala, wi muhikhwe. Nla nlamulo noohimala wa anamwane anyu oothene a muhoolo. Vawihiihaa, mukanawerya ohiyaniha echu yaweela ni echu pure yooreera ni yoothanyeya, ni waahusiha Aisarayeli ikano soothene Apwiya yaaloncaaya mwa Moose.” (Onam 10:8-11) Akhweya ela enooniherya wi Natape ni Avihu yaahapaliwa, mukhalelo yoola waamweerinhe ovaha mooro ehilamuleliwe. Chiryene mooro owo hiwaari woolamuleliwa ntoko yoowo waavahiwa mu elukuluku yoophwanelela, mu nipuro naari mukhalelo wa ovaha, yoowo waahaala okhala mukucho wa wunkhela woohiyana ni yoowo onatharihiwa mu Mukwaha 30:34, 35. Meerelo aya a ohapaliwa hiyeerinhe wi ekuphelele yoocheka aya.
(Onamukucho 10:4, 5) Moose aawiichana Mishayeli ni Elisafani, anamwane a Usiyele, Aaroni apaapaawe akhaani, ii: “Murwe, mwaaviihevo ahimaanyu ala, onipuro naweela, mwaakerihe okhwipi wa mishakala.” 5 Yaarwa eteesha miruchu seiye, ephanre ni ivistiitu saya, yaakeriha okhwipi wa mishakala, ntoko Moose aalenleiye.
(Onamukucho 10:6, 7) Moose aahi wa Aaroni ni anamwane awe Eliyasari ni Itamari: “Nyuwo muhinyaamurule miihi anyu nari waahula soowara sanyu moonihaka wunla, wi nyu tho muhikhwe nave tho muhitannye esara ya Apwiya enyahuwele muloko woothene. Nto asinninyu, aIsarayele oothene, yinle vanthowa na mooro yoowo Apwiya aparihalaaya. 7 Nyuwo muhivinyewo omushakalani wookumanawo wi muhikhwe, vawi muthanliwe hihano ni makhurwa a wunnyereryiwano muteko wa Apwiya.” Yaawo yaaheerano ntoko Moose aaleenleiye.
w11 15/7 ipaax. 31-32 epara. 16
Mpwanne Nyuwaano—Moovolowa mu Wiichuwa Mwa Muluku?
Aroni, munna a Mose, aahoolela mikhalelo soovila ophitaanyerya anamwane awe eeli. Mwaanyiherye mukhalelo owo onneiye vaavaa anamwane awe Napati ni Avihu yaavanhaaya mooro ehilamuleliwe ni Yehova, nave Owo awiipha. Mweeparipari, eyo yaakwatelela onthamwene ori woothene yoowo alopwana yaala yaahaalaaya okhalano ni asitiithi aya. Nyenya yaakhalavo echu ekina. Moorweela wa Mose, Yehova aamulamulela Aroni ni anamwane awe oororomeleya: “Nyuwo muhinyaamurule miihi anyu nari waahula soowara [ya eneneeryo ya okhweliwa] sanyu moonihaka wunla, wi nyu tho muhikhwe nave tho muhitannye esara ya [Yehova] Apwiya enyahuwele muloko woothene.” (Onam. 10:1-6) Muchaka ti wookwakwaleya. Omusivela wahu Yehova onaphwanela okhala woolipa opwaha waasivelaxa amusi ahu oohiroromeleya.
Mphwanye Muhakhu Woomunepani
(Onamukucho 10:8-11) Apwiya yaahi wa Aaroni: 9 “Weyo ni anamwane aa, mwavolowa mmushakalani wookumanamo, muhiwuryeke eviinyu nari yoowurya ekina yoohapala, wi muhikhwe. Nla nlamulo noohimala wa anamwane anyu oothene a muhoolo. 10 Vawihiihaa, mukanawerya ohiyaniha echu yaweela ni echu pure, yooreera ni yoothanyeya, 11 ni waahusiha Aisarayeli ikano soothene Apwiya yaaloncaaya mwa Moose.”
Nnaphwanela Okhala Aweela Mmakhalelo Ahu Oothene
Wi nikhale aweela, nnaphwanela ochariha okhapelela wa Soorempwa ni weera yeeyo Muluku onanivekeiye. Mwaathokororye anamwane a Aaroni Nepati ni Apihu, yaawo yiiphiwe nthowa na ovaha mooro ‘yahirummwalaya,’ akhweya eri oohapaliwa. (Onam. 10:1, 2, BNM.) Moone yeeyo Muluku aamulenleiye Aaroni. (Mwaalakhanye Onamukucho 10:8-11.) Apwanne ela enataphulela wi hinnaphwanela owurya yoowurya yoohapala nihaakumve oya mmuthukumano Weekristu? Muupuwele miyaha iha: Hiyaano hanri vathi va Nlamulo. (Arom. 10:4) Mu ilapo ikina, annihu annapharihela soowurya soohapala moophimelela va olya ehaakumve oya mmithukumano. Akoopho axexe a viinyu yaaphariheliwa va Mukonelo. Vaavaa aatikithenryeiye Mukonelo, Yesu aahaaruma oohuserya awe onwurya viinyu yoowo aataphulela nikhami nawe. (Mat. 26:27) Piipiliya onnakhwatiiha khuluwi owuryaxa ni ohapaliwa. (1 Akor. 6:10; 1 Tim. 3:8) Nave yawuupuxerya-ya-murima ya Akristu ancipale enanwerya oweeriha osepa khuluwi yoowurya yoohapala ehaakumve ophwanyeya mmuteko waweela vyakala. Nyenya, mikhalelo ti soohiyana elapo ti elapo, nave echu yoochuneya eri Mukristu awerye “ohiyaniha yaphama ni yonanara” wi akhaleno meecelo aweela anamuhakalaliha Muluku.
(Onamukucho 11:8) Muhikhuureru emece ya ashinama yaala nari waaphara ekhwile; muweere oothanyeya.
it-1 epaax. 135 epara. 4
Axinama
Mikhalelo seiya sa okwateleliwa soolya saaphariheleya pahiru wa yaale yaari vathi va Nlamulo na Mose, woona wi masu a Onamukucho 11:8 eni: “muweere oothanyeya,” ela tiwi, wa a Isarayeli. Mu omalihiwa Nlamulo moorweela mu mathipelo a mukucho wa okhwa wa Yesu Kristu, okhwatiihiwa wuuwu waamala, nyenya ohoolo waya, achu oothene yanwerya woona waakhwanela wa yoovaha emohamoha yeeyo Nowa aaleeliweiye, emanle Maahi mancipale.—Kol 2:13-17; Map 9:3, 4.
14-20 A TESEMPURU
MUHAKHU WA MASU A MULUKU | ONAMUKUCHO 12-13
“Ohuserya Orweela wa Nlamulo na Ilepa”
(Onamukucho 13:4, 5) Akhalano nlepa naweela, nto nrapala nihiconre nari nipururu naweela nihirivo, mulipa a mukucho amvalaanye ni achu mahiku mathanu nameeli. 5 Evinre mahiku yaala amvarerye tho. Aphwanya nlepa nenle nikhanle ntoko neerenlaaya nihitathareiye, amvalaanye tho mahiku mathanu nameeli.
Oovireliwa Naari Elukuluku Awe ti ya Muhoolo?
• Okerihiwa okhwipi achu awiiceliwa.
Nlamulo nenlo Muluku aamvaherenryeiye Mose naaloca wi achu yaakhalano ilepa yaaphwanela okhala oovalaanyeya ni akina. Nyenya saari pahiru ireca itokweene sa o Metepa, moovira wa iyaakha 700 muculi, vaavaa alipa ooloola yaahusenryaaya yeeyo, nave yoosuweliwa ophiyerya olelo wi meerelo yaala annaphara muteko.—Onamukucho, ekapitulu 13 ni 14.
(Onamukucho 13:45, 46) Muchu yoowo orino ilepa athananeke awanre soothaala, miihi enyaamurulen’ye aphunte eyano, nave akhuweleke, ariki: ‘Koothanyeya! Koothanyeya!’ 46 Ereca yeele yamutitelelaru, eeriwe oothanyeya. Hiihaa amake meekheiye okhwipi wa mushakala.
wp16.4 epaax. 9 epara. 1
Mano Nyuwaano Mwaanasuwela?
Mu ilukuluku sakhalai, Ayuta yaanoova mukhalelo mmoha wa ilepa yoowo waari yawunlaana. Eyo yanwerya omphwanya muchu ni omuhooxa moomalela. Ikwaha ikina, muchu aanakhala oothanyeya. Ereca yeela yawoopiha hiyaarino murece nave yaaneeriha okhala wookhweya orava. Mwa yeeyo, yoowo aakhalano ilepa aanaceenyeryiwa okhalaka okhwipi wa muxakala wi ahaaravihe akina.—Onamukucho 13:45, 46.
(Onamukucho 13:52) Mulipa a mukucho eeyele, nari eri yootherenya nari yooceecheya yoopakiwa nari yoochaviwa, nari epakiwe ni ishapala. Yeeyeliwe vawi yoorweela malepa awoopiha.
(Onamukucho 13:57) Yoomwi echikela ekhala ya namalele, yinlaana vakuwoni, vooshaloni nari vashapalani, vaavaa yeeyeliwe yeeyo erino ereca.
it-2 ipaax. 690-691 epara. 10
Ilepa
Soowara ni ipa. Ilepa sanwerya tho ovolowela soowara sootherenya, soowara sooceecheya naari ixapala sa axinama. Akhweya ereca yaamala ni ocapa, nave yaakhalavo marehereryo a okuha okhwipi soowara seiha. Nyenya, wakhala wi yootitelela ereca yeela yantikwa-yamooce naari yoophilivila, yoowara eyo yoonooniherya wi yaakhalano ilepa, nave yaaphwanela weeyeliwa. (Onam 13:47-59) Nyenya wakhala wi exiri ya empa, yohooniherya mathepa antikwa, amooce naari oophilivila, namukucho aanawala empa eyo. Akhweya waanachuneya okumula maluku yaawo yaarino mathepa ni owakiwa mpuwa mwa empa, nave maluku ni nchupi naawakiwa yaanavonyeryiwa nipuro noothanyeya, okhwipi wa epooma. Nyenya wakhala wi ilepa iho sohuuluula wiili, vanonto empa eyo yooniwa okhala yoothanyeya ophiyerya tho okumuliwa, nave ikaruma saya saanavonyeryiwa nipuro noothanyeya. Nyenya vooloca sa empa yeeyo yooniwa okhala yaweela (yaphaama) yaakhalavo marehereryo a weeliha yeeyo. (Onam 14:33-57) Ennalociwa tho wi ilepa seiho saavolowela soowara naari ipa, waari mukhalelo mmoha wa ekhura; nyenya, hiyaavo mathipelo ene.
Mphwanye Muhakhu Woomunepani
(Onam 12:2) “Wi aaleele aIsarayeli, ariki: ‘Muthiyana arupala, amuyara mwaana mwaamulopwana, akhale mmwiikhoni ophiyerya mahiku mathanu nameeli, ntoko onakhaleleiye ari vamweerini.
(Onam 12:5) “‘Amuyara mwaana mwaamuthiyana, akhale mmwiikhoni isumana piili, ntoko onakhaleleiye ari vamweerini. Nto akhwaaniherye tho mahiku makina makhumi mathanu nammoha ni mahiku mathanu nammoha wanthowa wa nikhami nenle nnakhuma.
w04 15/5 epaax. 23 epara. 2
Yeeyo Nnahaalaahu Ohuserya mu Liivuru a Onamukucho
12:2, 5—Ntakhara heeni muthiyana aanakhala “mmwiikhoni” amanle oyara? Ikhopela ipakiwe wi okhaleke wooweryeya okumiha ekumi ya muchu oophaameya. Mwa yeeyo, nthowa na sookhumelela sa oraviwa yoocheka, ennayariwa ekumi yoohiphaameya ni waaraviha anamwane yoocheka. Elukuluku ya okhala ‘mmwiikhoni’ yiiwanana ni oyara, hiihaa ntoko tho miyaha mikina, ntoko okhala mmwiikhoni ni oyeeha elopwana, yaanawuupuxerya Aisarayeli wi awo yaarava yoocheka. (Onam 15:16-24; Sal 51:5; Aro 5:12) Meerelo a oreerihiwa yaanaakhaviherya Aisarayeli osuwela ochuneya waya okhalavo mukucho wa woopola wi oxipihe soocheka ni okookiheryiwa achu ophaameya. Nyenya Nlamulo nlo naahikhala wa yaawo ‘naakeriha wa Kristu.’—Gal 3:24.
(Onamukucho 12:3, BNM) Nihiku nanethanu natxharu mwana owo athikiliwe.
Oovireliwa Naari Elukuluku Awe ti ya Muhoolo?
• Vaavaa waapakiwaaya othikiliwa.
Nlamulo na Muluku naaloca wi mwaana aaphwanela othikiliwa nihiku naneethanu nachaaru amanle oyariwa. (Onam 12:3) Vooloca sa nikwiya nimanle oyariwa, nikhami ninnawerya weeca mwawaakhwanela evinre esumana emoha. Wakhala wi othikiliwa weeriweno ehivinre elukuluku yeela, yanwerya otannya Mirolela. Ilukuluku sakhalai, hiwaarivo mukhalelo wa ooloola ekumi ntoko nryaahuno olelo. Mwa yeeyo, yaari yamiruku owehererya esumana emoha wi nikwiya nthikiliwe.
21-27 A TESEMPURU
MUHAKHU WA MASU A MULUKU | ONAMUKUCHO 14-15
“Esipanti ti Yoochuneya Mmalapelo Eeparipari”
(Onamukucho 15:13-15, BNM) “‘Muretxa ole wammalela ovùva wàmukhaliha òthanyeya, evire mahiku mathanu nameli ahakunve orèrihiwa; avase sowara sawe ni arape ni màhi òvira. Era hiha, onamukhala òrèrihiwa. 14 Nihiku nanethanu natxhàru akuse masiya meli nari ikakaiya pìli, avelèle wa namukutxho, vamithoni va’Apwiya vamilako va musakala wa muthukumano. 15 Namukutxho, ni epalame emoha, ahele mukutxho wotxipihano sotxheka; ni ekina, mukutxho wopahiwa. Hiha, namukutxho onnamuhelela mulopwana ole mukutxho womurèrihano muretxa ole orino eretxa yovùva.
it-1 epaax. 305
Orapa
Ni mathowa oophwanelela, waanachuneya orapa wooreerihiwa wa Aisarayeli oothene. Yoole ooniherya wi ookhalano ilepa, yoole aaphara ichu saaphariwe ni muchu aarino “eretxa yovùva,” mulopwana aayeeha elopwana, muthiyana aakhala mmwiikhoni, ni oothene yoole aakonano aanakhala “oothanyeya” nave aaphwanela orapa. (Onam 14:8, 9; 15:4-27) Muchu aakhala mmuxakalani orimo muruchu naari yoowo aaphara, aakhala “oothanyeya” nave aaphwanela ooreerihiwa ni maahi. Yoowo aakhooca opharihela malakiheryo yaala aaphwanela ‘wiikariwamo mmulokoni woona wi oonanariha empa ya Apwiya.’ (Nam 19:20) Mmukhalelo woophwanelela, orapa onnaphariheliwa mmukhalelo woosiphela wi yooniherye ochuneya waya okhala aweela vamiithoni va Yehova. (Sal 26:6; 73:13; Isa 1:16; Ezek 16:9) Wiirapiha ni Masu eeparipari a Yehova, mmukhalelo woosiphela, awo aakhalano owerya weeliha.—Éfe 5:26.
(Onamukucho 15:28-30) “‘Namala okhuma nikhami nenle, muchu ola amalihe mahiku mathanu nameeli wi aakheliwe. 29 Nihiku naneethanu nachaaru akusheke masiya nari ipompa piili, aveleele wa mulipa a mukucho vamulako va mushakala wookumanamo. 30 Mulipa a mukucho ahelele, emoha ya mukucho wooshipihano yoocheka, ekina ya mukucho woopahiwa. Hiihaa oopaka meerelo ookhurumuweliwa vamiithoni va Apwiya muthiyana yoole aakhumeiye nikhami.
it-2 epaax. 805 epara. 4
Okhala Mmwiikhoni
Muthiyana tho aanooniwa okhala oothanyeya variyari va okhuma nikhami “akhalaka wi ntoko ori vamweerini,” mmukhalelo yoola waanamweeriha owo okhala oothanyeya ni ichu aakoneleiye, nipuro aakiraatheiyevo, ni achu yaale yaaphara ichu seiho saari soothanyeya. Voocharela nimanle ovuuva nikhami, owo aaphwanela waalakhanyerya mahiku mathanu nameeli, vanonto owo aanavinyamo mmwiikhoni. Nihiku naneethanu nararu, muthiyana aanaakuxa asaana a masiya meeli ni ipompa piili akeriha wa namukucho, hiihaa owo aanakhala aweela. Ikina sa soopatuxiwa seiha saaveleeliwa wa Yehova ntoko yoovaha ntakhara yoocheka ni ekina ya mukucho woopahiwa.—Onam 15:19-30; moone LIMPO, LIMPEZA.
(Onamukucho 15:31) “‘Mwawiihiihaa, nyuwo munarwa mwaavalaanya aIsarayeli mwa ichu sa mwiikho wi ehikhwe voonanariha mushakala aka kinakhalaakamo yoowo ori veeri vanyu.
it-2 epaax. 724 epara. 7
Nipuro Naweela
2. Muxakala wa muthukumano, ohoolo waya, empa ya Muluku. Marehereryo yaala, ophitaanyerya nchaco na tapernaakulu ni nchaco na empa ya Muluku, yaari mapuro aweela. (Muk 38:24; 2Math 29:5; Saw 21:28) Ikaruma soochuneyaxa saaphwanyeya mu nchaco aari altare ni epasiya ya ewooro. Ikaruma seiha saari saweela. Pahiru yaale yaakhala aweela yanwerya ovolowa mu nchaco na muxakala wa mu tapernaakulu; mwa yeeyo, haavo aaphwanela ovolowa mu nchaco na empa ya Muluku ari ooriipiheya. Ntoko yootakiherya, muthiyana akhala mmwiikhoni haaphwanela ophara echu eri yoothene yaweela, naari ovolowa mu nipuro naweela. (Onam 12:2-4) Mwawooneya, naamwi mukhalelo mmoha wa otitelela okhala mmwiikhoni wa Aisarayeli, wooniwa okhala ntoko onanariha nipuro na tapernaakulu. (Onam 15:31) Yaale yaaperekha soovaha saya ntakhara wiireeriha ntakhara ilepa yaanaruuha mikucho saya ophiyerya vamilako va nchaco. (Onam 14:11) Haavo muchu oothanyeya aaphwanela opaka makupa a mukucho wa murecele mu tapernaakulu naari mu empa ya Muluku, woona wi owo aahaala okhwa.—Onam 7:20, 21.
Mphwanye Muhakhu Woomunepani
(Onamukucho 14:14, BNM) “Namukutxho akuse ephome ya enama ele, atxonyerye vanàruni n’olopwana na mutxhu owo onarèrihiwa, v’ekathani etokwene ya ntata n’olopwana ni v’ekathani etokwene ya nnani n’olopwana.
(Onamukucho 14:17, BNM) Vano makhurwa ahanle vakhàni atxonyerye vanàruni n’olopwana na mutxhu owo onarèrihiwa, v’ekathani etokwene ya ntata n’olopwana, v’ekathani etokwene ya nnani n’olopwana, vàvale otxonyenreiyevo ephome ya mukutxho wolivelano yotxheka.
(Onamukucho 14:25, BNM) Ahite eputxeputxhe, akuse ephome, atxonyerye vanàruni n’olopwana na mutxhu ole onarèrihiwa, vekathani etokwene ya ntata n’olopwana ni ya nnàni n’olopwana.
(Onamukucho 14:28, BNM) Ni makhurwa yale tho, atxonyerye vanaruni n’olopwana na yole onarèrihiwa, v’ekathani etokwene ya ntata n’olopwana ni ya nnani n’olopwana, mwemmotho watxonyeriwemo ephome y’eputxeputxhe.
it-3 epaax. 150 epara. 1
Naaru
Otikitheryiwa wa onamukucho o Isarayeli, Mose aalamuleliwa wi akuxe makupa makina a nikhami na epucepuche ya otikitheryiwano onamukucho nave aconyerye vanaaruni noolopwana na Aroni ni va anaawe, hiihaa ntoko mu ntata noolopwana ni mu inaani noolopwana, yooniheryaka yeeyo yaahaalaaya owiriyaniwa, muteko yaahaalaaya ophara, ni mukhalelo wa weeca yoowo waahaala ovolowela opwaha ni yeele yeereya mu nipuro nenle. (Onam 8:22-24) Moolikana, oreerihiwa wa muchu aakhalano ilepa, Nlamulo naanaloca wi namukucho aaphwanela okuha makupa makina a nikhami na epucepuche evahiwe ntoko yoovaha ya okhalano nthowa, hiihaa ntoko makupa a makhurwa yaavahiwe, ntakhara oconyeryiwa vanaaruni noolopwana na muchu aarino ilepa. (Onam 14:14, 17, 25, 28) Marehereryo mamoha analikana ni yaweereya yeela, enaloca sa muchu yoowo aachuna otitelela okhala kapuro a pwiyawe ophiyerya okumi awe woothene. Mmukhalelo yoola, kapuro aaphwanela okerihiwa vamulako, nave pwiyawe amuthorole naaru ni mucemulo. Eneneeryo yeela ya othoroliwa naaru, yooniherya vanlakani vene wi kapuro owo aanachuna otitelela wooniherya omwiiwelela pwiyawe.—Onam 21:5, 6.
(Onamukucho 14:43-45) “Yoomwi echikela mathepa yaale, eviihiwavo maluku yaale, ewakiwa nave esirikiwa empa yeele, 44 mulipa a mukucho ayewo tho, avarerye. Aphwanya mathepa yaale yinlaanne tho, empa yeele yohiisheela mathepa, ti yoothanyeya. 45 Epweshiwevo empa yoothene. Maluku aya, miri saya, maacuwela aya, soothene iriheliwe okhwipi wa muceche, nipuro noothanyeya.
g 06/1 epaax. 14, ekaaxa
Ekhura—Nthamwene ni Mwiichani!
MANO PIIPILIYA ONNALOCA SA EKHURA?
Piipiliya onnathariha “epahu ya nlepa na ekhura vasirini va empa,” elociwaka empa yoothene. (Onam 14:34-48) Ennalociwa tho wi epahu yeela, enniichaniwa tho “nlepa ntokotoko,” waari mukhalelo wa ekhura, nyenya hiyaavo mathipelo ene vooloca sa yeela. Moohipwacha mathowa ene, Nlamulo na Muluku naanaaceenyerya akaneene a empa oviihavo maluku yaavoloweliwe, owaka mpuwa mwa empa ni oriheliwa okhwipi “vanipuro noothanyeya” na epooma wa ichu soothene saakhwiiwa minikwa.” Wakhala wi epahu yohuuluula wiili, empa yoothene yaaphwanela wooniwaka okhala yoothanyeya, omwaryiwa ni weeyeliwa. Malakiheryo oothene yaala yooniherya osivela otokweene wa Yehova ntakhara akapuro awe ni okhala waya phaama omwiilini.
28 A TESEMPURU–3 A YANERU
MUHAKHU WA MASU A MULUKU | ONAMUKUCHO 16-17
“Tiheeni Nnahuseryaahu Orweela wa Nihiku na Oleveleliwa Soocheka?”
(Onamukucho 16:12) “Akushe tho epiya esaren’ye makhala a mooro a vanipuro na mukucho, nri vakhiviru va Apwiya vamoha ni erupani yawunkhela yeephepa ene, makuphi meeli, seiya avoloweno onipuro naweelasha wiithela wa muruku wakuwo.
Yeeyo Nnahaalaahu Ohuserya mu Liivuru a Onamukucho
Mwaalakhanye Onamukutxho 16:12, 13. Mwaanyiherye yaweereya yeela ya Nihiku na Oleveleliwa Soocheka. Mutokweene a anamukucho aanavolowa mu tapernaakulu. Mu ntata nimoha, owo oopharela epiya orimo erupani yawunkhela. Mu ntata nikina, owo opharenle echu ya ewooro orimo makhala a mooro. Owo onneemela ohoolo wa ekuwo yeeyo enakhuneela Onipuro Naweelasa. Ela ekwaha yoopacerya ya ikwaha raru onavoloweiye Onipuro Naweelasa mu Nihiku na Oleveleliwa Soocheka. Ni ncicimiho ntokweene, owo aanavolowa Onipuro Naweelasa nave aaneemela ohoolo wa Ekaaxa ya Waataana. Eyo yaakhala ntoko wi eemenle ohoolo wa Yehova Muluku! Voocharela, mweephoole namukucho aanayeeherya erupani vasulu va makhala a mooro, nave nipuro nlo naanakhala nawunkhela phaama. Ohoolo waya, aanavolowa wanawiili Onipuro Naweelasa akunxe nikhami na mukucho wa soocheka. Moowerya woona? Mulipa a mukucho aapacerya opaha erupani yawunkhela ahipacenre operekha nikhami na mukucho wa soocheka.
(Onamukucho 16:13) Ari vamiithoni va Apwiya, Aaroni aahelavo erupani yeele vamakhalani. Mwiishi wa erupani ohuruwele yookhuneela ya ekasha ya waataana wi ahikhwe.
Yeeyo Nnahaalaahu Ohuserya mu Liivuru a Onamukucho
Tiheeni nnahuseryaahu ni mukhalelo wa ophariheliwa erupani yawunkhela mu Nihiku na Oleveleliwa Soocheka? Piipiliya onaloca wi, wa Yehova, mavekelo a akapuro awe oororomeleya ari ntoko erupani yawunkhela. (Sal. 141:2; Wup. 5:8) Muupuwele wi mutokweene a anamukucho aanooniherya ncicimiho ntokweene vaavaa aavoloweiye ni erupani yawunkhela ohoolo wa Yehova. Mmukhalelo woolikana, vaavaa nnamwaacamelaahu Yehova mu nivekelo, nnapaka eyo ni ncicimiho ntokweene. Ninnamuthamala Mpatusa a Ichu soothene oneemererya wi nimwaacamele, hiiha ntoko mwaana onamwaacameleiye tiithi awe. (Tiy. 4:8) Owo onnaneemererya ntoko asinthamwene awe! (Sal. 25:14) Ela ekari yavameekhaaya ophiyerya wi hinaahaala weemererya opaka echu vyakala enamuthananiha Yehova.
(Onamukucho 16:14, 15) “Nto nikhami na emope yeele amiserye ni ekatha awe yookhuneelano ekasha. Apacerye osulu waya vakhiviru vawe, vaavaa amiserye tho ohoolo waya itila thanu napiili. 15 “Hiihaa, ahite tho epuri yeelopwana yeele ya mukucho wooshipihano yoocheka ya muloko. Nnikhami nenla, avoloweno onipuro naweelasha, wiithela wa muruku wakuwo, wi amiserye tho yookhuneela ya ekasha ntoko eenreiye nnikhami nenle na emope.
Yeeyo Nnahaalaahu Ohuserya mu Liivuru a Onamukucho
Muupuwele tho wi mutokweene a anamukucho aaphwanela weeyela erupani yawunkhela ahaakumve ovaha mikucho. Mwawiihiiha, owo aanaroromela wi ookhalano weemereryiwa wa Muluku wi aperekhe mikucho. Tiheeni nnahuseryaahu ni yeela? Muupuwele vooloca sa Yesu. Noosuwela wi owo aarwa veelaponi yavathi wi avahe okumi awe ntoko mukucho. Ari veelaponi yavathi, Yesu aaphwanela opaka echu yookhweleyasa—echu yookhweleyaxa opwaha ovahererya nivuluxo ntakhara achu—ahaakumve ovaha okumi awe ntoko mukucho. Tiheeni yeeyo? Moorweela wa okhala aweemeleleya ni oororomeleya, Yesu aaphwanela oreherya ephiro wi Yehova eemererye mukucho awe. Mmukhalelo yoola, Yesu aahaala wooniherya wi opaka ichu mmukhalelo Yehova onachuneiye ori mukhalelo woophwanelela okhala. Yesu aahaala wooniherya mookwakwaleya wa oothene wi olamulela wa Yehova ti waphaama ni wawookololowa.
Mphwanye Muhakhu Woomunepani
(Onamukucho 16:10) Wa epuri yeeyo ehako echommaaya wi epwahe, Aaroni atheteye yawooneene wa Apwiya wi apakele meerelo ookhurumuweliwa. Vaavaa ekerihiweke otakhwani, enapwaha.
it-1 epaax. 284 epara. 2
Azezeli
Ntoko murummwa Paulo otharinheiye, moorweela Yesu ovaha ekumi awe yoophaameya nthowa na soocheka sa achu, owo oopaka sincipale opwaha yeele yeeriwano ni “nikhami na emope ni na epuri.” (Ahe 10:4, 11, 12) Owo oorumeela ntoko “yoosipihano,” ateexaka “sawuukhula sahu.” (Isa 53:4, 5; Mat 8:17; 1Ped 2:24) Owo “aateesha” soocheka sa oothene yaale anaroromela esisapo ya mukucho. Ohooniherya tho mahala a Muluku, a omalihavo yoocheka moomalela. Mmakhalelo yaala, epuri “ya Azezeli” yeemelela mukucho wa Yesu Kristu.
(Onamukucho 17:10, 11) “‘MwIsarayeli nari namarwa alyaru nikhami miyo kinammurukunuwela yoowo nave kinammwiikara mmulokoni mwawe, 11 ntakhara okumi ori munikhamini. Wanthowa nenla koorummaakaani opaka meerelo ookhurumuweliwa nnikhami va nipuro na mukucho. Nikhami ninnoopola okumi.
Ntakhara Heeni Nnaphwanela Okhala Aweela
Mwaalakhanye Onamukucho 17:10, (BNM). Yehova aahaalamulela Aisarayeli wi ehilyeke “ephome”. Wuumaala nikhami—na mwaaxinama naari na muchu—nlamulo Neekiristu. (Saw. 15:28, 29) Hiyaano ninnoova wi Muluku ‘haniweha ni orèra murima’ ni onikumiha mmulokoni mwawe. Hiyaano ninnamusivela nave ninnachuna omwiiwelela. Naamwi mmukhalelo wa woopopiha okumi, nri oolakelela ohimorela mmiraakho ni okhinyererya wa yaale ahimusuwenle Yehova nave ahinachuna omwiiwelela. Aai, ninnaweherya onyemuliwa nthowa na wuumaala nikhami, nyenya ninnathanla omwiiwelela Muluku. (Yuuta 17, 18) Moonelo taani mmwaha yoola onahaala onilipiha ‘osepa’ ohilya nikhami naari waakhela nikhami mmwiilini?—Malam. 12:23, BNM.