MWAHA WOOHUSERYA 13
Musivelaneke Mukina ni Mukhwaawe Moopwahasa
“Mukhwelaneke chiri mukina ni mukhweiye ni murima wooreera.”—1 PED. 1:22.
NCIPO 109 Osivela Onarweela Vathi va Murima
YEEYO NNAHAALAAHU OHUSERYAa
Mu ohiyu awe wookuchula vaavaa aareiye ni arummwa awe, Yesu aahiceenyerya osivela (Moone mwaha iparakrafo 1-2)
1. Nlamulo taani nooluluwanya Yesu aavanheiye ohuserya awe? (Moone eruku ya ekaapa.)
MU OHIYU ahaakumve okhwa, Yesu aahaavaha oohuserya awe nlamulo nooluluwanya. Owo aahaaleela: “Ntoko miyo kookhwenlaakaani, hiiha tho nyuwo mukhwelaneke mukina ni mukhwaawe.” Voocharela aahaaceererya: “Mwakhalano osivela mukina ni mukhwaawe, achu oothene anarwa esuwela wi muri oohuserya aka chiri!”—Yoh. 13:34, 35.
2. Ntakhara heeni oryaaya woochuneya wooniherya osivela wa mukina ni mukhwaawe?
2 Yesu aahiloca wi oohuserya awe eeparipari yaahaala osuweliwa ekhanleno mukhalelo wa osivela yoowo oonihenryeiye. Masu yaala yaari eeparipari mu nsana noopacerya, navetho teeparipari olelo. Tinthowa nene oryaaya woochuneya wi nivoothe nikacamiho vyakala nave nooniherye osivela wa mukina ni mukhwaawe!
3. Tiheeni nnahaalaahu othokororya mmwaha yoola?
3 Ohiphaameya wa achu onneeriha okhala woovila wa hiyo wooniherya osivela wa mukina ni mukhwaawe. Naamwiihiiha, nnaphwanela weererya omutakiherya Kristu. Mmwaha yoola, nnahaala woona mukhalelo osivela onahaalaaya onikhaviherya okhala a murecele, ohikhala a nthalu, ni owaakhela aleco. Elukuluku munahuseryaanyu mwaha, mwiikohe: ‘Tiheeni kinahuseryaaka orweela wa anna ni arokora yaawo anatitelela osivelana mukina ni mukhwaawe, moohiphwacha makacamiho?’
MUKHALE A MURECELE
4. Mwawiiwanana ni Mateu 5:23, 24, ntakhara heeni ninnaphwanela opaka murecele ni munnihu yoowo arino nthowa ni hiyo?
4 Yesu oonihusiha okhweleya waya opaka murecele ni munna yoowo orino nthowa ni hiyo. (Mwaalakhanye Mateu 5:23, 24.) Owo ooceenyerya wi nnaphwanela otikitherya wiiwanana waphaama ni akina wi nimuhakalalihe Muluku. Yehova onnahakalala vaavaa nniilipiseryaahu wi nikhale a murecele ni annihu. Owo harwa eemererya malapelo ahu wakhala wi ninnakuha mathowa ni okhooca weererya opaka murecele.—1 Yoh. 4:20.
5. Tiheeni yeerinhe okhala woovila wa munna mmoha opaka murecele?
5 Nnamoona okhala woovila opaka murecele. Ntakhara heeni? Moone yeeyo yeeren’ye ni Marko.b Owo aahisooseya murima vaavaa munna mukina aamukhalinheiye moonanara ni aloca ichu sookooka owaruni vooloca sa yoowo ni akina a mmulokoni. Marko aakhulenle hai? Owo onnathariha: “Nkaawerya wiivareryela nave kaanyeenyeya.” Moovira wa elukuluku, Marko aakhalano ekeerelani ni moonelo awe nave aaheererya oveka nikhurumuwelo wa munna ole wi atikitherye murecele. Nyenya munna ole heemerenrye wiilipiserya wa Marko. Voopaceryani, Marko aahuupuwela: ‘Ntakhara heeni miyaano kinatitelaaka weererya opaka murecele okhalaka wi munna ola hanachuna?’ Nyenya ooweherya a ekulucu aahimuceenyerya wi ahimaale. Tiheeni Marko aapankeiye?
6. (1) Marko iilipisenrye hai opaka murecele? (2) Owo ampharihenle hai Kolosi 3:13, 14?
6 Vaavaa Marko aalikhenleiye muupuwelo awe, aahiiwexexa wi aahiyeleela wiiyeviha nave iisoona okhala awookololowa. Owo aahoona wi aanaphwanela otoroka moonelo awe. (Kol. 3:8, 9, 12) Mwawiiyeviha, Marko aakookela ovaanela ni munna yoole nave amveka nikhurumuwelo. Marko aahimurepela tho ikaarata munna, alocaka wi aakhalano ekeerelani nave aanachuna wi ekookele okhala asinthamwene. Ophiyerya wi Marko aahimvaha samahala ikhaani seiyo uupuweleiye wi aahaala osiveliwano. Moothananiha, munna ole haamulevelenle nave aahititelela okhala oonyeenyeya. Naamwi hiiha, Marko aahititelela wiiwelela nlamulo na Yesu na osivela ni okhala ookhurumuwela. (Mwaalakhanye Kolosi 3:13, 14.) Naamwi akina ehaakhulelaka wiilipiserya wahu opaka murecele, osivela weeparipari Weekristu onahaala onikhaviherya otitelela waakhurumuwela ni ovekela wi nikhaleno sookhumelela saphaama.—Mat. 18:21, 22; Gal. 6:9.
Waakhala wi muchu ookhalano nthowa ni hiyaano, akhweya onamuchuneya weererya ikwaha sincipale wi ntikitherye murecele ni muchu yoowo (Moone iparakrafo 7-8)c
7. (1)Tiheeni Yesu onanceenyeryeiye opaka? (2) Nikacamiho taani noovila murokora mmoha aahoolenleiye?
7 Yesu oonilopola wi nnaphwanela waakhalihaka akina hiiha ntoko nnachunaahu okhalihiwaka. Nave ohaaceererya wi osivela wahu honaphwanela wooniheryiwaka pahiru wa yaale ananisivela. (Luka 6:31-33) Naamwi nihiweheryaka wi eyo enahaala weereya, tiheeni muneeraanyu mpake wakhala wi mmulokoni mwahu munna mmoha oopacerya woosepaani ophiyerya ohoovahaani mooni? Ti yeeyo yeeren’ye ni Lara. Owo onnathariha: “Murokora mmoha aanakisepa, nave nkaasuwela mathoweene. Eyo yaanakeeriha okhala oonyeenyeya, nave nkaasiveliwa oya mmithukumano.” Woopaceryani, Lara aahuupuwela: ‘Miyaano nkaano nthowa. Ophiyerya wi anna akina a mmulokoni yaanoona wi meerelo a murokora ole hiyaari aphaama.’
8. Tiheeni Lara aapankeiye wi apake murecele, nave tiheeni nnahuseryaahu orweela wa yaweereya awe?
8 Lara aahipaka echu wi atikitherye murecele. Owo aahivekela wa Yehova nave alakelela oloca ni murokora ole. Awo yaahivaanela vooloca sa nikacamiho, ekhupaarelana mukina ni mukhwaawe, nave epaka murecele. Yaakhala wi ichu saahikhala phaama. Lara onnathariha: “Nyenya ohoolo waya, murokora ole aahooniherya wa miyo moonelo mmohamoha ntoko yoole woopacerya. Kaatepa othanana!” Woopaceryani, Lara uupuwenle wi aahaala owerya okhalano oohakalala pahiru waakhala wi murokora ole ootoroka mukhalelo awe. Nyenya voocharela, Lara aahiiwexexa wi echu yoochuneya aaphwaneleiye weera waari otitelela omukhaliha murokora ole moosivela ni okhala “ookhurumuwelana.” (Éfe. 4:32–5:2) Lara aahuupuwela wi osivela weeparipari weekristu “honiithukumanyerya mathowa, onnawethano soothene, onnaroromela soothene, onnawehererya soothene, onnavilelano soothene.” (1 Kor. 13:5, 7)Lara aahikookela okhalano murecele wa mmuupuweloni. Moovira wa elukuluku, murokora ole aahipacerya omukhaliha phaama. Vaava munakhalaanyu a murecele ni anna ni arokora ni otitelela waasivela, muroromele wi “Muluku a osivela ni a murecele [oni] akakhala ni nyuwo.”—2 Kor. 13:11.
MUHIKHALE A NTHALU
9. Mwawiiwanana ni Saweriwa T’arummwa 10:34, 35, ntakhara heeni hannaphwanela okhalano nthalu?
9 Yehova haanono nthalu. (Mwaalakhanye Saweriwa T’arummwa 10:34, 35.) Wakhala wi hinaanono nthalu, ninnooniherya wi na anamwane awe. Ninniiwelela nlamulo na waasivela amwaacamani hiiha ntoko hiyaano nniisivelaahu nave ninnakhapelela murecele wa emusi ahu yoomunepani.—Aro. 12:9, 10; Tiy. 2:8, 9.
10-11. Murokora mmoha aawenrye hai avootha muupuwelo awe wooheseya?
10 Wa akina, tahi yookhweya ohikhalano nthalu. Ntoko yootakiherya, moone yeeyo yeeren’ye ni murokora mmoha awiichaniwa Rute. Vaavaa aareiye nahano, aahihoolela yaweereya yoonanara ni muchu yoowo aari a elapo yoohiyana. Eyo yamvolowenle hai? Rute onneemererya: “Miyaano kaaniica echu vyakala yiiwanana ni elapo yeele. Kuupuwela wi achu oothene a elapo yeele yaari oolikana, ophitaanyerya anna ni arokora.” Rute aawenrye hai ovootha moonelo awe wooheseya?
11 Rute aahisuwela wi aaphwanela wiilipiserya wi avootha moonelo awe wooheseya. Owo aahaalakhanya saweereya ni soolokoha mu Anuário vooloca sa elapo yeele. Rute oriye: “Kaahiilipiserya wuupuwela mwaphaama vooloca sa achu a elapo yeele. Kaapacerya woona wi anna ni arokora yaahikhalano mvai ntakhara Yehova. Kaahiiwexexa wi awotho annapaka makupa a onnaahu weelapo yoothene.” Vakhaani vakhaani, Rute aahiiwexexa wi owo aanaphwanela opaka sincipale. Owo onnathariha: “Mpuro vyakala kaaphwanyaakavo anna ni arokora a elapo yeele, kaaniilipiserya wi kipake onthamwene ni yaawo. Kaanachekula ni yaawo nave kaanaasuwela phaama.” Teevi yaari yookhumelela? Rute oriye: “Moovira wa elukuluku, muupuwelo aka wooheseya waahimala.”
Wakhala wi ‘ninnakhwela tho anna,’ nthalu hinirwa nikhalano mpuro (Moone iparakrafo 12-13)d
12. Nikacamiho taani murokora awiichaniwa Sara aareiyeno?
12 Achu akina anamukhala a nthalu ehisuwelaka. Ntoko yootakiherya, Sara owo uupuwela wi haarino nthalu woona wi haathoriha achu ntakhara ohiyana wa mwiili, okhalano muhakhu, naari murici aya mmarehereryo. Nyenya owo onneemererya: “Kaahipacerya osuwela wi chiryene kaahikhalano nthalu.” Mmukhalelo taani? Sara oyariwe mu emusi yeeyo erino mahusiheryo aphaama, nave aachuna waataanaka ni achu arino mukhalelo yoowo. Ekwaha emoha Sara aahiloca wa nthamwene awe: “Miyaano Kinaataana pahiru ni akhwaaka a mu nroromelo arino mahusiheryo aphaama. Kinnaasepa yaawo ahirino.” Mweeparipari, Sara aanaphwanela otoroka moonelo awe. Mwawiihai?
13. Tiheeni nnahuseryaahu orweela wa mukhalelo Sara otoronkeiye moonelo awe?
13 Ooweherya a ekulucu aahimukhaviherya Sara waalikhela moonelo awe. Owo onnathariha: “Ooweherya a ekulucu aahikithamalela ntakhara orumeela waka moororomeleya, maakhulo aka, ni masuwelelo aka a Mpiipiliyani. Voocharela aahikileela wi, vaavaa masuwelelo ahu anaacaaya, ninnachunatho winnuwiha mikhalelo Seekristu ntoko wiiyeviha, wiichacala, ni ikharari.” Sara aahipharihela muteko ekano ya ooweherya a ekulucu. Owo oriye: “Kaahiiwexexa wi echu yoochuneyaxa ori okhala ooreera murima ni oosivela.” Ntoko yookhumelela, Sara aahipacerya waakhaliha anna ni arokora mmukhalelo woohiyana. Owo onnathariha: “Kaaheererya wiiwexexa mikhalelo taani inaweeriha okhala asisapo wa Yehova.” Hanka hiyaano? Niheemererye wi mahusiheryo ahu eneerihe wuupuwela wi nri avasulu waapwaha akina. Wakhala wi ‘ninnakhwela tho anna,’ nthalu hinirwa nikhalano mpuro.—1 Ped. 2:17.
MUKHALE OOWAAKHELA ALECO
14. Mwawiiwanana ni Ahebri 13:16, Yehova onoona hai vaavaa nnawaakhelaahu aleco?
14 Yehova onnavaha esisapo owaakhela aleco. (Mwaalakhanye Ahebri 13:16.) Yene onoona ntoko makupa a malapelo ahu, xaxaxa vaava nnaakhaviheryaahu oothoiwa. (Tiy. 1:27; 2:14-17) Tinthowa nene Piipiliya onanceenyeryeiye: “Muchuneke owaakhela aleco.” (Aro. 12:13) Elukuluku nnooniheryaahu owaakhela aleco, enakhala yawooneya wa akina wi chiryene ninnaapwacha, waasivela, nave wi ninnachuna okhala asinthamwene aya. Yehova onnahakalala vancipale vaavaa nnaavahaahu akina yoolya, naari yoowurya ni vaavaa nnamalihaahu elukuluku ahu ni yaawo. (1 Ped. 4:8-10) Nyenya sookhalavo ichu ikina inahaala weeriha okhala woovila wa hiyo owaakhela aleco.
“Khalai waanakivila owaakhela aleco, nyenya kootoroka moonelo aka nave kohaakhela mareeliho mancipale” (Moone eparakrafo 16)e
15-16. (1) Ntakhara heeni akina hanakhala ootaphuwa owaakhela aleco? (2) Edit owenrye hai ovootha woovelela owaakhela aleco?
15 Nnamoovelela owaakhela aleco nthowa na mikhalelo sahu. Muthokororye yootakiherya ya naamukhweli awiichaniwa Edit. Ahaakumve okhala Namoona a Yehova, owo aalakelela olocihana vakhaani ni achu akina. Owo uupuwela wi pahiru akina tarino ophwanelela wa owaakhela aleco.
16 Amanle okhala Namoona a Yehova, Edit aahitoroka mukhalelo awe wa wuupuwela. Owo aahipaka matorokelo wi awaakheleke aleco. Owo ooloca: “Elukuluku Empa ya Omwene yaachunaaya otekiwa, mutokweene mmoha aarwa nave aakileela vooloca sa mutheli aahaala orwa wi akhaviherye oteka, nave aakikoha waakhanle wi kanwerya omuhayiha isumana piili. Kaahuupuwela mukhalelo Yehova aamureelinheiye naamukhwele o Sarefa.” (1 Mam. 17:12-16) Edit aaheemererya omuhayiha mutheli ole. Apwanne aahireelihiwa? Edit onnathariha: “Isumana piili saari miyeeri miili. Ovinyerya vaavale, naahipaka onthamwene woolipa.” Edit ooreelihiwa ni asinthamwene aphaama mmulokoni. Vano onarumeela ntoko piyoneera nave onnasiveliwa waawopa yaawo onalapeiyeno mmuteko woolaleerya wi yachekule owannyawe. Edit oriye: “Ovaha onnakeeriha okhala oohakalala! Nyenya oloca mweeparipari, kinnaakhela mareeliho mancipale.”—Ahe. 13:1, 2.
17. Tiheeni Luka ni mwaariye yiiwexenxaaya?
17 Naamwi niwaakhelaka aleco, akhweya onahaala okhweleya waaceererya makupa makina. Ntoko yootakiherya, Luka ni mwaariye awo annawaakhela aleco. Awo yaahikhalano yookhovelela ya waawopa asitiithi aya, amusi, asinthamwene ni ooweherya a ekulucu ni mwaariye. Nyenya Luka oriye: “Naahiiwexexa wi naawopa pahiru yaale ari asinthamwene awaacameleya.” Luka ni mwaariye areherenrye hai owaakhela aleco?
18. Luka ni mwaariye areheryenrye hai owaakhela aleco?
18 Luka ni mwaariye yaahitoroka moonelo aya wa wuupuwela emanle wuupuwelela masu a Yesu: “Mwaakhwelaka yaaleru anookhwelaani, munii muchuweliwe hayi?” (Mat. 5:45-47) Awo yaahiiwexexa wi yaaphwanela omutakiherya Yehova, yoowo ori amahala wa achu oothene. Mwawiihiiha yaalakelela waawopa anna ni arokora yaawo yahintonkwaaya waawopa. Luka oriye: “Hiyaano ninnasiveliwa vancipale ni ilukuluku seiya. Oothene ahu ninnakhala ooceenyeryeya ni oolipiheya.”
19. Nnooniherya hai wi na oohuserya a Yesu, nave tiheeni mulakelenlaanyu weera?
19 Noohuserya wi okhalano osivela weeparipari mukina ni mukhwaawe enanwerya onikhaviherya okhala a murecele, oohikhala nthalu, ni oowaakhela aleco. Nnanwerya ovootha moonelo vyakala wooheseya ni waasivela anna ni arokora ni murima woothene. Wakhala wi noheerano, nnamukhala oohakalala nave nnahaala wooniherya wi na oohuserya a Yesu.—Yoh. 13:17, 35.
NCIPO 88 Mukihusihe Iphiro Sanyu
a Yesu ooloca wi Akristu eeparipari yaahaala osuweliwa ntakhara osivela. Waasivela annihu ni arokora onnaneeriha okhala a murecele, ohikhala nthalu, ni owaakhela aleco. Onamukhala woovila weerano yeela. Mwaha ola onnavahererya sooleeliherya soophara muteko mmukhalelo wa otitelela osivelana mukina ni mukhwaawe ni murima woothene.
b Masina makina mmwaha yoola aatorokiwa.
c ERUKU VA EPAAXINA: Weererya woopacerya wa murokora omaliha mwaha honakhumelela phaama, nyenya hanakookela muculi. Otitelela wawe wooniherya osivela ennakumiherya mphurelo.
d ERUKU VA EPAAXINA: Munna mmoha awunnuwelavo oniisoona okhala oohipwachiwa ni akina mmulokoni.
e ERUKU VA EPAAXINA: Murokora yoowo woopaceryani oovelela owaakhela aleco onnatoroka moonelo awe, nave matorokelo awe annamuruuhela ohakalala wawaaca.