Apwanne Munnuupuwela?

Apwanne mohaalakhanya moopwacha irevista sa Mulipeleli sa eyaakha yeela? Vano moone waakhanle wi munahaala owerya waakhula makoho anacharela:

Ti mwawiihai nneeraahu niphure wakhala wi ninnamaliha elukuluku nlocaka ni Yehova, ninwiriyanaka nave nuupuwelaka vooloca sa yoowo?

Nnahaala opakaka soolakelela saphaama, nnamukhala ahusiha aphaama, nroromelo nahu nnamukhala noolipa nave omusivela wahu Yehova onahaala waaceereryeya.—w22.01, ipaax. 30-31.

Ti mwawiihai nneeraahu niphure wakhala wi noohuserya omuroromela Yehova ni alopwana yaawo aathanlileiye wi ehooleleke muloko awe?

Hiyaano ninnooniherya wi ninnaroromela mukhalelo Yehova oneereiyeno ichu moorweela wa wiiwelela ohoolela yoowo nnaakhelaahu orweela mmarehereryo ni wa atokweene. Variyari va yoohooxa etokotoko, hiyaano nnahaala okhala ooreheryeya wiiwelela ohoolela yoowo naamwi noonaka wi tahi wamphurelo ni woohiphariheleya wa hiyo.—w22.02, ipaax. 4-6.

Tiheeni munkeelo aataphuleleiye vaavaa aalonceiye sa ‘mphimo waari mmatatani wa Soropapeli [mulamuleli a Ayuta]’? (Sak. 4:8-10, PMM)

Masu a munkeelo yaahiwooniherya achu a Muluku wi naamwi yuupuwelaka wi empa eyo yaahaala okhala ekhaani ohiyana ni ele yoopacerya, eyo yaahaala okwaaxiwa nave yaahaala okhala hiihaa ntoko Yehova aachuneleiye.—w22.03, ipaax. 16-17.

Ti mwawiihai nneeraahu nikhale ‘yootakiherya . . . mmasu’? (1 Tim. 4:12)

Ninnaloca mooreera murima ni mwa ncicimiho mmuteko ahu woolaleerya, wiipa ni murima woothene, ovaha maakhulo ilukuluku soothene mmithukumano, oloca mmukhalelo onahaala waalipiha akina ni osepa mikhalelo soothene sa munyemu.—w22.04, ipaax. 6-9.

Ntakhara heeni mwaaxinama onalociwa mu Wupulula 13:1, 2 onnalikana ni axinama axexe (olamulelo) anatharihiwa mu Taniyeli ekapitulu 7?

Mwaaxinama onalociwa mu Wupulula ekapitulu 13 haneemelela olamulelo wammoori, ntoko Roma. Ohiya yeeyo, onaweemelela alamuleli oothene yaawo anaalamulela achu ophiyerya olelo.—w22.05, epaax. 9.

Mmikhalelo taani nnooniheryaahu wi ninnaroromela wookololowa wa Yehova?

Wakhala wi muchu ooninyeenyeiha naari oonichekela, hinikuha mathowa naari okhala oonyeenyeya, nave nnahaala ohiya miyaha mmatani mwa Yehova. Ninnaroromela wi Yehova onahaala omaliha makacamiho oothene atannyiwe ni yoocheka.—w22.06, ipaax. 10-11.

Tiheeni onaphwaneleiye wuupuwela munna yoowo onavekiwa wi apake nivekelo mmithukumano?

Nivekelo hannaphariheliwa ntakhara ovaha ekano mmulokoni naari opaka soolokoha. Xaxaxa omapacereryo wa mithukumano, tahi woochuneya “oloca masu mancipale.” (Mat. 6:7)—w22.07, ipaax. 24-25.

Mmukhalelo taani yaale “yenreno ichu soonanara” anahaalaaya “oviihiwa wi ethorihiwe”? (Yoh. 5:29)

Awo hekhalano othoriha woohiphwanelela mwawiiwanana ni ichu apankaaya ehaakumve okhwa. Awo anahaala ovareryeliwa mwawiiwanana ni mukhalelo anahaalaaya waakhulela ovyakiha aneeraaya yaakhele mu elapo evyaani.—w22.09, epaax. 18.

Masu taani oohakalalihaxa munna Rutherford aalonceiye mu muthukumano wa muceche wa Setempuru wa 1922?

Va muthukumano wa muceche o Cedar Point, Ohio, E.U.A, owo aahiloca: “Mwene onnalamula! Nyuwaano mookhalano murici wa waaleela oothene vooloca sa yeela. Mwawiihiiha, mulaleye, mulaleye, mulaleye vooloca sa Mwene ni Omwene awe!”—w22.10, ipaax. 3-5.

Mikhalelo taani miraru Yesaya ekapitulu 30 onaloceiye wi Yehova onnanikhaviherya ovilela?

Ekapitulu yeela ennooniherya wi owo (1) onnawiriyana ni waakhula mavekelo ahu, (2) onnanivaha ohoolela, ni (3) onnanivaha mareeliho hiihaano nave onahaala weerano yeeyo omwaahiyu.—w22.11, epaax. 9.

Ntakhara heeni nnanwerya oloca wi masu anaphwanyeya mu Salmu 37:10, 11, 29 yaahaakhwanela khalai nave anahaala waakhwanela omwaahiyu?

Masu a Tavite annathariha mareeliho Aisarayeli akhalai yaaryaayano, ntoko yaawo yaaryaayano mu olamulelo wa Soolomoni. Atharihaka sa eversikulu 11, Yesu aahiloca wi onahaala okhalawo parataiso omwaahiyu. (Mat. 5:5; Luka 23:43)—w22.12, ipaax. 8-10, 14.