MWAHA WOOHUSERYA 47
Nni Nlipihe Hai Osivela Wahu Ntakhara Mukina ni Mukhwaawe
“Ntitelele osivelana mukina ni mukhwaawe, woona wi osivela onarweela wa Muluku.”—1 YOH. 4:7.
NCIPO 109 Osivela Onarweela Vathi va Murima
YEEYO NNAHAALAAHU OHUSERYAa
1-2. (1) Ntakhara heeni murummwa Paulo olonceiye wi osivela mukhalelo ‘mutokweenexa’? (2) Makoho taani nnahaalaahu othokororya?
VAAVAA murummwa Paulo aalonceiye sa nroromelo, ewehereryo ni osivela, owo aaphiyerya makuchuwelo wi “etokweenexa wa [mikhalelo] seiha ti osivela.” (1 Ako. 13:13) Ntakhara heeni Paulo aalonceiye yeela? Omwaahiyu, hochuneya okhalano nroromelo mwa soororomeliha sa Muluku vooloca sa elapo evyaani naari oweherya wi soororomeliha saakhwanele woona wi iho ini ineera saakhwanenle. Nyeenya ilukuluku soothene nnahaala ochuna okhalano osivela ntakhara Yehova ni achu. Mweeparipari, osivela wahu wa yoowo onahaala otitelela wunnuwa okhala wookhala.
2 Woona wi ilukuluku soothene nnahaala ochuna osivela, nnahaala othokororya makoho mararu. Noopacerya, ntakhara heeni nnaphwanelaahu osivelanaka mukina ni mukhwaawe? Nanaawiili, ti mwawiihai nnooniheryaahu osivela wa mukina ni mukhwaawe? Naneeraru, nni niwerye hai otitelela olipiha osivela wahu wa mukina ni mukhwaawe?
NTAKHARA HEENI NNAPHWANELAAHU OSIVELANAKA MUKINA NI MUKHWAAWE?
3. Mathowa taani nryaahuno a osivelana mukina ni mukhwaawe?
3 Ntakhara heeni ti woochuneya wa hiyo osivelana mukina ni mukhwaawe? Vaavaa nnooniheryaahu osivela, ninnooniherya wi na Akristu eeparipari. Yesu aaloca wa arummwa awe: “Oothene enarwa esuwela wi mwa oohuserya aka moorweela mwa ela: Mwakhalano osivela mukina ni mukhwaawe.” (Yoh. 13:35) Ohiya yeeyoru, osivelana mukina ni mukhweiye onnaneeriha okhala awiiwanana. Paulo olonce wi osivela “nimakelo noophaameya na wiiwanana.” (Ako. 3:14) Nyenya, nlelo nookhalavo nthowa nikina noochuneya nnaphwanela oneeriha osivelana mukina ni mukhwaawe. Murummwa Yohani aahaarepela akhweiye a munroromeloni ariki: “Yoole onamusivela Muluku onaphwanela tho omusivelaka munnawe.” (1 Yoh. 4:21) Vaavaa nnooniheryaahu osivela wa mukina ni mukhwaawe, ninnooniherya osivela wahu ntakhara Muluku.
4-5. Ti mwawiihai osivela wahu ntakhara Muluku oniiwananaaya ni osivela wahu wa mukina ni mkhwaawe? Mphwanaphwanihe.
4 Mmukhalelo taani omusivela wahu Muluku oniiwananaaya ni osivela yoowo nnawooniheryaahu anna ni arokora ahu? Wi niphwanaphwanihe, muthokororye mukhalelo murima ahu oniiwananaaya ni makupa makina a mwiili ahu. Vaavaa totore onavareryeiye nwono ahu wi oone waakhanle wi ori phaama naari hooye, owo onanwerya ophwanya sooleeliherya sa mukhalelo oryaaya murima ahu. Tiheeni nnahuseryaahu ni yootakiherya yeela?
5 Hiihaa ntoko totore onaweryeiye ophwanya sooleeliherya vooloca sa mukhalo wa murima ahu moorweela wa waalikhela nwono ahu, nnanwerya tho ophwanya sooleeliherya sa mukhalelo nnamusivelaahu Muluku moorweela wa waalikhela mukhalelo nnasivelanaahu mukina ni mukhwaawe. Wakhala wi nohoona wi osivela wahu ntakhara anna wooceecheya vakhaani, akhweya eyo enooniherya wi osivela wahu ntakhara Muluku onnaceecheya tho. Vaavaa ilukuluku soothene nnooniheryaahu osivela wa annihu amunroromeloni, eyo eneneeryo yawi osivela wahu ntakhara Muluku ti woolipa.
6. Ntakhara heeni nnaphwanelaahu okhala awuukhuwa wakhala wi osivela wahu ni anna ni arokorahu onnaceecheya? (1 Yohani 4:7-9, 11)
6 Wakhala wi osivela wahu ntakhara annihu ni arokora onnaceecheya, nla nikacamiho ntokweene. Ntakhara heeni? Nthowa nawi eyo yaahaala wooniherya wi makupa ahu oomunepani ari va yawoopiha. Murummwa Yohani oohiya yeela mookwakwaleya vaavaa onanuupuxereiye: “Yoole ohinamusivela munnawe, yoowo onamooneiye, hawerya omusivela Muluku, yoowo ohinamooneiye.” (1 Yoh. 4:20) Tiheeni nnahuseryaahu? Pahiru Yehova onahakalala ni hiyaano wakhala wi ‘Ninnasivelana mukina ni mukhwaawe’.—Mwaalakhanye 1 Yohani 4:7-9, 11.
NNOONIHERYA HAI OSIVELA WA MUKINA NI MUKHWAAWE?
7-8. Mikhalelo taani mikina nnaphwanelaahu wooniherya osivela wahu wa mukina ni mukhwaawe?
7 Wiiliwiili Mmasu a Muluku, ninnaphwanyamo nlamulo na “osivelana mukina ni mukhwaawe.” (Yoh. 15:12, 17; Aro. 13:8; 1 Ate. 4:9; 1 Pet. 1:22; 1 Yoh. 4:11) Mwawiihiiha, osivela mukhalelo wa mmurimani naari wa omuchu wampuwa, nave haavo muchu onawerya woona murima ahu. Vano nni niwerye hai wooniherya osivela wahu wa mukina ni mukhwaawe? Moorweela wa masu ahu ni saweera sahu.
8 Sookhalavo mikhalelo mincipale seiyo nnaphwanelaahu wooniherya wi ninnaasivela anna ni arokora ahu. Moone sootakiherya ikina: “Muloceke eparipari mukina ni mukhwaawe.” (Sak. 8:16, PMM) “Mukhale a murecele mukina ni mukhwaawe.” (Mar. 9:50) Mutitelele wooniherya “ocicimihana mukina ni mukhwaawe.” (Aro. 12:10) “Mwaakhelaneke mukina ni mukhwaawe.” (Aro. 15:7) “Mutitelele . . . olevelelana mukina ni mukhwaawe.” (Ako. 3:13) “Mutitelele woorolana mirici mukina ni mukhwaawe.” (Aka. 6:2) “Mutitelele ohakararyana mukina ni mukhwaawe.” (1 Ate. 4:18) “Mutitelele . . . otikitheryana mukina ni mukhwaawe.” (1 Ate. 5:11) “Mvekelelaneke mukina ni mukhwaawe.”—Tiy. 5:16.
Nni nimukhaviherye hai munnihu yoowo ori va yawoopiha? (Moone iparakrafu 7-9)
9. Ntakhara heeni waahakararya akina mukhalelo mmoha woochuneya wa owooniherya awo wi ninnaasivela? (Moone tho eruku.)
9 Hankooni nthokororye mmoha wa mikhalelo seiyo nnaphwanelaahu wooniherya osivela wahu wa mukina ni mukhwaawe. Nnahaala othokororya masu a Paulo: “Mutitelele ohakararyana mukina ni mukhwaawe.” Ntakhara heeni waahakararya akina mukhalelo woochuneya wa osivela? Masu Paulo opharihenleiye awi “ohakararyana” enataphulela “okhala vakhiviru va muchu ntakhara omulipiha vaavaa onahooleleiye yaweeha etokweene.” Vaavaa nnamuhakararyaahu munna yoowo anahooxeya, hiyaano ninnamukhaviherya otitelela omurumeela Yehova moororomeleya. Nave wiiliwiili vaavaa nnaahakararyaahu annihu, ninnooniherya wa yaawo wi ninnaasivela.—2 Ako. 7:6, 7, 13.
10. Wiiwanana taani orivovo variyari va niphwanya ni ohakararya?
10 Okhalano niphwanya ni ohakararya sinniiwanana. Mmukhalelo taani? Vaavaa muchu onakhaleiyeno niphwanya wa muchu yoowo anahooxeya, owo onnachuna omuhakararya ni weeravo echu wi amukhaviherye. Mwawiihiiha, vaavaa nnakhalaahuno niphwanya, eyo ennanikhaviherya waahakararya akina. Moone mukhalelo Paulo onalikanyiheiye niphwanya na Yehova na ohakararya Owo onavaheiye. Paulo onnamuloca Yehova ntoko “Tiithi a ikharari ni Muluku a ohakararya woothene.” (2 Ako. 1:3) Ntoko etharihiwaaya mu enoota ya ohuserya mu eversikulu yeela, Paulo oopharihela masu awi a “ikharari” wi aloce sa mooneelo wa niphwanya na akina. Mwawiihiiha, ‘Muluku onniichaniwa Tiithi, naari Ehime ya ikharari, nthowa nawi owo ookhalano niphwanya ntokweene wa achu.’ Nave niphwanya nenla ninnamuceenyerya onihakararya “mu saweeha sahu soothene.” (2 Ako. 1:4) Hiiha ntoko maahi aphaama enakhuma mu ehime enaalipihaaya yaale arino nthanana, Yehova onnaalipiha ni waahakararya yaale ari awiiniwa murima. Nni niwerye hai omutakiherya Yehova mu okhalano niphwanya ni waahakararya akina? Mukhalelo mmoha wa weerano yeeyo ori moorweela wa winnuwiha mikhalelo mmurimani mwahu seiho iniiwanana ni ovaha nihakararyo. Tiivi iri ikina sa mikhalelo seiho?
11. Mwawiiwanana ni Akolose 3:12 ni 1 Petru 3:8, mikhalelo taani mikina nnaphwanelaahu wunnuwiha wi ntitelele okhalano osivela yoowo onanceenyerya waahakararya akina?
11 Tiheeni enahaala onikhaviherya otitelela okhalano osivela yoowo nnachunaahu wi ‘ntitelele ohakararyana mukina ni mukhwaawe’ nihiku ti nihiku? Nnaphwanela wunnuwiha mikhalelo ntoko okhupanyeryana, osivela wa onna ni oreera murima. (Mwaalakhanye Akolose 3:12; 1 Petru 3:8.) Ti mwawiihai mikhalelo seiya inahaalaaya onikhaviherya? Vaavaa nnakhalaahuno niphwanya wa annihu nave nnuukhuwaxa ni yaawo, nnamukhalano nchuno ntokweene na waahakararya vaavaa awo anahooxeyaaya. Hiiha ntoko Yesu olonceiye, “eyano enaloca ichu seiho isaren’ye mmurimani. Muchu aphaama, onnakumiha ichu saphaama.” (Mat. 12:34, 35) Waahakararya anna ni arokora ahu, mweeparipari mukhalelo mmoha woochuneya wa wooniherya osivela wa yaawo.
NNI NTITELELE HAI WOONIHERYANA OSIVELA WAHU WA MUKINA NI MUKHWAAWE?
12. (1) Ntakhara heeni nnaphwanelaahu wiiwehereryaka? (2) Nikoho taani nnahaalaahu othokororya hiihava?
12 Oothene ahu nnaphwanela ‘otitelela osivelanaka mukina ni mukhwaawe.’ (1 Yoh. 4:7) Mwawiihiiha, ti woochuneya wuupuwelelaka masu a Yesu olonceiye wi “osivela wa ancipale onahaala oriirya.” (Mat. 24:12) Yesu haalonce wi oohuserya awe ancipale yaahaala ohiya wooniherya osivela. Nyenya, nnaphwanela otitelela wiiwehererya, wi nihivoloweliwe ni othowa wa osivela wa elapo yeela enirukurenrye. Ni yeela mmuupuweloni, hankooni nthokororye nikoho nla noochuneya: Tiheeni enahaala onikhaviherya woona wakhanle wi osivela wahu wa annihu ti woolipa?
13. Tiheeni enahaala onikhaviherya osuwela waakhanle wi osivela wahu ntakhara anna ti woolipa?
13 Mukhalelo mmoha wa osuwela waakhanle wi osivela wahu ti woolipa ori moorweela wa waalikhela mukhalelo nnaakhulelaahu mikhalelo sammoori sa okumi ahu. (2 Ako. 8:8) Mmoha wa mikhalelo seiha wootharihiwa ni murummwa Petru: “Opwaha ichu soothene, mukhaleno osivela weeparipari wa mukina ni mukhwaawe, woona wi osivela onnakhuneela waaca wa soocheka.” (1 Pet. 4:8) Mwawiihiiha, sooceecheiha ni ohiphaameya wa akina onanwerya wooniherya waakhanle wi osivela wahu wa yaawo ti woolipa.
14. Mwawiiwanana ni 1 Petru 4:8, osivela wa mukhalelo taani nnaphwanelaahu okhalano? Mphwanaphwanihe.
14 Vano hankooni nuupuwele mwawiiseela masu a murummwa Petru. Makupa oopacerya a eversikulu 8 ennathariha mukhalelo wa osivela yoowo hiyaano nnaphwanelaahu okhalano—“osivela weeparipari.” Masu Petru opharihenleiye awi “weeparipari” enataphulela “onyomola.” Makupa anaawiili a eversikulu annathariha yeeyo nnahaalaahu weera vaavaa nnakhalaahuno osivela weeparipari wa akina. Onnakhuneela soocheka sa annihu. Nnanwerya waanyiherya mmukhalelo ola: Ninnapharela osivela wahu ni mata meeli, ntoko ekuwo yoovitikeleliwa nave ninnaaneya vakhaani-vakhaani ophiyerya okhuneela, ohiya pahiru yoocheka emoha naari piili, nyenya ‘soocheka sawaaca.’ ‘Okhuneela’ mmasu makina okhurumuwela. Hiiha ntoko ekuwo enakhuneelaaya niharipa, osivela onanwerya tho okhuneela sooceecheiya ni ohiphaameya wa akina.
15. Wakhala wi osivela wahu ntakhara anna ti woolipaxa, tiheeni nnahaalaahu owerya opaka? (Akolose 3:13)
15 Osivela wahu ntakhara anna ni arokora onaphwanela okhala woolipaxa wi niwerye okhurumuwela ohiphaameya waya—naamwi weerano yeeyo okhalaka woovila. (Mwaalakhanye Akolose 3:13.) Vaavaa nnaweryaahu waakhurumuwela akina, nnahaala wooniherya wi osivela wahu ti woolipa nave wi ninnachuna omuhakalaliha Yehova. Echu taani ekina enahaala onikhaviherya okhurumuwela soohesa sa akina ni ohaakuvela onyeenyeya ni ichu seiho aneeraaya?
Hiiha ntoko nnakhapelelaahu iruku saphaama ni oxipiha soonanara, ninnavaha esisapo ni wuupuwelela ichu saphaama annihu anapakaaya nave hannuupuwela soonanara seiyo awo aneeraaya (Moone iparakrafu 16-17)
16-17. Echu taani ekina enahaala wookhaviheryaani ohipwacha soocheka ikhaani sa akina? Mphwanaphwanihe. (Moone tho eruku.)
16 Mutikitheryeye mu ichu saphaama sa anna ni arokora ohiya mu soohesa saya. Muthokororye niphwanaphwaniho nla: Mwaanyiherye wi muri mmuthukumano wammoori nnikhuuru na anna ni arokora. Nyuwaano muri oohakalala, nave omakuchuwelo wa muthukumano munnakumiha eruku ya nikhuuru noothene. Mweeparipari, munnakumiha iruku ikina piili moovaka wi yoopacerya akhweya hekhumme phaama. Vano nyuwaano murino iruku raru. Nyenya mu eruku emoha, munnoona wi munna mmoha oonanariha owanoni. Tiheeni muneeraanyu ni eruku yeeyo? Nyuwaano munnaxipiha nthowa nawi mookhalano iruku ikina piili, seiho anna oothene, ophitaanyerya munna yoole, anatheyaaya.
17 Nnanwerya olikanyiha iruku nnakhapelelaahu mu telefoni ni ichu seiho nnakhapelelaahu mmuupuweloni. Wiiliwiili ninnuupuwela ilukuluku saphaama seiho nimalinhaahu ni anna ni arokora ahu khalai. Nyenya akhweya, mu ekwaha emoha sa seiho, munna naari murokora ooloca naari weera echu yoonyeenyeiha. Tiheeni nnaphwanelaahu weera ni muupuwelo yoowo? Munoona hai oxipiha hiiha ntoko mwaahaalaanyu oxipiha iruku seiho? (Mas. 19:11; Aef. 4:32) Nnanwerya ocuwala yoocheka ekhaani ya munna naari murokora woona wi ninnuupuwela ilukuluku sincipale saphaama nimalinhaahu ni yoowo. Ola muupuwelo nnaphwanelaahu okhapelela ni ovaha esisapo.
NTAKHARA HEENI OSIVELA TI WOOCHUNEYA XAXAXA MMAHIKU YAALA?
18. Ichu taani soochuneya vooloca sa osivela nthokoronryaahu mmwaha yoola?
18 Ntakhara heeni nnaphwanelaahu otitelela olipiha osivela wahu wa mukina ni mukhwaawe? Ntoko nihusenryaahu, vaavaa nnooniheryaahu osivela wa anna ni arokora ahu, ninnooniherya osivela wa Yehova. Ti mwawiihai nnooniheryaahu osivela wahu wa anna ni arokora ahu? Mukhalelo mmoha wa weerano yeeyo ori moorweela wa waahakararya. Nnahaala owerya ‘otitelela ohakararyana mukina ni mukhwaawe’ wakhala wi ninnaceenyeryiwa nniphwanya. Nni niwerye hai otitelela olipiha osivela wahu mukina ni mukhwaawe? Moorweela wa opaka owetha wahu wi naakhurumuweleke akina.
19. Ntakhara heeni ti woochuneya wooniherya osivela wa mukina ni mukhwaawe xaxaxa mmahiku ahu yaala?
19 Ntakhara heeni ti woochuneya wooniherya osivela mukina ni mukhwaawe xaxaxa mmahiku ahu yaala? Moone nthowa nenlo Petru onavahereryeiye: “Makuchuwelo a ichu soothene ari vakhiviru. Mwawiihiiha, . . . mukhaleno osivela weeparipari wa mukina ni mukhwaawe.” (1 Pet. 4:7, 8) Vaavaa makuchuwelo a elapo yeela yoonanara anamviraaya yaacamelaka, tiheeni nnaphwanelaahu oweherya? Alocaka vooloca sa oomuchara awe, Yesu aahiloherya: “Nyuwo munarwa mwiiciwa ni maloko oothene vanthowa na nsina naka.” (Mat. 24:9) Wi nivilele wiica yoola, nnaphwanela otitelela okhala awiiwanana. Vaavaa nneeraahuno yeela, wiilipixerya wa Satana wa onikawanya hokhumelela phaama woona wi nimakeleliwe ni osivela—yoowo ori “nimakelo noophaameya nawiiwanana.”—Ako. 3:14; Afi. 2:1, 2.
NCIPO 130 Mulevelelaneke
a Hiihaano opwaha khalai, ti woochuneya wooniherya osivela wa anna ni arokora ahu. Ntakhara heeni eyo ti yoochuneya nave ti mwawiihai nneeraahu nooniherye osivela wa mukina ni mukhwaawe?