Okhurumuweliwa Ohaakumve Woopola

Nnanwerya okhurumuweliwa soocheka sahu pahiru moorweela wa mukucho wa woopola yoowo Yesu olimveiye nnikhami nawe. (Aef. 1:7) Mwawiihiiha, Piipiliya onii: “Vawi [Muluku] mu ovilela wawe owo aanalevelela soocheka seeriweno khalai,” eyo tiwi, ahaakumve Yesu oveleela mukucho. (Aro. 3:25, moone enoota.) Ti mwawiihai Yehova aahaaleiye weerano yeeyo, nave mu elukuluku emohamoha atitelele ni meecelo awe a vasulu oophaameya eekhaikhai?

Mmoonelo wa Yehova, yaari echu yaphaama vaavaa waaliviwaaya opacerya elukuluku yeeyo owo aalakelenleiye waavahererya “achu” oothene yaawo yaahaala ovuluxiwa. (Map. 3:15; 22:18, PMM) Muluku aanasuwela wi mwanawe ooyariwa meekheiye mooreera murima aahaala ovahererya mukucho. (Aka. 4:4; Ahe. 10:7-10) Vaavaa aareiye veelaponi yavathi ntoko oomweemelela Muluku, Yesu aahikhalano owerya wa okhurumuwela soocheka mukucho ohaakumve ovahiwa. Owo aaheerano yeeyo apharihelaka esisapo ya mukucho awe aahaaleiye ovaha ohoolo waya wa achu yaawo yaarino nroromelo.—Mat. 9:2-6.