MWAHA 5
Woopola—Yamahala Etokotoko ya Muluku
Woopola tiheeni?
Woopola oliveliwe hai?
Woopola onataphulela heeni wa nyuwo?
Munii mooniherye hai wi munnathamalela woopola?
1, 2. (a) Ti mwawiihai yamahala enakhalaaya yasisapo yoowalamela wa nyuwo? (b) Ntakhara heeni ennalociwa wi woopola yamahala yasisapo yoowalamela yeeyo nyuwo munaphwanelaanyu waakhela?
TIIVI eri yamahala yaphaama mwaakhenlanyu? Yamahala henaphwanela okhala yoowalamela wi ekhale yoochuneyaxa. Opwaha soothene, yamahala henaphimmwa mu waaca wa ikhorowa. Ohiya yeeyo, wakhala wi yamahala eyo ennoohakalalihaani naari ennakhaviherya yoothowa mu okumi anyu, chiryene eyo ti yasisapo wa nyuwo.
2 Variyari va samahala munaweheryaanyu waakhela, yookhalavo emoha eri etokotoko opwaha soothene. Eyo ti yamahala enarweela wa Muluku ntakhara achu. Yehova oonivaha ichu sincipale, nyenya yamahala awe etokotoko wa hiyaano ti mukucho wa woopola wa Mwanawe, Yesu Kiristu. (Mwaalakhanye Mateu 20:28.) Nnahaala woona Mmwaha ola, wi woopola yamahala yasisapo yoowalamela yeeyo nyuwo munaphwanelaanyu waakhela, nthowa nawi eyo enanwerya wooruhelaani ohakalala woohimala ni okhaviherya soothowa sanyu soochuneyaxa. Woopola yawooniherya etokotoko ya osivela wa Yehova wa nyuwo.
WOOPOLA TIHEENI?
3. Woopola tiheeni, nave tiheeni nnaphwanelaahu opacerya wiiwexexa wi niwerye othamalela yamahala ela?
3 Mookhweya, woopola ti marehereryo a Yehova a waavuluxa achu mu yoocheka ni okhwa. (Éfeso 1:7) Wi niiwexexe yootaphulela ya yoohusiha ya Piipiliya ela, hiyaano nnaphwanela wuupuwela yeeyo yeeren’ye mu emaca ya Eeteni. Nnahaala wiiwexexa ntakhara heeni woopola okhanlaaya yamahala yasisapo yoowalamela wa hiyo, wakhala wi nohiiwexexa phaama yeeyo Aatamu aayeleenleiye vaavaa aachenkeiye.
4. Okumi woophaameya waataphulela eheeni wa Aatamu?
4 Vaavaa Yehova aampatunxeiye Aatamu, Yehova aamvaha echu yasisapo yoowalamela—okumi woophaameya. Thokororyani tiheeni eyo yaataphulelaaya wa Aatamu. Woona wi Aatamu aapatuxiwe ni mwiili ni muupuwelo woophaameya, owo haahaala wiiceliwa, wuuluvala, naari okhwa. Ntoko muchu oophaameya, owo aakhalano waataana wavameekhaaya ni Yehova. Piipiliya onnaloca wi Aatamu aari “mwana a Muluku.” (Luka 3:38) Mwawiihiiha Aatamu aapuha waataana waphaama ni Yehova Muluku, hiihaa ntoko waataana wa mwaana ni tiithi oosivela. Yehova aanaloca ni mwanawe a veelaponi yavathi, aamvaha Aatamu muteko woohakalaliha nave aamuleela yeeyo owo aawehereryeiye wa yoowo.—Maphatxuwelo 1:28-30; 2:16, 17.
5. Enataphulela heeni Piipiliya aalocaka wi Aatamu aapatuxiwe “òphwana” ni Muluku?
5 Aatamu aapatuxiwe “òphwana ni yowo”. (Maphatxuwelo 1:27) Eyo henataphulela wi Aatamu aari oolikana ni Muluku mwa mwiili. Ntoko nihusenryaahu Mmwaha woopacerya wa liivuru ola, Yehova Munepa woohooneya. (Yohani 4:24) Mwawiihiiha Yehova haanono mwiili wanama nnikhami. Opatuxiwa oolikana ni Muluku yaataphulela wi Aatamu aapatuxiwe ni makhalelo ntoko a Muluku, enaphitaanyerya osivela, miruku, ekhaikhai, ni owerya. Aatamu aari oolikana ni Atiithi awe mmukhalelo mukina woochuneyaxa, nthowa nawi owo aakhalano othanla wootaphuwa. Mwawiihiiha, Aatamu haari ntoko maakina yaawo anapaka pahiru yeeyo apakeliwaaya wi yeere. Moohiyana, Aatamu aanawerya othanla mukhateiye variyari va yaphaama ni yoonanara. Waakhanle wi oothanla omwiiwelela Muluku, owo aahaala okhala ni okumi okhala wookhala mu Parataiso veelaponi yavathi.
6. Mano vaavaa Aatamu aamuchekenleiye Muluku, tiheeni owo aayeleenleiye, nave eyo yaavolowenle hai anamwane awe?
6 Mwawiiweyaxa, vaavaa Aatamu aamuchekenleiye Muluku nave athoriheriwa okhwa, owo aaliva esisapo yoowalamela. Yoocheka awe yaamuyeleeliha okumi awe woophaameya ni mareeliho aya oothene. (Maphatxuwelo 3:17-19) Moothananiha, Aatamu aayeleela okumi ola waphaama ohiya yooworu mukhateiye nyenya tho wa anamwane awe a muhoolo. Masu a Muluku anii: “Vano ntoko nthowa na mutxhu mmoha pahi yòvolowa mwelaponi yotxheka, nave tho ni yotxheka wòvolowa mweelaponi okhwa, hihatho okhwa wòhaphwanya atxhu othene, ntakhara atxhu othene àtxheka.” (Aroma 5:12) Aai, oothene hiyo noorava yoocheka ya Aatamu. Mwawiihiiha, Piipiliya onaloca wi owo “òtumihiwa” vamoha ni anamwane awe mu okapuro wa yoocheka ni okhwa. (Aroma 7:14) Hiwaarivo ewehereryo wa Aatamu naari Haava nthowa nawi awo yaathanlile mwaayiini ohimwiiwelela Muluku. Mano hanka vooloca sa anamwane aya, ophitaanyerya hiyaano?
7, 8. Woopola onaphitaanyerya ichu taani piili?
7 Yehova onaavuluxa achu moorweela wa woopola. Woopola tiheeni? Woopola onaphitaanyerya ichu piili. Yoopacerya, woopola ti esisapo enaliveliwa wi yoopoliwe naari ekookihiwe echu. Eyo ennaphwanaphwana ni esisapo enaliveliwa wi oopoliwe muchu ophariwe okhoconi. Yanapiili, woopola ti esisapo enuuheela, naari enaliveliwa, owalamela wa echu. Eyo enalikana ni ikhorowa inakumihiwa wi eliveliwe echu enanarihiwe. Ntoko yawooniherya, wakhala wi muchu oonanariha echu, owo onaphwanela oliva esisapo yawaakhwanela, naari enaphwanaphwana ni esisapo ya echu eyo enanarihiwe.
8 Mano yaahaala oweryeya hai oliveliwa makacamiho oothene Aatamu oniwiihenreiye wi noopoliwe mwa okapuro wa yoocheka ni okhwa? Hankooni nthokororye woopola iwo Yehova onivanheiye nave tiheeni enataphulelaaya wa nyuwo.
YEHOVA ONIVANHE WOOPOLA MWAWIIHAI?
9. Mano waakhweleya woopola wa mukhalelo taani?
9 Nthowa na orimeela wa okumi woophaameya, hiwaarivo okumi woohiphaameya waahaala woopola okumi owo. (Salumu 49:7, 8) Waakhweleya woopola onaphwanaphwana ni esisapo ya okumi yoole orimeenle. Ela enniiwanana ni nlamulo nri mu Masu a Muluku, nnii: “Ekumi eliviweke ni ekumi.” (Malamulo 19:21) Mwawiihiiha, taani aahaala wuuheela esisapo ya okumi woophaameya yoowo Aatamu aayeleenleiye? Waakhweleya okumi woophaameya wi okhale yawoopola “wa atxhu othene.”—1 Timóteo 2:6.
10. Yehova onivanhe woopola mwawiihai?
10 Yehova onivanhe woopola mwawiihai? Owo aamuruma mwanawe mmoha oophaameya wi arwe veelaponi yavathi. Nyenya Yehova haarumme yoopatuxiwa yoomunepani vyakala. Owo aamurumme muchu oochuneyaxa wa yoowo, Mwanawe ooyariwa meekheiye. (Mwaalakhanye 1 Yohani 4:9, 10.) Mwawiiveleela, Mwaana ola aahiya empaawe wirimu. (Filipi 2:7) Ntoko nihusenryaahu Mmwaha ovinre wa liivuru ola, Yehova aapaka yootikiniha vaavaa aathamihenryeiye okumi wa Mwanawe mmirimani mwa Mariya. Moorweela wa munepa waweela, Yesu aayariwa ntoko muchu oophaameya nave yoocheka hiyaamvolowenle.—Luka 1:35.
11. Muchu mmoha aaya owerya hai okhala yawoopola wa achu ancipale?
11 Muchu mmoha aaya owerya hai okhala yawoopola wa achu ancipale? Ti mwawiihai achu ancipale yaakhanlaaya alipa oocheka wuupaceryani? Upuwelani wi mwa ocheka, Aatamu ooyeleela esisapo ya okumi woophaameya. Mwawiihiiha, owo hakaawenrye waavaha anamwane awe okumi owo. Ohiya yeeyo, owo owenrye waavaha pahiru yoocheka ni okhwa. Yesu, yoowo oniichaniwa Mpiipiliyani ntoko “Adamu òkutxhula,” aakhalano okumi woophaameya, nave owo hantonko ocheka. (1 Korinto 15:45) Mmukhalelo mukina, Yesu ooraceela nipuro na Aatamu wi anivuluxe. Moorweela wa mukucho, naari ovaha okumi awe woophaameya mu omwiiwelela Muluku, Yesu ooliva esisapo ya yoocheka ya Aatamu. Mwawiihiiha Yesu aaruuha ewehereryo wa anamwane a Aatamu.—Aroma 5:19; 1 Korinto 15:21, 22.
12. Tiheeni yooniheryiwe ni masooso a Yesu?
12 Piipiliya onnaloca mwawiiweyaxa masooso yaawo Yesu aavilenleiye ahaakumve okhwa. Owo aawaxuliwa moowali, aathomeiwa mootakhala, nave aakhwa vamwirini. (Yohani 19:1, 16-18, 30; moone Masu Awaaceererya, “Ntakhara Heeni Akiristu Eeparipari Hanapharihela Mwikimanyo Mmalapelo?”) Nthowa heeni yaaraaya yoochuneya wi Yesu oone masooso mancipale? Mmwaha wa muhoolo wa liivuru ola, nnahaala ohuserya wi Satana oovaanya wi achu yaawo anamurumeela Yehova hanawerya opwahiherya okhala oororomeleya yakumana ni saweeha. Moorweela wa okhala oororomeleya va ovilela masooso mancipale, Yesu ohaakhula phaama waakaaha wa Satana. Yesu ohooniherya wi muchu oophaameya orino othanla wootaphuwa aanwerya okhala oororomeleya wa Muluku moohipwacha yeeyo Musaserya oneereiye. Yehova aahakalala vancipale nthowa na ororomeleya wa Mwanawe oosiveliwa owo!—Masiposipo 27:11.
13. Woopola oliveliwe hai?
13 Woopola oliveliwe hai? Va nihiku na 14 mweeri wa Ayuuta wa Nisani, eyaakha ya 33 E.K., Muluku aaheemererya wiiphiwa wa Mwanawe oophaameya ni oohicheka. Mwawiihiiha Yesu aaveleela okumi awe woophaameya “etila emoha mwa itila sothene.” (Ahebri 10:10) Nihiku na neeraru amanle okhwa Yesu, Yehova aamviiha owo akookela okumi woomunepani. Wirimu, Yesu aaveleela wa Muluku esisapo ya okumi awe oveleeliwe ntoko mukucho wa woopola ntakhara anamwane a Aatamu. (Ahebri 9:24) Yehova aaheemererya esisapo ya yooveleela ya mukucho wa Yesu ntoko woopola waachuneya wi aavuluxe achu mu okapuro wa yoocheka ni okhwa.—Mwaalakhanye Aroma 3:23, 24.
WOOPOLA ONATAPHULELA EHEENI WA NYUWO
14, 15. Tiheeni nnaphwanelaahu weera wi naakhele “oleveleliwa wa sotxheka”?
14 Naamwi nri achu oocheka, ninnawerya waakhela mareeliho mancipale a woopola. Hankooni nthokororye mareeliho amutano ni a muhoolo a yamahala etokotoko ela enarweela wa Muluku.
15 Okhurumuweliwa wa soocheka. Nthowa na orava ohiphaameya, hiyaano nookhalano ekhoco chiri wi neere yeeyo eri yaphaama. Oothene hiyo ninnacheka mmasu naari mu saweera. Nyenya moorweela wa mukucho wa woopola wa Yesu, ninnaakhela “oleveleliwa wa sotxheka.” (Kolosi 1:13, 14) Vanonto, wi naakhele okhurumuweliwa iwo, nnaphwanela ocharuwa chiryene. Nnaphwanela tho omvekela Yehova mwawiyeviha, nivekaka okhurumuwela wawe mu mathipelo a nroromelo nahu mu mukucho wa woopola wa Mwanawe.—Mwaalakhanye 1 Yohani 1:8, 9.
16. Tiheeni enanikhaviherya omulapela Yehova ni yawuupuxerya-ya-murima yaphaama, nave tiivi eri esisapo ya yawuupuxerya-ya-murima ntoko yeeyo?
16 Yawuupuxerya-ya-murima yaphaama vamiithoni va Muluku. Yawuupuxerya-ya-murima yoonanara enahaala oneeriha oyeleela ewehereryo ni okhala oothanana. Okhurumuweliwa onaweryeya moorweela wa woopola, Yehova mooreera murima onnanikhaviherya wi nimulapele ni yawuupuxerya-ya-murima yaphaama variyari va ohiphaameya wahu. (Ahebri 9:13, 14) Ela enneeriha wi niwerye oloca ni Yehova ni murima woothene. Mwawiihiiha, nnahaala omwaacamela owo mu nivekelo. (Ahebri 4:14-16) Okhalano yawuupuxerya-ya-murima yaphaama ennavaha murecele mmuupuwelo, ncicimiho noomuchu, nave ennaruuha ohakalala.
17. Mareeliho taani anahaala weereya nthowa na okhwa wa Yesu ntakhara hiyaano?
17 Ewehereryo ya okumi woohimala mu parataiso veelaponi yavathi. Aroma 6:23 onii: “Nlivelo na yotxheka ti okhwa.” Eciciri emohamoha ennaaceererya: “Nto mahala Muluku onanivaheiye, ti ekumi yohimala mwa Kristu Yesu Pwiya ahu.” Mmwaha 3 wa liivuru ola, noothokororya mareeliho a Parataiso a veelaponi yavathi onoorwa owo. (Wupulula 21:3, 4) Mareeliho oothene awo a muhoolo, ophitaanyerya okumi woohimala mmakhalelo oophaameya, anahaala weereya nthowa na okhwa wa Yesu ntakhara hiyaano. Wi naakhele mareeliho awo, onakhweleya wi nooniherye othamalela yamahala ya woopola.
MUNII MOONIHERYE HAI OTHAMALELA WANYU?
18. Ntakhara heeni ninnaphwanela omuthamalela Yehova ntakhara woopola?
18 Ntakhara heeni ninnaphwanela omuthamalela Yehova ntakhara woopola? Phaameene, yamahala ti yasisapo etokotoko wakhala wi eyo enaphitaanyerya ovaha elukuluku, ikuru, naari ichu ikina. Murima ahu onnahakalala vaavaa nnoonaahu wi yamahala eyo yawooniherya ya osivela weeparipari wa mulipa oovaha ntakhara hiyaano. Woopola ti wa esisapo etokotoko opwaha samahala soothene, nthowa nawi Muluku oopaka mukucho mutokotoko wi arehererye woopola iwo. Yohani 3:16 onii: “Muluku òtepa wakhwela atxhu a mwelaponi, ophiyerya omvaha Mwana awe mmoharu.” Woopola yawooniherya etokotoko ya osivela wa Yehova ntakhara hiyaano. Woopola onnooniherya tho osivela wa Yesu ntakhara hiyaano, nthowa nawi owo mwawiiveleela oovaha okumi awe ntakhara hiyo. (Mwaalakhanye Yohani 15:13.) Yamahala ya woopola enaphwanela oniroromeliha wi Yehova ni Mwanawe annamusivela muchu ori oothene a hiyo.—Galasya 2:20.
19, 20. Mmakhalelo taani muneeraanyu mooniherye wi munnathamalela yamahala ya Muluku, woopola?
19 Munii mooniherye hai wi munnathamalela vancipale yamahala ya Muluku, woopola? Voopacerya, mwiilipixerye ohuserya vancipale sa Yehova, yoowo onivanhe woopola. (Yohani 17:3) Omuhuserya Piipiliya nnikhaviheryo na liivuru ola enahaala wookhaviheryaani omusuwela phaama Yehova. Vaavaa munamusuwelaanyu phaama Yehova, osivela wanyu onahaala wunnuwa. Voocharela, osivela iwo onahaala oweerihaani omuhakalaliha.—1 Yohani 5:3.
20 Roromelani mukucho wa woopola wa Yesu. Vooloca sa Yesu yaalociwa wii: “Ole onamwemererya Mwana, òkhalano ekumi yohimala.” (Yohani 3:36) Nnii nooniherye hai wi ninnamuroromela Yesu? Nroromelo nlo hinnooniheryiwa ni masu pahiru. Tiyako 2:26 onnaloca: “Nroromelo nahinatxharihiwa ni miteko sa ikharari nnakhala nokhwanene.” Aai, nroromelo neeparipari nnooniheryiwa ni “miteko” ti wi, moorweela wa saweera sahu. Mukhalelo mmoha wa wooniherya wi ninnamuroromela Yesu ori wiilipixerya omutakiherya ohiya mwa yeeyo nnalocaahu pahiru nyenya tho mwa yeeyo nneeraahu.—Yohani 13:15.
21, 22. (a) Ntakhara heeni nnaphwanela ophiya va Mukonelo wa Apwiya? (b) Tiheeni enahaala otharihiwa Mmiyaha 6 ni 7?
21 Phiyani va Yawuupuxerya eyaakha ti eyaakha. Va ohiyu wa 14 a Nisani, 33 E.K., Yesu aapaceryiha yawuupuxerya yavameekhaaya yeeyo Piipiliya oniichaneiye “Olya wa Apwiya.” (1 Korinto 11:20; Mateu 26:26-28) Yaweereya ela enniichaniwa tho Mukonelo wa Apwiya. Yesu aaheerano ela wi aakhaviherye arummwa awe ni oothene yaawo yaahaala okhala Akiristu eeparipari wi yuupuweleke wi moorweela wa okhwa wawe ntoko muchu oophaameya, Yesu oovaha okumi awe ntoko woopola. Vooloca sa yawuupuxerya ela, Yesu aalamulela: “Mwereke yela mukupuwelaka miyano.” (Luka 22:19) Ophiya va Yawuupuxerya, ennanikhaviherya wuupuwelela osivela otokotoko wooniheryiwe ti Yehova vamoha ni Yesu. Hiyaano nnanwerya wooniherya othamalela wahu woopola moorweela wa ophiya eyaakha eri yoothene va Yawuupuxerya ya okhwa wa Yesu.a
22 Woopola iwo Yehova onivanheiye ti yamahala yasisapo yoowalamela. (2 Korinto 9:14, 15) Yamahala yeela yasisapo etokweene, enanwerya waakhaviherya tho achu akhwile. Miyaha 6 ni 7 inahaala othariha yeeyo.
[Nsu na vathi]
a Wi mphwanye miselo sawaacereryeya vooloca sa yootaphulela ya Yawuupuxerya ya Mukonelo wa Apwiya, vareryani Masu Awaaceererya, “Mukonelo wa Apwiya—Yawuupuxerya Enamucicimiha Muluku.”
PIIPILIYA ONAHUSIHA EHEENI
▪ Woopola marehereryo a Yehova a waavuluxa achu mu yoocheka ni okhwa.—Éfeso 1:7.
▪ Yehova oonivaha woopola moorweela wa omuruma Mwanawe ooyariwa meekheiye wi akhwe ntakhara hiyaano.—1 Yohani 4:9, 10.
▪ Moorweela wa woopola, ninnaakhela okhurumuweliwa wa soocheka, yawuupuxerya-ya-murima yaphaama, ni ewehereryo ya okumi woohimala.—1 Yohani 1:8, 9.
▪ Hiyaano ninnooniherya wi ninnathamalela woopola moorweela wa ohuserya sa Yehova, mwa ororomela mukucho wa woopola wa Yesu, ni mwa ophiya va Mukonelo wa Apwiya.—Yohani 3:16.
[Eruku va epaaxina 52]
Yehova oonivaha Mwanawe ooyariwa meekheiye ntoko woopola ntakhara hiyaano
[Eruku va epaaxina 54]
Omusuwela phaama Yehova ti mukhalelo mmoha wa wooniherya wi nyu munnathamalela yamahala awe ya woopola