MWAHA 15
Mwaara A Looti Aahiweha Muchuli
LOOTI ni echokwaawe yaakhala ni Aaparahamu mu elapo yooKaanani. Va nnihiku nikina Aaparahamu aahi wa Looti: ‘Hiwavovo va nipuro nawaakhwanela wa inama sahu soothene. Khwoo, hinko nimwalamwale. Waya makupa mamoha, miyo kinahaala oya makupa makina.’
Looti aahivarerya phaama elapo ele. Aahoona wii makupa mamoha ooreeraxa a elapo eyo yaahikhala ni maahi nnikuwa ntokotoko ntakhara a inama sawe. Waari Mpopa wa Yoortano. Looti aahithaamela weiwo, vamoha ni echokwaawe ni inama sawe. Vookuchula vaya, yaahikhala m’epooma ya Sotoma.
Achu o Sotoma yaari oonanara vancipale. Ela yaahimukachamiha Looti nthowa nawii owo aari muchu aphaama. Yaahimukachamihatho Muluku. Vookuchula vaya, Muluku aahaaruma angelo eeli, omulopola Looti wii aahala otoloxa Sotoma ni epooma ya yawaacamanano ya Komora, ntakhara a onanara waya.
Angelo yaahi wa Looti: ‘Akuveya! Mukuxe mwaaraa ni anamwanaa eeli, nave ovinyevo va!’ Looti ni echokwaawe yaahilekela vakhaani, vawihiihaa wii angelo yaahapharela matata yaakumiherya vaate va epooma eyo. Mmoha a angelo aahi: ‘Chimakani wii mvuluxe okumi! Muhiwehe muchuli. Muchawele o mwaako wii muhikhwe.’
Looti ni anamwanaawe yaahiiwelela, echawela ociiwene ni Sotoma. Hiyeemenle nave hiyaawenhe oculi. Nyenya mwaara a Looti haaiwelenle. Mu ekuluchu yammori ovinyerya mweepoomani mmo, owo aaheemela nave aahiweha muchuli. Hiihaanto mwaara a Looti aahithatuwa nluku na maakha. Mano munnamoona va oriiyevo veruku ela?
Ninnawerya ohuseryavo yoohuserya yaphaama va yeeyo. Enathonyerya wii Muluku onnaavuluxa yaawo anamwiiwelelaa, nyenya yaawo ahinamwiiwelela annoochela okumi.
Mapacereryo 13:5-13; 18:20-33; 19:1-29; Luka 17:28-32; 2 Petro 2:6-8.