MWAHA 63
Soolomoni Mwene Amirukuuwo
SOOLOMONI aari mmiravo vavaa aakhanliiye mwene. Aanamusivela Yehova nave anacharela malakiheryo aphaama a atiithinya Tavite. Yehova aahihakalala ni Soolomoni, nave, va nthowa nla, aahi wa yoowo mu ohiyu okina, muulohani: ‘Soolomoni, mano onachuna wii miyo koovahe eheni?’
Soolomoni aahaakhula: ‘Yehova, Muluku aka, ka mmiravo vancipale nave nkinasuwelano olamulela. Mukivahe miruku wii kaalamulele achwaanyu mu ephiro yawookololowa.’
Yehova aahisiveliwa ni yeeyo Soolomoni aavenkiiye. Hiihaa, Owo aahi: ‘Okhala wii ovemke miruku, nave oohii okumi woorekama, naari muhakhu, kinahaala woovaha miruku seiyo sihintonko okhaliwano ni muchu mukina. Nyenya, kinahaala woovahatho yeeyo ohivenkaawe, muhakhu ni nchichimiho.’
Elukuluku vakhaani vachuli vaya, yaahiphiya wa Soolomoni athiyana eeli ni yokachamiha. ‘Muthiyana ola ni miyo nnakhala empa emoha yeeyo,’ aahithoriha mmahoowo. ‘Kaahimuyara mwaana, nave, vachuli va mahiku meeli owotho aahimuyara mwaana. Ovinyerya vavaa, ohiyu okina, mwanawe aahikhwa. Nyenya, miyo kikonaka, owo aahikikuherya mwaana ookhwoowo nave amukuxa awaka. Vavaa kaavinnyaaka nave kimoona mwaana ookhwoowo, kaahisuwela wii haari awaka.’
Vanonto muthiyana mukinoowo aahi: ‘Hooye! Mukumi owo tawaka nave ookhwoowo tawawe!’ Oopaceryoowo aahaakhula: ‘Hooye! Ookhwoowo tawaa nave mukumi owo tawaka!’ Athiyanaawo yaakhulana mwawihiihaa. Mano Soolomoni eenre eheni?
Aahilamula oruuhiwa nlema, nave vanonto aahi: ‘Mukawanyeeni mwaana mukumi owo mmakupa meeli, nave mveleele emeya wa muthiyana ori oothene.’
‘Hooye!’ yaahikhuwela amannyeenexa. ‘Khwoo, muhimwiiphe mwanoowo. Mvahereryeeni wa owo!’ Nyenya mukinoowo aahi: ‘Muhi vahererye wa ori oothene wa hiyo; mmukawanye makupa meeli.’
Vookuchula vaya, Soolomoni aahiloca: ‘Muhimwiiphe mwanoowo! Mvahereryeeni muthiyana oopaceryoowo. Owo tori amannyeenexa.’ Soolomoni aahisuwela wii amannyeenexa yanamusivela vancipale mwanoowo, wii yaari awiirehererya omvahererya wa muthiyana mukinoowo, wii ahiiphiwe. Vavaa achu yaasuwenlaaya sa mummo Soolomoni aamalihenryiiye yokachamiha ela, yaahihakalala okhala ni mwene amiruku vancipale.
Mu omwene wa Soolomoni, Muluku aahaareeliha achwaawo mu weeriha wii echaya evaheke mmiso wawacha, mpesa, mukuukhu ni soolya sikina. Achu yaanawara soowara saphaama nave yaakhala mu ipa saphaama. Wa soothene seiyo saari saphaama, saari sincipale wa oothene.
1 Mamwene 3:3-28; 4:29-34.