MWAHA 64
Soolomoni Onnateka Empa Ya Muluku
TAVITE ahaakumve okhwa, owo ahimvaha Soolomoni mathipelo a Muluku, wii ateke empa ya Yehova. Mu eyaakha yaneexexe ya olamulela wawe, Soolomoni aahipacerya empeeyo yeeyo yaakunxe iyaakha thanu napiili ni emeya wii emale. Masana masaneene a achu yaahiphara muteko mu otekiwa waya wa eyo, weiwo waakunxe ikhorowa sincipale. Eyo yaari nthowa na mivira ni parata muncipale saaphariheliwe muteko mu eyo.
Empa eyo yaarino isaala piili itokotoko, hiihaa ntoko tabernaakulu. Nnya isaala iha saari itokotoko wuuluulela wiili opwaha miruku sa tabernaakulu. Soolomoni aahilamula wii ekaxa ya nlakano ekuhiwe mu esaala ya mpuwamwenexa, nave ichu ikina sene sa tabernaakulu, mu esaala ekina.
Vavaa empa eyo yaamanlaaya otekiwa, wahikhalavo yawuupuxerya etokotoko. Soolomoni aahikokhora nave aahivekela, ntoko munaweryaanyu omoona veerukuni va. ‘Naari mano erimu heri etokotoko mwawaakhwanela wii ewaakheleeni,’ aahi wa Yehova, ‘opwaha mwawiihai nki empa ela. Nyenya, nyuwo Muluku aka, khwoo, awiriyaneeni achwaanyu vavaa anavekelaaya mooluluwanya sa nipuro nla.’
Vaavaa Soolomoni aamalinhiiye, waahikhuruwa mooro wirimu nave waahipaha inama soothene sooveleeliwa ephepa. Nave empa eyo yaahisareya ni omwaleya wawaarya wa Yehova. Ela yaathoonyerya wii Yehova aari awiriyanaka, ni wii aahisiveliwa ni empa eyo nnivekelo na Soolomoni. Empa eyo yaahikhalanto vano nipuro nenlo achu yaalapelaayavo.
Mu elukuluku yincipale, Soolomoni aahilamulela mwamiruku, nave achu yaanahakalala. Vanonto, Soolomoni aahaathela athiyana ancipale a ilapo sikina, yaawo yahaamulapela Yehova. Mano munnamoona mmoha a yaawo alapelaka vamiithoni va yoophwaniherya eyo? Vookuchula vaya, awo yaahimweeriha wii Soolomoni alapeleketho miluku mikina. Mano vanonto moosuwela yeeyo yeerenyee? Soolomoni haapwahihenrye oweerela achu saphaama. Aaheera moonanara, nave achwaawo hiyaapwahihenrye ohakalala.
Yehova aahinanariwa ni Soolomoni nave aahi wa yoowo. ‘Kinahaala wooviiheryavo omwene ni omvaha muchu mukina. Nkeerano ela oryeene mukumi, nyenya mu olamulelo wa mwanaa. Nyenya, nkooviiheryavo achu oothene a omwenoowo.’ Hinkoni noone mummo seerelenyaaya.
1 Matharihelo 28:9-21; 29:1-9; 1 Mamwene 5:1-18; 2 Matharihelo 6:12-42; 7:1-5; 1 Mamwene 11:9-13.