MWAHA 70
Yona Ni Ehopa Etokotoko Eyo
NKAMOONEENI mulopwanoowo mmaahini. Owo ori mu yookachamiha, kahiyo? Ehopa ele enahaala ommirya! Mano moosuwela wii mulopwana owo taani? Nsina nawe ti Yona. Hinkoni noone mummo aivolihenryiye mu yookachamiha eyo.
Yona aari mulipa a miririmu a Yehova. Waari elukuluku vakhaani vachuli va okhwa wa mulipa a miririmu Elisa vavaa Yehova aalonchiiye wa Yona wii: ‘Rowa o epooma etokotoko eyo ya Niinevi. Oonanara wa achu a weiwo ori otokotoko vancipale, nave miyo kinachuna wii weyo oloceno sa yeeyo.’
Nyenya, Yona haachunne oyawo. Va nthowa nla, aanwenle pophoro yoowo aaya okinawo. Yehova haasiveliwe ni ochawa wa Yona. Vawihiihaa aaheriha echeku etokotoko. Yaari yakuru vancipale, ophiyerya wii pophoro anii amiryeye. Amarinyeryo yaahoova nave yaakhuwela wa miluku saya, evekaka yookhaviherya.
Vookuchula vaya, Yona aahi wa yaawo: ‘Kinamulapela Yehova, Muluku yoowo opanke erimu ni elapo yavathi. Nave kinamuchawa, wii kiheereno yeeyo Yehova okirummiiye.’ Amarinyero yaahikoha: ‘Mano nnaphwanela weera eheni wii echeku ela emaale?’
‘Mukirihele muniya, nave eniya eyo enahaala omaala,’ aahi Yona. Amarinyero hiyaachunne weerano eyo, nyenya echeku eyo yaahitepa, nave va nthowa nenla yaahimvonyerya Yona muniya. Echeku eyo yaahimaala navetho eniya yaahimaala.
Vavaa Yona aapwiinniiye mmaahini, aahimiryiwa ni ehopa etokotoko. Nyenya haakhwiye. Aahikhala mahiku mararu othana ni ohiyu mmirimani mwa ehopa eyo. Yona aari othanana vancipale nthowa na ohimwiiwelela Yehova oya o Niinevi. Mano moosuwela yeeyo owo eenriiye?
Yona aahivekela wa Yehova, avekaka okhaviheryiwa. Yehova aaheriha ehopeeyo omurapheya Yona vamokoni. Ovinyerya vavaa, Yona aahirowa o Niinevi. Mano ela henanihusiha ochuneya waya wa weerano yeeyo Yehova onanrumiiye?
Liivuru a m’Piipiliyani a Yona.