Kuxani Yootakiherya ya Alipa-miririmo—Yoona
1. Mikhalelo taani saphaama Yoona aareiyeno?
1 Tiheeni enarwa mmuupuweloni mwanyu vaavaa munamuupuwelaanyu mulipa miririmo Yona? Akina poti onoona ntoko mulipa woova nari awuuma murima. Nyenya, mwawooneya owo aahooniherya wiiyeviha, olipa murima, ni munepa wawiiveleela. Nnii niwerye hai okuxa “yotakiherya” ya mikhalelo sootikiniha sa Yoona?—Yak. 5:10.
2. Nnii ntakiherye hai wiiyeviha wa Yoona?
2 Wiiyeviha: Woopaceryani Yoona aachawela o makupa oohiyana a ekulucu aarummweiye. Eyo hiyaari yootikiniha nthowa nawi Asiiriya yaari oohooxa, nave Ninive iichaniwa “muceche wa oyeeha nikhami.” (Nah. 3:1-3) Mwawiihiiha, Yehova aamulakala Yoona, yoowo oonihenrye wiiyeviha moorweela wa waakhela orummwa vaavaa aavahiweiye ekari yanapiili. (Masi. 24:32; Yona 3:1-3) Naamwi okhooca wawe woopaceryani, owo aaheera yookhwela ya Yehova. (Mat. 21:28-31) Moolikana nri oolakelela olaleerya michaka yaphaama, naamwi wakhala wi noolakiwa nari nookhalano ekulucu yookacamiha?
3. Makhalelo taani a orummwa wanyu anachuneya olipa murima ni wiiveleela?
3 Olipa Murima ni Wiiveleela: Vaavaa Yoona aasuwenleiye wi yoothanla awe yoonanara yaahikacamiha okumi wa anamalapa, owo aahiiveleela okumi awe. (Yona 1:3, 4, 12) Voocharela, vaavaa aakhwanihenryeiye murici awe o Ninive, owo aaheeceeca mwawiiseela variyari va epooma, akhweya aavyaka nipuro naphaama wi alaleerye othoriha wa Yehova. Iho saari saweera, ohiya sa mulipa woova, nyenya sa mulipa miririmo oolipa murima a Muluku! (Yona 3:3, 4) Hanka vooloca sa hiyo olelo? Olipa murima woorweela wa Muluku ti woochuneya wi nivahe onamoona woolipa variyari va wiiciwa. (Saw. 4:29, 30) Wiiveleela ti woochuneya wi nimalihe elukuluku ni ichu mu orummwa.—Saw. 20:24
4. Ntakhara heeni nnaphwanelaahu omaliha elukuluku nuupuwelelaka yootakiherya yaphaama evahiwe ni alipa miririmo a Yehova?
4 Ekwaha yoothene munaalakhanyaanyu yaweereya vooloca sa alipa miririmo a Yehova, munahaala ophura wakhala wi munniisoona mukhatinyu mmakhalelo yaawo. Mwiikohe mukhatinyu: ‘Miyaano kaaya waakhulela hai? Kinii kitakiherye hai mikhalelo sawe saphaama mu okumi aka?’ (Ahe. 6:11, 12) Miyaha sa muhoolo mu Orummwa Wahu wa Omwene inahaala othokororya soohuserya sikina soochuneya seiyo nnaphwanelaahu ohuserya moorweela wa alipa miririmo oororomeleya a Yehova.