MWAHA 115
Paradaiso Ahihano Veelaponi Yavathi
NKAVARERYANI miri yoothene eyo yoorekama, ithutu sorera ni miako mitokotoko. Mano hiiri sorera? Nkamooneni mwaasana a namukona owo alyelaka mmatatani mwa mwaana owo. Nave nkaavareryeni amwacho awo ni akavalo eemenle vanikuwani vale. Mano munachuna okhala mu empa ya vanipuroni nawihiihaa?
Muluku onachuna wii nyuwo mukhale ni okumi wawiikhalelaru veelaponi yavathi, mparadaiso. Nave owo hanachuna wii nyuwo mwiicheliweke ntoko mummo achu aniicheliwaya olelo. Ela ti yeeyo Piipiliya onalakaniye wa yaawo enii ekhale mparadaiso ahihano owo: ‘Muluku anarwa akhala ni yaawo. Nave hevarwa-vakhalatho okhwa, nari wunla, nari sawichela. Ntakhara soopacerya iho soovira.’
Yesu onahaala othokororya wii orukunuwa wotikiniha wiiwo orwe. Mano moosuwela wii ti liini? Aayi, vachuli va ovihavo wawe onanara woothene ni oonanara oothene veelaponi yavathi. Muupuwele wii vavaa Yesu aariye veelaponi yavathi owo aahapenuxa achu mu irecha sa miloko yoothene, nave aahiphiyerya waaviiha alipa okhwa. Aaherano ela wii athoonyerye yeeyo onahaliiye weera veelaponi yavathi, ntoko Mwene a omwene wa Muluku.
Nkuupuwelelani mummo oniryaaya okhalele wotikiniha okhala mparadaiso ahihano veelaponi yavathi! Yesu, vamoha ni oothanliwa akina, onahaala olamulelaka wirimu. Oolamuleleene yaawo anahaala wathokororya oothene veelaponi yavathi, wii ekhale oohakalala. Hinkoni noone yeeyo nnaphwanelahu wera wii Muluku anivahe okumi woohimala mparadaiso awe ahihano owo.
Yawupulula 21:3, 4; 5:9, 10; 14:1-3.