Yohuserya 5

Asiinthamwene A Muluku Anahaala Okhala M’Paradaiso

Paradaiso hakhalaa ntoko elapo yela nnakhalaahumo hihano. Muluku haatchunne wii elapo yavathi ekhale yosareya ni sokachamiha, othanana, wiichela ni ohawa. Muholo, Muluku onahaala otatusha elapo yavathi okhala paradaiso. Mano Paradaiso yola onahaala okhala mwawihai? Noone yeyo Biblia onalochiiye.

Atchu aphama. Paradaiso onahaala okhala etchoko ya asiinthamwene a Muluku. Awo anahaala werelanaka itchu saphama mukina ni mukhwawe. Anahaala okhalaka mopharihana ni makhalelo aphama a Muluku.—Proverpio 2:21.

Waacha wa yolya. M’Paradaiso, horwa okhalamo etala. Biblia onii: “Mwilaponi’mmo munarwa-mukhala’mo olya munchipale.”—Salmo 72:16.

Ipa saphama ni muteko wohakalaliha. Mu elapo yavathi ya Paradaiso, etchoko eri yothene enahaala okhala ni empaya. Othene anahaala opharaka muteko yowo onahaala wavahaka ohakalala weparipari.—Yesaya 65:21-23.

Murechele mu elapo yothene. Atchu herwa enawanatho nari okhwa mu ikhocho. Masu a Muluku anii: “[Muluku] onnahíha ekhocho.”—Salmo 46:8, 9.

Okumi waphama. Biblia onnavelela nlakano: “Havo okhala [mu Paradaiso] onahaala olocha wii: ‘Kinamwiicheliwa.’” (Yesaya 33:24) Navetho horwa okhalamo oorakala, eevaasi, oohiwa, nari oohilocha.—Yesaya 35:5, 6.

Onahaala omala wiichela othanana ni okhwa. Masu a Muluku anii: “Hevarwa-vakhalatho okhwa; nave hevarwa-vakhalatho iyinlo, nari wunla, nari sawichela, ntakhara sopacherya iho sóvira.”—Yawupulula 21:4.

Atchu oonanara enarwa erimeela. Yehova onnavelela nlakano: “Volocha sa atchu oonanara, enarwa ekwasiwa velaponi; ni alipa amakhuche, enarwa epholiwavo.”—Proverpio 2:22.

Atchu enarwa esivelana nave enarwa echichimihana. Horwa okhalavotho yohikhala ekhaikhai, soohosha, nrima ni omwichani. Atchu anahaala okhala oopharihana nave anahaala okhalaka mopharihana ni makhalelo aphama a Muluku.—Yesaya 26:9.