MWAHA 20

Muloko Oreheryen’ye Mwawiihai?

Nikupa na Wimprimiiriwa

Yehova ti Muluku oorehereya. (1 Korinto 14:33) Tinthowa nene achu awe aryaaya oorehereya tho. Ti mwawiihai muloko Weekristu oreheryen’yaaya? Ti mwawiihai nneeraahu nikhaviherye?

1. Taani ori muru wa muloko?

“Kristu muru wa muloko.” (Éfeso 5:23) Orweela wirimu, owo onnahoolela miteko sa achu a Yehova orukurerya elapo yoothene. Yesu oomuthanla “namuteko ooromeleya ni a miruku”—nikuuru nikhaani na Akristu awiichwelavo omunepani asuweliwe tho ntoko Nikhuuru Noolamulela. (Mwaalakhanye Mateu 24:45-47.) Moolikana ni arummwa ni atokweene o Yerusalemu a mu nsana noopacerya, olelo tho Nikhuuru Noolamulela ninnahoolela miloko soothene orukurerya elapo. (Saweriwa T’arummwa 15:2) Nyenya alopwana ala tahi ahooleli a marehereryo ahu. Awo annamuhuserya Piipiliya wi esuwele yeeyo Yehova onachuneiye wi epake, nave annachariha ohoolela wa Yesu ni murima woothene.

2. Taani ari atokweene nave tuuvi ori murici aya?

Atokweene alopwana Eekristu awiichwelavo omunepani yaawo anahusiha epharihelaka Soorempwa nave annaakukhula achu a Yehova moorweela wa waakhaviherya ni waalipiha yaawo. Awo hanalimvwa wa nthowa na muteko aya. Moohiyana, annarumeela ‘moolakelela ntoko Muluku onakhweleiye. Yeerakano wi ehiwerye wiiphwanyeryavo echu, nto ni murima woothene.’ (1 Pedro 5:1, 2) Atokweene annakhaviheryiwa ni arummwa oorumeela, yaawo moovira wa elukuluku, anakhala oophwanelela orumeela ntoko atokweene.

Nikhuuru Noolamulela ninnaathanla atokweene akina wi ekhale ooweherya a ekulucu. Awo annaxekurya miloko soohiyanahiyana wi evahe ohoolela ni waalipiha anna ni arokora. Awo annaathanla atokweene ni arummwa oorumeela, yaawo anaakhwaniherya sooveka sa Mpiipiliyani.—1 Timóteo 3:1-10, 12; Tito 1:5-9.

3. Murici taani mmoha ti mmoha a Anamoona a Yehova oreiyeno?

Oothene mmulokoni ‘ennacicimiha nsina na Yehova’ moorweela wa opaka makupa mmithukumano sa muloko ni olaleerya mwawiiwanana ni mikhalelo saya.—Mwaalakhanye Salumu 148:12, 13, NN.

OHUSERYA MWAWIISEELA

Muhuserye wi Yesu muhooleli a mukhalelo taani, ti mwawiihai atokweene anacharihaaya yootakiherya awe, ni mukhalelo nneeraahu nimwiiwelele Yesu ni olapa ni atokweene.

4. Yesu muhooleli awiichuuwiha

Yesu onnanipakela nwopelo waphaama. Mwaalakhanye Mateu 11:28-30, nave muthokororye nikoho nla:

Yesu onachuna wi nooneke hai ohoolela wawe?

Atokweene anachariha hai yootakiherya ya Yesu? Moone EXILEMA.

EXILEMA: Anciãos prontamente ajudam os irmãos depois de um terremoto no Nepal (4:56)

Piipiliya onnahusiha mookwakwaleya mukhalelo atokweene anaphwanelaaya ophara muteko aya.

Mwaalakhanye Isaiya 32:2 ni 1 Pedro 5:1-3, nave voocharela muthokororye makoho ala:

Munoona hai voosuwela wi hiiha ntoko Yesu, atokweene anniilipiserya owiichuuwiha akina?
Mmikhalelo taani mikina atokweene anaphwanelaaya omutakiherya Yesu?

5. Atokweene anahusiha moorweela wa yootakiherya

Yesu onachuna wi atokweene yooneke hai muteko aya? Moone EXILEMA.

EXILEMA: Anciãos exercem a liderança (7:39)

Yesu oovahererya malakiheryo wa yaale anahoolela mmulokoni. Mwaalakhanye Mateu 23:8-12, nave voocharela muthokororye nikoho nla:

Malakiheryo taani ari Mpiipiliyani vooloca sa atokweene? Munoona wi ahooleli a ikerexa annachariha yeeyo Piipiliya onaloceiye?

A. Iruku: Mutokweene mmoha athokororyaka soothowa sawe soomunepani vamoha ni sa emusi awe. 1. Owo onnavekela ahaakumve omuhuserya Piipiliya. 2. Owo onnamuhusiha mwanawe a mwaamuthiyana nnikhaviheryo na amwaariye.

B. Mutokweene mmohamoha yoola vamoha ni amwaariye annamuxekurya murokora a mmulokoni yoowo oniiceliwa ari oxipitale.

Atokweene annalipiha onthamwene aya ni Yehova nave annakhaviherya ichoko saya weerano emohamoha
Atokweene annaakhapelela oothene a mmulokoni
Atokweene annalaleerya moohihiyererya
Atokweene ahusiha. Nave tho annakhaviherya mu weeliha empa ya Omwene ni opaka miteko mikina

6. Nnanwerya olapa ni atokweene

Piipiliya onnanivaha nthowa noochuneya na olapa vamoha ni atokweene. Mwaalakhanye Ahebri 13:17, nave voocharela muthokororye makoho ala:

Ntakhara heeni Piipiliya onaloceiye wi hiyaano nnaphwanela owiiwelela ni murima woothene yaale anahoolela? Nyuwaano munoona hai?

Mwaalakhanye Luka 16:10, nave voocharela muthokororye nikoho nla:

Ntakhara heeni nnaphwanelaahu owiiwelela atokweene ni murima woothene naamwi mu ichu ikhaani?

ACHU AKINA ANI: “Tahi woochuneya okhala mmalapelo oorehereya.”

Ntakhara heeni munoonaanyu wi ti woochuneya opaka makupa a mmulokoni?

MUKWASU

Yesu muru wa muloko. Ninnahakalala olapa ni atokweene yaawo anahooleliwa ni yoowo woona wi awo annaniichuuwiha ni onihusiha orweela mwa yootakiherya aya.