MWAHA WOOHUSERYA 36
NCIPO 103 Asitokweene a Muloko—Yoovaha ya Yehova
“Awiichane Atokweene”
“Awiichane atokweene a mmulokoni.”—TIY. 5:14.
IPONTU SA VASULU
Mphwanye nikhaviheryo na atokweene a mmulokoni vaavaa munachunaanyu.
1. Yehova oonihenrye hai wi ipucepuche sawe ti sasisapo wa yene?
IPUCEPUCHE sa Yehova ti soochuneya wa yene. Owo ookula nnikhami na Yesu nave ohaathanla atokweene a mmulokoni wi ekhapeleleke ipucepuche Sawe. (Saw. 20:28) Muluku onachuna wi ipucepuche sawe sikhalihiweke mooreera murima. Atokweene annachariha sooleeliherya sa Yesu wi ekhaviherye ipucepuche otitelela olipiha onthamwene aya wawaacameleya ni Yehova.—Yes. 32:1, 2.
2. Taani Yehova onaavaheiye esisapo yavameekhaaya? (Esekiyeli 34:15, 16)
2 Yehova onnuukhuwaxa ni ipucepuche sawe soothene, nave onnakhapelela phaama seiho sinahooxeya. Orweela wa atokweene, owo onnaakhaviherya yaale anahooxeya mmukhalelo woomunepani. (Mwaalakhanye Esekiyeli 34:15, 16.) Mwawiihiiha, owo onachuna wi naavyeke nikhaviheryo vaavaa nnachunaahu. Owo tahi pahiru onachuna wi nivekeleke wa yoowo nivekaka nikhaviheryo, nyenya tho onachuna wi nivekeke wa “akukhula ni ahusiha” a mmulokoni nikhaviheryo vaavaa nnachunaahu.—Afi. 4:11, 12.
3. Ti mwawiihai oothene nnahaalahu ophura?
3 Mmwaha yoola, nnahaala ohuserya mukhalelo Yehova onaaphariheleiye atokweene wi evahe nikhaviheryo noomunepani wa yaale enachuna. Nnahaala waakhula makoho ala: Elukuluku taani nnaphwanelaahu oveka nikhaviheryo wa atokweene? Ntakhara heeni nnaphwanelaahu weerano yeeyo? Nave awo ananikhaviherya hai? Naamwi nihihoolelaka makacamiho, maakhulo a makoho yaala ananwerya waaceererya othamalela wahu marehereryo a Muluku ni ororomela wi ananwerya ovuluxa okumi ahu.
ELUKULUKU TAANI NNAPHWANELAAHU ‘OWIICHANA ATOKWEENE’?
4. Ntakhara heeni nnaphiyeryaahu makuchuwelo awi Tiyako 5:14-16, 19, 20 onaloca sa ereca yoomunepani? (Moone tho iruku.)
4 Oohuserya Tiyaku oothariha mukhalelo Yehova onaaphariheleiye atokweene wi enikhaviherye, ariki: “Apwanne ookhala mwa nyuwo oniiceliwa? Awiichane atokweene a mmulokoni.” (Mwaalakhanye Tiyaku 5:14-16, 19, 20.) Mwaha ola, onooniherya wi Tiyaku onaloca sa wiiceliwa woomunepani. Ntoko yootakiherya, mulipa awiiceliwa onaceenyeriwa owiichana atokweene ohiya matotore. Ohiya yeeyoru, Tiyaku onnathariha wi muchu yoowo oniiceliwa onnapenuwa vaavaa soocheka sawe sinakhurumuweliwaaya. Mmikhalelo mikina, meerelo oochuneya a oloola ereca yoomunepani enamulikana tho ni meerelo ooloola a ereca yoomwiilini. Vaavaa nniiceliwaahu mmukhalelo woomwiilini ninnaya wa totore nimuleela echu enanivira, nave ninnachariha sooleeliherya sawe. Mmukhalelo mmohamoha, Vaavaa nniiceliwaahu makupa oomunepani, ninnachimakela wa atokweene, nlokoha nikacamiho nahu nave nnakhala mwawiiwanana ni malakiheryo a Mpiipiliyani yaawo naakhenlaahu.
Naawiiceliwaka mmukhalelo woomwiilini ninnaya wa totore; mmukhalelo mmohamoha, vaavaa tho nniiceliwaahu omunepani nnaphwanela owaacamela atokweene (Moone eparakrafu 4)
5. Nnii niwerye hai osuwela wakhala wi ninnakhala vayawoopiha ya oceecheya omunepani?
5 Mu Tiyaku ekapitulu 5, onnanceenyerya owaavya atokweene ilukuluku soothene vaavaa nnoonaahu wi ninnaceecheya makupa ahu oomunepani. Nyenya ti woochuneyaxa oveka nikhaviheryo wa atokweene nihaakumve oyeleela weemereryiwa wahu ni Yehova! Mukhale oororomeleya wa nyuwo mukhatiinyu. Piipiliya onnanleela wi naahikhalano ephoole nnanwerya wuupuwelaka wi nookhalano weemereryiwa ni Yehova nyenya nihirino. (Tiy. 1:22) Ti yeeyo yeeren’ye ni Akristu a muloko wo Sarti nyenya Yesu aahaaleela wi hiyaamuhakalaliha Yehova. (Wup. 3:1, 2) Mukhalelo mmoha wa woona ekumi ahu yoomunepani ori olikanyiha mvai ahu mmalapelo hiihaano ni mukhalelo noonaahu khalai. (Wup. 2:4, 5) Nnaphwanela wiikoha: ‘Kinnasiveliwa omwaalakhanya Piipiliya ni wuupuwelela mwawiixeela ntoko keeraaka khalai? Kinniirehererya ni ophwanyeya mmithukumano soothene? Mvai aka ntakhara muteko woolaleerya wooriirya? Apwanne kinatikitheryeya mu ikhorowa opwaha khalai?’ Wakhala wi maakhulo a makoho yaala tawi aai, eyo enooniherya wi mooceecheya nave tiyawooneya wi eyo enahaala otepa wakhala wi nyuwaano himweenrevo echu. Wakhala wi hannawerya olipiha onthamwene ahu ni Yehova mukhatiihu naari waakhanle wi noopaka echu yeeyo nsuwenlaahu wi Yehova haneemererya, nnaphwanela oveka nikhaviheryo wa atokweene.
6. Tiheeni yaale epanke yoocheka etokweene enaphwanelaaya weera?
6 Mweeparipari, yaawo epanke yoocheka etokweene yeeyo enahaala oweeriha oviihiwa mmulokoni awo enaphwanela waaleela atokweene. (1 Ako. 5:11-13) Muchu yoowo opanke yoocheka etokweene hanaphwanela orehererya onthamwene awe ni Yehova mukhateiye. Wi nikhurumuweliwe ni Yehova moorweela wa mukucho wa woopola nnaphwanela wooniherya “miteko seiho inooniherya orukunuxa murima.” (Saw. 26:20) Nave mukhalelo mmoha wa wooniherya yeeyo ori waaleela atokweene.
7. Achu taani tho akina enachuna nikhaviheryo na atokweene?
7 Atokweene tahi wi pahiru enaakhaviherya yaale epanke yoocheka etokweene; awo tho ennaakhaviherya yaale eceechen’ye omunepani. (Saw. 20:35) Ntoko yootakiherya, munanwerya woova oyeleela owaniha wanyu ntakhara soochuna soonanara. Onanwerya okhala woovila wa nyuwaano owaniha ntakhara nchuno nanyu noonanara waakhanle wi khalai muhaakumve okhala Mukristu, mwaanalya mirece, woona epwitikiri, naari ocapaheya. Mwawiihiiha nyuwaano hamunaphwanela ovootha makacamiho yaala mukhatiinyu. Nyuwaano munanwerya oloca ni mutokweene yoowo munamuroromelaanyu wi onahaala woowiriyanaani moopwacha, woovahaani ikano ni woororomelihaani wi Yehova onnahakalalaxa owoonaani mutitelelaka owaniha ni nchuno nanyu noonanara. (Ekl. 4:12) Akhweya munanwerya oceecheya nthowa owaniha wanyu wiiliwiili, nyenya atokweene ananwerya owuupuxeryaani wi Yehova onnahakalala nthowa na oveka nikhaviheryo, nave wi mwa awiiyeviha, hamunaroromela ikuru sanyu, nyenya tho munnapwacha moonelo wa Yehova ni munnachuna omuhakalaliha.—1 Ako. 10:12.
8. Soohesa taani nihinaphwanelaahu waaleela atokweene? Mutharihe
8 Hannaphwanela waaleelaka atokweene sawuukhula sahu soothene soomunepani. Ntoko yootakiherya, nyuwaano munanwerya oloca masu oonyeenyeiha wa munna naari murokora, ophiyerya okhala oonyeenyeyaxa ni yaawo. Ohiya oya wa atokweene, nyuwaano munanwerya opharihela ekano ya Yesu ya opaka murecele ni munna naari murokora. (Mat. 5:23, 24) Nyuwaano munanwerya ohuserya soolaleeryiwa sahu wi muhuserye okhala awiichacala, oopixa murima ni wooniherya wiihiiha. Eparipari wi, wakhala wi nyuwaano hanwenrye orehererya nikacamiho nanyu, munanwerya oveka nikhaviheryo na atokweene. Vaavaa Evotiya ni Sintike yaahiweryaaya orehererya nikacamiho naya murummwa Paulo aahimveka munna a mmulokoni wi aakhaviherye. Mmukhalelo mmohamoha mutokweene a muloko anyu onanwerya wookhaviheryaani.—Afi. 4:2, 3.
NTAKHARA HEENI NNAPHWANELAAHU OWIICHANA ATOKWEENE?
9. Ntakhara heeni hinnaphwanela weemererya wi wuuliwa muru onihiihe oveka nikhaviheryo na atokweene? (Masiposipo 28:13)
9 Ninnachuna nroromelo ni olipa murima wi niveke nikhaviheryo wakhala wi noopaka yoocheka etokweene, naari vaavaa nniisoonaahu wi hannawerya owaniha ni nchuno nahu noonanara. Hannaphwanela weemererya wi wuuliwa wahu muru onihiihe owiichana atokweene. Ntakhara heeni? Nthowa nawi moorweela wa wiiwelela marehereryo a Yehova, ninnooniherya wi ninnamuroromela yoowo ni mahusiheryo awe wi nititelele okhala oolipa mu nroromelo. Noosuwela wi ninnachuna nikhaviheryo wi ntitelele weera yeeyo eri yaphaama. (Sal. 94:18) Napaka yoocheka, nnamwaakhela ikharari sa Muluku wakhala wi noolokoha nave tho ncharuwa soocheka sahu.—Mwaalakhanye Masiposipo 28:13.
10. Tiheeni enahaala weereya wakhala wi noheererya ovitha yoocheka ahu?
10 Ninnakhalano mareeliho mancipale vaavaa nnalokohaahu soocheka sahu wa atokweene a mmulokoni, nto wakhala wi noovitha yoocheka ahu nnamwaaceererya mwaha. Vaavaa mwene Tavite erenryeiye ovitha yoocheka awe, aahihooxeya omunepani, mmuupuweloni ophiyerya tho omwiilini. (Sal. 32:3-5) Hiiha ntoko ereca enatepaaya yahinalooliwa, nikacamiho tho noomunepani ninnatepa naahinathokororyiwa. Yehova onniiwexexa yeeyo, ti nthowa nene owo onaniwopeiye wi “nirehererye mwaha” yoowo moorweela wa marehereryo yaawo owo otikithenryeiye wi anipenuxe omunepani.—Yes. 1:5, 6, 18, TNM.
11. Akina enahaala ovoloweliwa hai waakhala wi noovitha yoocheka etokweene?
11 Wakhala wi noovitha yoocheka etokweene, achu akina enanwerya ohooxeya. Nave tho nnahaala ohiiha munepa wa Muluku ntakhara muloko woothene, ni waakanyerya murecele wa anna ni arokora ahu. (Aef. 4:30) Mmukhalelo mmohamoha nasuwela wi ookhala mmulokoni opanke yoocheka etokweene, nnaphwanela omuceenyerya wi aaleele atokweene sa mwaha yoowo.a Ovitha yoocheka etokweene ya muchu mukina ninnakhalano tho nthowa. (Onam. 5:1) Omusivela Yehova onamuniceenyerya waaleela atokweene wakhala wi muchu mukina oopaka yoocheka etokweene. Neerano yeeyo, nnahaala okhapelela muloko nave tho nnahaala omukhaviherya yoowo ochenke okhalano onthamwene waphaama ni Yehova wanaawiili.
ATOKWEENE ENANIKHAVIHERYA HAI?
12. Atokweene enaakhaviherya hai yaale eceechen’ye omunepani?
12 Atokweene ennavyakihiwa wi yaakhaviheryeke yaale eceechen’ye omunepani. (1 Ate. 5:14) Mwacheka, atokweene enanwerya woopakelani makoho wi ‘erike’ muupuwelo anyu ni wiiwexexa mukhalelo muniisoonaanyu. (Mas. 20:5) Onanwerya okhala woovila oloca ni atokweene, akhweya nthowa na wuuliwa muru oloca sa yeeyo yeeren’ye. Nyenya nyuwaano munahaala waakhaviherya wakhala wi mohaaleela nikacamiho munahoolelaanyu. Muhoove wi masu anyu enahaala okhala ntoko ‘oohuupuweleleya.’ (Yupu 6:3) Atokweene hiyaakuvela othoriha mwaha anyu. Ohiya yeeyo, awo enahaala woowiriyanaani moopwacha wi esuwele soothene sinavolowelavo ehaakumve ovahererya ikano sa Mpiipiliyani. (Mas. 18:13) Awo ennasuwela wi okhapelela epucepuche onnamaliha elukuluku nave wi hewerya ovahererya nikhaviheryo noophwanelela pahiru mu ovaanela omoha.
13. Atokweene eni enikhaviherye hai moorweela wa mavekelo aya ni malakiheryo a Mpiipiliyani? (Moone tho iruku.)
13 Atokweene henachuna waaceererya othanana wanyu nthowa na yeeyo mpankaanyu. Ohiya yeeyo awo enahaala woovekelelaani. Akhweya munanwerya otikhiniheya ni “ikuru sa okhaviherya” seiho owerya wa mavekelo aya oryaayano. Nikhaviheryo naya ennaphitaanyeryavo tho ‘woomiinelaani makhurwa [nyuwaano] mu nsina na Yehova.’ (Tiy. 5:14-16) “Makhurwa” yaala inaahiwa iparipari sa masu a Muluku. Moorweela wa ompharihela phaama Piipiliya, atokweene enanwerya woomaalihaani ni woolipihaani yookhaviheryakaani orehererya onthamwene anyu ni Yehova. (Yes. 57:18) Malakiheryo a Mpiipiliyani awo enakawanaaya ni nyuwaano, enanwerya olipiha olakelela wanyu wa otitelela weera yeeyo eri yaphaama. Moorweela wa yaawo nyuwaano munanwerya wiiwa nsu na Yehova nooleelakaani wi: “Ephiro ti ela. Mweeceke mwemmo.”—Yes. 30:21, TNM.
Atokweene ennampharihela Piipiliya wi yaamaalihe ni waalipiha awiiceliwa (Moone iparakrafu 13-14)
14. Mwawiiwanana ni Akalatiya 6:1, Atokweene enamukhaviherya hai muchu ori oothene yoowo ‘onapheruwa’? (Moone tho iruku.)
14 Mwaalakhanye Akalatiya 6:1. Vaavaa Mukristu onapaceryeiye “opheruwa” owo haneeca mwawiiwanana ni malamulo awookololowa a Yehova. Opheruwa onanwerya otaphulela ochekela nlamulo naari ochekela nlamulo na Muluku moopwahaxa. Atokweene Eekristu eceenyeriwaka ni osivela ‘enneererya omukhaviherya muchu yoowo mmunepa wawiichacala.’ Masu Eekiriki etaphuleliwe awi “orehererya” enanwerya otaphulela okookiherya nikhuva mmapuro aya wi nihinanare. Hiiha ntoko totore amavyakelo oniilipixeryeiye openuxa nikhuva nnyaanyen’ye nyenya ni wiicela wa vakhaani, atokweene tho enatikitheryeya mu openuxa ereca ahu yoomunepani ehaacerenryevo wiicela wahu. Awo tho aavyakihiwa ‘wiivareryela aneene meekhaaya.’ Vaavaa enanikhaviheryaaya wookolola inaani sahu, atokweene ennasuwela wi awo toohiphaameya nave ennahesa. Awo heniisoona okhala avasuluxa naari awaapwaha akina. Ohiya yeeyo, awo enniilipixerya okhala awiiyeviha ni aniphwanya.—1 Pet. 3:8.
15. Tiheeni nnaphwanelaahu weera wakhala wi nookhalano nikacamiho?
15 Nnaphwanela waaroromelaka atokweene a muloko ahu. Awo aavyakihiwa wi ekhapeleleke miyaha sahu soovitheya, wi ikano saya ithipeleyeke Mpiipiliyani ohiya mu miyoonelo saya, nave tho wi enikhaviheryeke oteexa sawuukhula sahu. (Mas. 11:13; Aka. 6:2) Mikhalelo ni saweereya saya ti soohiyana, nyenya nnanwerya okhala ootaphuwa ovaanela ni mutokweene vyakala nakhalano nikacamiho. Ti yawooneya wi hannaphwanela otitelela oveka ikano wa atokweene oohiyanahiyana niweheryaka wi mmoha a yaawo anileele echu yaweera. Neerano yeeyo, nnamukhala ntoko yaale aneemererya ‘oneeniwa owaruni’ ohiya ohuserya “mahusiheryo aphaama” a Masu a Muluku. (2 Tim. 4:3) Vaavaa nnamuleelaahu mutokweene mmoha nikacamiho, owo onanwerya onikoha waakhanle wi noovaanela ni atokweene akina vooloca sa yeeyo nave ekano taani awo anivanhaaya. Nyenya wiiyeviha onammweeriha oveka nikhaviheryo wa atokweene akina.—Mas. 13:10.
ORI MURICI AHU
16. Murici taani muchu ti muchu a hiyo oreiyeno?
16 Naamwi atokweene eniwehereryaka ntoko ipucepuche sa Muluku, awo henanleela echu ya weera. Mmoha ti mmoha a hiyo nookhalano murici wa omulapa Muluku. Nnaphwanela omwaakhula Muluku orweela mmasu ahu ni saweera. Nave owo onahaala onikhaviherya opaka soolakelela mwa miruku ni otitelela okhala oororomeleya wa yoowo. (Aro. 14:12) Ti nthowa nene atokweene ehinanileelaaya echu ya weera, nave ohiya yeeyo, ennampharihela Piipiliya wi enikhaviherye wiiwexexa yeeyo Yehova onuupuweleiye vooloca sa mwaha nave ennanihiya wi nipake yoolakelela mukhatiihu. Moorweela wa ochariha ikano sinathipeleya Mpiipiliyani, nnanwerya ovyakiha ‘owerya wahu wa wiiwexexa’ wi nipakeke soolakelela sa miruku.—Ahe. 5:14.
17. Teevi enaphwanela okhala yoolakelela ahu?
17 Ekari etokweene nryaahuno ya okhala ipucepuche sa Yehova. Yehova oomurumiha “mukukhula aphaama,” Yesu, ntoko yawoopola ntakhara hiyo wi niwerye okhalano ekari ya okumi woohimala. (Yoh. 10:11) Orweela wa atokweene a mmuloko Weekristu, Yehova ohaakhwaniherya yoororomeliha awe: “Kinamonnyaani akukhula yaawo anahaala weerakano ichu mwawiiwanana ni yookhwela aka, nave awo anamoocelekhelakaani ni masuwelelo vamoha ni wiiwexexa.” (Yer. 3:15, TNM) Wakhala wi nri ooceecheya naari awiiceliwa omunepani, hannaphwanela woovelela oveka nikhaviheryo wa atokweene. Nikhale oolakelela okumihavo mphurelo wa soovaha sa Yehova sa atokweene a mmulokoni.
NCIPO 31 Mweeceke ni Muluku!
a Wakhala wi nyuwaano moomvaha elukuluku yawaakhwanela, nyenya owo ahaaleela atokweene, nyuwaano munaphwanela waaleela yeeyo musuwenlaanyu, nthowa nawi munachuna okhala oororomeleya wa Yehova.