MWAHA WA EKAAPA | ANAMOONA A YEHOVA TAANI?
Muteko ahu onaliveliwa hai?
Iyaakha soothene, ninnaapaka nave ninnaakawa Apiipiliya ni soolaleeryiwa soorweela Mpiipiliya macikhwi mancipale. Ninnateka nave ninnarehererya ifiliyale naari ipa onapakiwamo aliivuru orukurerya elapo yoothene. Miloko mincipale sinnathukumana mmapuro oophwaneliwa aniichaniwa Ipa sa Omwene. Taani onalivela soothene seiya?
Muteko ahu onaliveliwa ni sooveleela soochuna. (2 Korinto 9:7) Mu 1879 erevista A Torre de Vigia de Sião [olelo Mulipeleli] yaaloca: “Ninnaroromela nikhaviheryo na YEHOVA, nave woona wi ti hiiha hori woochuneya oveka nikhaviheryo na achu.” Hinnoovelela ochariha meerelo yaawo.
Sooveleela sinnarumihiwa o efiliyale naari mu ekaaxa ya sooveleela yeeyo enaphwanyeya mu Ipa sa Omwene. Nto hiyaano hinnaveka ikhorowa naari oveka oliviwa nthowa na muteko ahu naari soolaleeryiwa sahu. Hinnaliviwa wi nlaleerye, wi nihusihe mmulokoni naari wi nteke mapuro a malapelo. Opwaha soothene, Yesu aaloca: “Mwakhenle mahalene, nvaheketho mahalene.” (Mateu 10:8) Oothene yaale analapa mu ifiliyale sahu naari o nipuro nahu ntokweene, ophitaanyerya ale anapaka makupa a Nikhuuru Noolamulela na Anamoona a Yehova, hanaliviwa.
Ikhorowa iho sinnaphariheliwa tho wi ekhaviheryiwe achu vaavaa enakhumelelaaya epahu. Akiristu akhalai yaanahakalala waakhaviherya yaale yaahooxeya ni epahu. (Aroma 15:26) Moolikana, ninnaakhaviherya awuukhuwa moorweela wa oteka ipa saya ni mapuro a malapelo ni moorweela wa ovaha yoolya, soowara ni murece.
[Yooleeliherya va epaaxina 6]
“Ntoko eneereyaaya ni miteko soothene sa Anamoona a Yehova, ikhorowa sinaveleeliwa moochuna, muchu ti muchu onnalakelela waaca wa ikhorowa onachuneiye ovaha.”—Olamulelo wa Europa wa Ophwanelela wa Achu, 2011
[Ekaaxa va epaaxina 6]
Moone exilema Tufão nas Filipinas: A fé supera dificuldades mu site www.jw.org/pt. (Muye va QUEM SOMOS > ATIVIDADES)