MWAHA WA EKAAPA | MULUKU ONOONA HAI IKHOCO?

Muluku Oona Hai Ikhoco Mmahiku Akhalai?

Achu yaanahooxiwa. Wiiliwiili yaanavekela wa Muluku wi awoopole, nyenya haarivo muchu wi aakhaviherye. Achu ene yaari Aisarayeli, achu a Muluku a mahiku akhalai. Amwiicani yaari a nloko na o Yiikuputu. (Mukwaha 1:13, 14) Mu iyaakha sincipale, Aisarayeli yaananweherya Muluku wi awoopole mmatani mwa Ayiikuputu. Voocharela yaaphiya elukuluku wi Muluku eerevo echu. (Mukwaha 3:7-10) Piipiliya onnooniherya wi Muluku mwaneene taawana ni Ayiikuputu. Owo aamutoloxa Yiikuputu ni ipahu khumi nave voocharela amwiipha mwene a o Yiikuputu mu Eniya Yooxeerya. (Salumu 136:15) Yehova Muluku aahooniherya okhala “mukhotxho” wi awoopole achu awe.​—Mukwaha 15:3, 4.

Nthowa na Muluku owana ni Ayiikuputu ennooniherya wi owo haniica ikhoco soothene. Mu elukuluku ekina, owo aaweemererya achu awe owana. Ntoko yootakiherya, aaweemererya owana ni Akaanani, yaawo yaari oopwaalu. (Malamulo 9:5; 20:17, 18) Aamuhoolela Mwene Tavite owana ni Afilisti. Muluku aamvaha mavyakelo a owana yaawo yaamukhavihenrye ovootha.​—2 Samuwele 5:17-25.

Saweereya seiya sa Mpiipiliyani sinooniherya wi vaavaa Aisarayeli yaahooxiwaaya, Muluku anaweemererya owana wi awoopole achu awe ni okhapelela malapelo eeparipari. Nyenya moone makhalelo mararu oochuneya anacharela vooloca sa ikhoco saahooleliwa ni Muluku:

1. MULUKU AANAMUTHANLA TAANI AAPHWANELA OWANIHA. Mu elukuluku emoha Muluku aaloca ni Aisarayeli: “Tahi nyuwano muni n’wane ni yawo.” Nthowa nene? Muluku mwaneene ahaala owana ntakhara yaawo. (2 Matharihelo 20:17; 32:7, 8) Owo aaheerano hiiha mu ikwaha sincipale, ntoko elukuluku elociwe wuupaceryani wa mwaha yoola. Vakina vaya, Muluku aanaalamulela achu awe owana mu ikhoco seiyo owo eemereryeiye, ntoko, seiyo saaphitaanyerya waakiha Elapo ya Nlakano.​—Malamulo 7:1, 2; Yosuwa 10:40.

2. MULUKU AANALOCA ELUKULUKU EKHOCO YAAHAALAAYA WEEREYA. Akapuro a Muluku yaanaweherya moopixa murima elukuluku yoophwanelela Muluku aahaaleiye owana ni amwiicani. Nlelo awo hiyaaphwanela owana ekhoco. Wakhala wi aawana, Muluku haakhaviherya. Chiryene, Piipiliya onnooniherya wi vaavaa Aisarayeli yaawanaaya ekhoco eheemereryiwe ni Muluku, sookhumelela sene saakhala soothananiha.a

3. MULUKU HANASIVELIWA NI OKHWA WA ACHU OOPWAALU. Yehova Muluku Ehime ya okumi ni Mpatuxa aachu oothene. (Salumu 36:9) Mwawiihiiha, owo hanachuna owoona achu ekhwaaka. Moohiciha, aakhalavo achu oopwaalu anawiipha akina. (Salumu 37:12, 14) Khalai wi amalihe onanara, Muluku aaneemererya ekhoco ni amwiicani. Nave mu iyaakha soothene owo aaweemerenryeiye Aisarayeli owana, owo aari “òrèra murima” ni “òlekela onyènyeya” ni amwiicani a Aisarayeli. (Salumu 86:15) Ntoko yootakiherya, owo aalamulela wi Aisarayeli ehakumve okuxa epooma, awo yaaphwanela “olotxa ni atxhu sa muretxhele,” wi yaavahe anamakhala elukuluku ya otoroka mukhalelo aya ni osepa owana. (Malamulo 20:10-13) Mmukhalelo yoola, Muluku ohooniherya wi owo ‘hanasiveliwaru mano omona mutxhu ònarara murima akhwaka nto onatxhuna omona ahin’ye mukhalelo awe wonanara ni akhanle.’​—Ezekiyeli 33:11, 14-16.b

Noomala woona wi mmahiku akhalai, Muluku oona ikhoco ntoko mukhalelo wa omaliha onanara ni amwiicani. Nyenya aari Muluku​—ohiya achu​—aaloca elukuluku taani ekhoco yaahaalaaya weereya ni taani aaya owaniha. Apwanne Muluku aamusiveliwa ni ikhoco? Hooye. Hiihaano owo onniica nlala. (Salumu 11:5) Apwanne moonelo wa Muluku vooloca sa ikhoco waatorokeya vaavaa Mwanawe, Yesu Kiristu aapaceryinheiye muteko awe mu nsana noopacerya?

[Masu a vathi]