Makupa Ookhaviherya mu Orummwa Wahu
1. Makupa “Uma conversa sobre a Bíblia” arino soolakelela taani piili?
1 Mu elukuluku ni elukuluku, A Sentinela a vanlakani onnakhalano makupa “Uma conversa sobre a Bíblia.” Makupa ala aakhalano soolakelela piili—operekha soohusiha sa Piipiliya mmakhalelo aphaama nave wi enoonihe moota wa oloca mwa miruku mu miyaha mikina. (1 Pet. 3:15) Nnahaala opharihela hai phaama miyaha seiya?
2. Nnii nipharihele hai makupa a miyaha iha mu orummwa wahu?
2 Mpharihele Awo mu Orummwa: Nyuwano poti okuha irevista sa A Sentinela seiyo irino mwaha onaphitaanyerya makupa yaala. Vaavaa namakhala, muchu onachuna, nari oohuserya a Piipiliya onapakeiye nikoho nari wooniherya ovaanya yoowo onaphwanyeya mu miyaha seiya, mumvahe owo ekoopiya ya mwaha yoowo nave mwiivahe wi muthokororye. Wakhala wi himwaanono erevista erino mwaha yoowo, akhweya nyuwano poti okumiha mu jw.org.
3. Munii muthokororye hai nikupa nimoha na miyaha seiha ni namakhala?
3 Munii muthokororye hai nikupa nimoha na miyaha seiha ni muchu? Akina annanwopa muchu wi aalakhanye moovuwa masu a namakhala, vaavaa alipa oolaleerya anaalakhanyaaya masu a Namoona. Muchu yoowo onathokororya ovaanela iwo poti omvolowela ntakhara eyo enneeriha wi muchu aalikhele soororomela sahu mmukhalelo ohinahaala omweeriha okhala oonyeenyeya.—Malam. 32:2.
4. Nnii nipharihele hai miyaha sa makupa yaala wi niivyakihe mukhatihu?
4 Mwiivyakihe Mukhatinyu ni Akina: Vaavaa munaalakhanyaanyu miyaha seiha, muthokororye soorempwa, maphwanaphwaniho, ni moota wa woopeleliha. Moone mukhalelo wa miseelo. Vano mweererye ovaanela woophwanaphwana mu orummwa wanyu. (Masi. 1:5; 9:9) Murokora mmoha ooloca, “Waalakhanya miyaha seiya ori ntoko ohuserya moorweela wa nthamwene ori piyoneero ‘oophaameya’—yoowo wiiliwiili onasuwela echu yaphaama ya aloce!”
5. Nnii naakhaviherye hai oohuserya ahu a Piipiliya wi yiireherye mu orummwa?
5 Nyuwano poti opharihela sootakiherya seiya irempwe wi mwaakhaviherye oohuserya anyu a Piipiliya wi yiireherye mu orummwa. Mwaalakhanye miseelo vamoha, mmuhiye oohuserya wi apake nikupa na mulaleeryi. Mmukhalelo yoola, oohuserya a Piipiliya poti ohuserya oloca soororomela saya mwa miruku. (Akol. 4:6) Mweeparipari, miyaha seiya makhalelo mamoha yaawo Yehova onanikhaviheryeiye o “khwaniheryaka” orummwa wahu.—2 Tim. 4:5.