Mweerihe wi Mukonelo Ekhale Elukuluku Yoohakalaliha!
1. Tuuvi ori mukhalelo mmoha wa wunnuwiha ohakalala wahu mu elukuluku ya Mukonelo?
1 Munnachuna wunnuwiha ohakalala wanyu mu Marsu, Apirili, ni Maiyu? Mukhalelo mmoha wa weerano hiiha ori waacererya orummwa wanyu ni, wakhala wooweryeya opiyoneero wookhaviherya. Ela enahaala wunnuwiha hai ohakalala wanyu?
2. Ti mwawiihai waaceererya orummwa wahu onnunnuwiha ohakalala?
2 Munnuwihe Ohakalala Wanyu: Yehova onipatunxe ni owerya wa opuha ohakalala onarweela mu omurumeela yoowo vaava nnahakalalihaahu yoochuna ahu yoomunepani. (Mat. 5:3) Owo tho onipatunxe mmukhalelo wi niphwanyeke ohakalala onarweela mu waakhaviherya akina. (Saweriwa Tarummwa 20:35) Orummwa onnanikhaviherya weerano soopiili—omurumeela Muluku ni waakhaviherya akina. Nna nthowa nene nawi waaceererya orummwa onnaruuha ohakalala otokweene. Mwawaacererya, vaavaa nnalaleeryaahu vancipale, ovyaka wahu onnaacereryeya. Vaava nnatekaahu ovyaka wahu, ninnaacererya ororomela wahu nave ninnavukula woova. Hiyaano nnahaala okhalano ikari sincipale sa ovaha onamoona ni opaceryiha soohuserya sa Piipiliya. Ti yeela eneeriha wi orummwa wahu okhale woohakalalihaxa.
3. Ntakhara heeni Março ni April miyeeri savameekhaaya sa okhala piyoneero ookhaviherya?
3 Marsu ni Apirili sinahaala okhala miyeeri savameekhaaya sa okhala piyoneero ookhaviherya nthowa nawi hiyaano poti othanla marehereryo a iwora 30 naari 50. Mwawaacererya, opacerya, 22 a Marsu, ophiyerya 14 a Apirili, hiyaano nnahaala opaka muteko woohakalaliha wa waawopa akina orwa o Mukonelo. Muloko onahaala okhala woolipiheya moorweela wa olapa “ni murima mmoha” wi omalihe ekulucu aya mu elukuluku yawemereriwa—Sof. 3:9.
4. Wakhala wi ninnachuna opiyoneero wookhaviherya, tiheeni nnaphwanelaahu weera?
4 Mwiirehererye Hiihaano: Waakhanle wi nyuwano hamwaakumve weerano, mwaavye elukuluku wi mvarerye miteko sanyu nave moone otoroka taani munaphwanelaanyu weera wi mwaaceererye orummwa wanyu mu mweeri mmoha naari sincipale. Muupuwelele yeela ni mavekelo. (Yak. 1:5) Muloce yeela ni echoko anyu ni akina mmulokoni. (Masi. 15:22) Nyuwano munahaala woona wi naamwi murino makacamiho a ekumi naari mwaaceliwe, nyuwano tho munahaala ophwanya ohakalala onarweela mmuteko wa opiyoneero wookhaviherya.
5. Mphurelo taani nnahaalaahu okhalano naaceererya orummwa wahu mu elukuluku ya mukonelo?
5 Yehova onnachuna wi alapeli awe ekhale oohakalala. (Sal. 32:11) Moorweela wa wiilipixerya waaceererya orummwa wahu mu elukuluku ya mukonelo, nnahaala ohiya pahiru okhala oohakalala, navetho nnahaala omuhakalaliha Tiithi ahu a wirimu.—Masi. 23:24; 27:11