Mutikitherye Soolakelela Variyari va Elukuluku ya Yawuupuxerya

Eyaakha ti eyaakha, achu a Yehova annoonela Yawuupuxerya vamoha. Variyari va isumana ehaakumve ni emanle Yawuupuxerya, ninnapharihela ikari savameekhaaya wi nimvuwihe ni omuthamalela Yehova ntakhara yamahala ya woopola. (Aef 1:3, 7) Ntoko yootakiherya, hiyaano ninnalapa mwakuru wi naawope akina ntakhara Yawuupuxerya. Akina annapaka marehereryo wi ewerye orumeela ntoko mapiyoneero ookhaviherya ni yoolakelela ya omaliha iwora 30 naari 50 variyari va miyeeri sa Marsu ni Apirili. Apwanne mwanwerya waaceererya iwora munamalihaanyu mmuteko woolaleerya variyari va elukuluku yeela ya Yawuupuxerya? Tiheeni enahaala wookhaviheryaani weerano yeela?

Wiiliwiili, nnanwerya waakhwaniherya phaama yeela vaavaa nnapakaahu marehereryo woosiilo. (Mas 21:5) Woona wi moohilekela enamphiya elukuluku ya Yawuupuxerya, ela elukuluku ya opacerya opaka marehereryo. Muthokororye mukhalelo mwaahaalaanyu waaceererya orummwa anyu variyari va elukuluku ya Yawuupuxerya, nave muupuwele sa yeeyo munaphwanelaanyu opaka wi mwaakhwaniherye soolakelela sanyu. Voocharela, mumveke Yehova wi areelihe wiilipixerya wanyu.—1Yoh 5:14, 15.

Apwanne mwanwerya wuupuwela makhalelo makina a waaceererya orummwa anyu variyari va elukuluku ya Yawuupuxerya?