Mvahe Onamoona Mpharihelaka Meesa a Soolaleeryiwa
Onamoona ni meesa a soolaleeryiwa onnakhala wa mphurelo wa muchu orino nchuno na eparipari. (Yohane 6:44) Nyenya, atokweene annalipihiwa wi epake marehereryo a ovaha onamoona wa vanlakani mu ekulucu ya Muloko erino mapuro a waaciwamo. Woona wi meesa a soolaleeryiwa tahi echu enaamuthipeliwa, chiryene hori woochuneya oveka weemereryiwa wa alamuleli. Taani onaphwanelela opaka makupa? Alaleeryi anooniherya mukhalelo waphaama, woocicimiheya, ni makhalelo aphaama a ochekula. Alaleeryi yaawo anachariha ichu soophwanela weera ni oheerano ichu sinahiihiwa anahaala okhalano mphurelo waphaama.
Mweere ela:
• Mukhale oonthamwene, oowaakhela phaama achu, ni a waakhaviherya achu. Alaleeryi akina annatheya ni olocela mwaphaama. Wakhala wi aamoona muchu avareryaka meesa a soolaleeryiwa, awo anaphwanela oloca: “Mwanwerya okuxa yoolaleeryiwa wakhala wi moosiveliwa.”
• Mukhale va nipuro noophwanela waacamela arivo meesa a soolaleeryiwa. Mmapuro makina alaleeryi oovyaka annakhalano mphurelo waphaama vaavaa aneechaayano meesa a soolaleeryiwa. Akina ahoona wi mukhalelo yoowo achu annoovelela weemela, hiiha alaleeryi annalakelela okhala ocai eweheryaka wi muchu arwe vaavaa arivo meesa a soolaleeryiwa. Vaavaa muchu onaacameleiye meesa, mweererye ochekulano, mmukohaka: “Apwanne montoko wiipakela nikoho ntoko nla?”
• Mumpharihele Piipiliya wiiliwiili wakhala wooweryeya.
• Muloce marehereryo a omuhuserya Piipiliya wa muchu yoowo onakuxa yoolaleeryiwa ahu ya omuhuseryano Piipiliya ntoko Liivuru Piipiliya onahusiha Eheeni. Nave mmoonihe eviitiyu Ntakhara Heeni Omuhuserya Piipiliya? Mu ekhankoonya anyu.
• Mwaavye osuwela onakhaleiyewo yoowo oonihenrye nchuno. Wakhala wi muchu owo hanakhala mu ekulucu anyu, ninnoovekaani wi murepe eformulario (S-43) nave mveleele wa mutokweene a muloko mwa waakuveya wakhala wooweryeya.
Muheere ela:
• Okhala oowali, ootitelela, naari weemela ohoolo wa meesa ntoko mulipeleli.
• Woona mukhalelo yoola wa onamoona ntoko pahiru okawa soolaleeryiwa. Vaavaa nnakhalaahu mu orummwa, yoochuna ahu ori opaceryiha yoohuserya ya Piipiliya, mwa yeela nnaphwanela wiivoliiherya mu ochekula.
• Wiikicha meesa, naari otitelela ochekula ni nthamwene anyu. Wakhala wi munachuna ompharihela telefone wi muloce yoochuna anyu, munaphwanela ovinyavo nipuro nlo orivo yawooniherya ya soolaleeryiwa.
• Oweiwa ovaanela ni muchu oheemererya. Wakhala wi ooheemererya owo onnanruwana, yaahaala okhala yaphaama othaamela nipuro nikina.