Wunnuwiha Mavyakelo ahu mu Orummwa—Opaceryiha Ovaanela mu Onamoona Woohilakelela
Ntakhara Heeni ti Yoochuneya: Vaavaa nnalaleeryaahu empa ni empa, hiyaano ninnoona wi achu anceene hanakhala mmavaate. Mwawiihiiha, nnanwerya oloca ni yaawo vaavaa nnawelaahu ekaaro, nnanweheryaahu totoro okupweeteni wawe, elukuluku yawiichuuwa omutekoni, oxikola naari mapuro makina. Eyo yookhwela ya Yehova wi muchu ori oothene akhaleno ekari ya owiriyana michaka sa Omwene. (1 Tim. 2: 3, 4) Wiiliwiili, wi naavahe onamoona, hiyaano nnaphwanela okhala oopacerya ovaanela.
Mukhalelo wa Weerano Yeela:
• Khalani oothanlela. Achu annooneiha onthamwene nave anniilipixerya oloca? Mikhalelo sinneemererya ovaanela moomaaleleya? Alaleeryi ancipale anapacerya onweha muchu evinyaka etheya. Wakhala wi muchu ohooneiha otheya, awo anneererya opaceryiha ovaanela.
• Muloce mwawaakuveya, mpake nivekelo vathivathi wakhala wi mooyeleela olipa murima.—Neh. 2:4; Saw. 4:29
• Mpacerye ni masu ookhweya, ntoko omwenyerya. Yesu haari moona opaceryiha ovaanela wawe ni muthiyana Musamariya vooloca sa Omwene. (Yoh. 4:7) Mu ilukuluku ikina, ovaanela onanwerya opaceryihiwa moorweela wa oloca: “Anamwane anyu anniiwelela phaama!” Mpake nikoho nikina wi mpaceryihe ovaanela: “Mohoona michaka ilociwe ohiyu ovinre?”
• Mwamala opaceryiha ovaanela, mwaavye ekari wi mpaacerihe michaka saphaama, nyenya muhipake mmukhalelo woolipa. Mweerihe wi ovaanela weereye mmukhalelo waphaama. Akhweya munanwerya oloca echu enahaala otannya nchuno naya ni oweeriha opaka nikoho. Ntoko yootakiherya, wakhala wi munavaanela vooloca sa mwaha wa echoko, munanwerya oloca, “miyaano koophwanya ekano yoororomeleya vooloca sa waaphuwa anamwane.” Wakhala wi nyuwaano munathokororya ekaruma evyaani, munaphwanela oloca, “Hiihaanoru miyaano koohakalala waalakhanya michaka saphaama sa otoroka.” Henii ekhale yoolipiha wakhala wi ovaanela woomala muhaakumve ovaha onamoona.
• Mukuxe etrataato naari yoolaleeryiwa ekina munahaalaanyu owerya omvaha muchu yoowo oonihenrye nchuno.
Mweererye Ela Variyari va Mweeri:
• Esumana eri yoothene mweererye opaceryiha ovaanela ni yoolakelela ya ovaha onamoona woohilakelela.