Wunnuwiha Mavyakelo Ahu Mmuteko Wa Olaleerya—Waahusiha Oohuserya Ahu Mukhalelo wa Wiirehererya

NTAKHARA HEENI TI YOOCHUNEYA: Wakhala wi oohuserya a Piipiliya anniirehererya, onakhala wookhweya wiiwexexa ni wuupuwelela yeeyo ahusenryaaya. Wakhala wi anniiwexexa phaama ni wuupuwelela, anahaala waakuvela oya vahoolo. Naamwi emanle opatisiwa, onamukhala woochuneya otitelela ‘olipelela’ moorweela wa wiirehererya ntakhara mithukumano ni muteko woolaleerya. (Mat 25:13) Mwawiihiiha, osuwela mukhalelo wa ohuserya ni okhalano yookhovelela yaphaama ya ohuserya onnatepa okhaviherya mu okumi aya woothene. Ovinyerya omapacereryo, nnaphwanela waakhaviherya oohuserya ahu a Piipiliya okhalano ni winnuwiha yookhovelela ya wiirehererya.

MUKHALELO WA WEERANO YEELA:

• 

  Mukhale yootakiherya yaphaama. (Aro 2:21) Mwiirehererye phaama wa yoohuserya. (km 11/15 7) Mmoonihe liivuru anyu mucenkaanyumo maakhulo.

• 

  Mmuceenyerye ohuserya anyu wi iirehereryeke. Wakhala wi yoohuserya ya Piipiliya yoothipeleya, mmuleele wi wiirehererya onnapaka makupa a marehereryo a yoohuserya ya Piipiliya ya muchu mukhateiye, nave mutharihe mphurelo ene. Mvahe sooleeliherya sawooneya vooloca sa mukhalelo wa okhalano elukuluku wi iirehererye. Ahusiha akina annamuhiyerya oohuserya aya a Piipiliya liivuru aya yoowo amurehereryaaya ni amucenkaaya, wi emukhaviherye oohuserya aya woona mphurelo wa wiirehererya woosiilo. Mmuthamalele wakhala wi ohiirehererya.

• Mmoonihe mukhalelo wa wiirehererya. Woopaceryani, ahusiha akina annapharihela mwaha woothene anahuseryaaya wi ewooniherye oohuserya aya mukhalelo wa wiirehererya mmwaha ti mmwaha.