“Muthanle . . . Taani Munamuchunaanyu Omulapaka”

1. Tiheeni nnaphwanelaahu weera wi nikhaleno ohakalala weeparipari, nave ntakhara heeni? (Yesaya 48:17, 18)

TIITHI ahu a wirimu onnansivela vancipale nave onachuna wi nikhaleno okumi waphaama hiihaano ni omwaahiyu. (Ekl. 3:12, 13) Owo oonipatuxa ni mavyakelo a opaka ichu sootikhiniha, mwawiihiiha, owo hanivanhe mavyakelo a wiilamulela mukhatiihu naari mavyakelo a olakelela wa hiyo aneene yeeyo eri yaphaama ni yoonanara. (Ekl. 8:9; Yer. 10:23) Owo oosuwela wi naariki nikhale oohakalala nnaphwanela omurumeelaka ni ochariha malakiheryo awe.—Mwaalakhanye Yesaya 48:17, 18.

2. Tiheeni Satana onachuneiye wi nuupuweleke, nave tiheeni Yehova oneereiye vooloca sa yeeyo?

² Satana onachuna wi nuupuweleke wi nnanwerya okhala oohakalala ahirivo Yehova, nave wi achu ananwerya okhumelela phaama yiilamulelaka mukhataaya. (Map. 3:4, 5) Wi Yehova ooniherye wi Satana nawoothe, owo oheemererya wi achu yiilamuleleke mukhataaya mu elukuluku vakhaani. Ti wookhweya woona wi olamulelo wa achu hiwaano owerya. Mwawiihiiha, Piipiliya onnaaloca alopwana ni athiyana ancipale yaawo yaari oohakalala mu omurumeela Yehova. Oopacerya wa yaawo ti Yesu Kristu. Voopacerya, hankooni noone mathowa yaamweerinhe othanla omurumeela Yehova. Voocharela, nnahaala othokororya ntakhara heeni Tiithi ahu a wirimu onnaphwanela omulapela wahu. Vookuchula, nnahaala wuuluulela mathowa a vakhaani yaawo enaneeriha olakelela omurumeela Yehova.

NTAKHARA HEENI YESU AATHANLA OMURUMEELA YEHOVA?

3. Tiheeni Satana aamvaheiye Yesu, nave tiheeni owo aalakelenleiye weera?

³ Vaavaa aaryeiye veelaponi ya vathi, Yesu aaphwanela othanla taani aahaaleiye omurumeela. Mu elukuluku vakhaani Yesu amanle opatisiwa, Satana aaloca wi aahaala omvaha omwene wa elapo yoothene wakhala wi oomukokhorela pahiru ekwaha emoha. Nto Yesu aamwaakhula ii: “Vinyavo Satana! Ntakhara yoorempwa: ‘Ti Yehova Muluku aa, onaphwanelaawe omulapela, nave ti yooworu pahi onaphwanelaawe omukokhorela.’” (Mat. 4:8-10) Ntakhara heeni Yesu aapaka yoothanla yeela? Hankooni nthokororye mathowa a vakhaani.

4-5. Mathowa taani makina yaamweerinhe Yesu othanla omurumeela Yehova?

⁴ Nthowa noochuneyaxa naamweerinhe Yesu othanla omurumeela Yehova waari osivela—Yesu ookhalano osivela otokweene ni woohimala wa Atiithi awe. (Yoh. 14:31) Ohiya yeeyoru, Yesu aanamurumeela Yehova nthowa nawi yaari echu yoophwanelela opaka. (Yoh. 8:28, 29; Wup. 4:11) Owo aanasuwela wi Yehova Ehime ya okumi nave wi owo toororomeleya ni amahala. (Sal. 33:4; 36:9; Tiy. 1:17) Ilukuluku soothene Yehova aanaloca eparipari wa Yesu navetho aanamvaha soothene aachuneiye. (Yoh. 1:14) Moohiyana, Satana ootannya okhwa. Owo nawoothe ahooleliwaka ni nrima ni wiisivela mukhateiye. (Yoh. 8:44) Asuwelaka saweereya seiha, Yesu hantonko omutakiherya Satana moorweela wa ommwareela Yehova.—Afi. 2:5-8.

⁵ Echu ekina yaamweerinhe Yesu othanla omurumeela Yehova tiyawi owo aanaweherya yeeyo muteko awe waahaalaya okhwaaniherya. (Ahe. 12:2) Owo aanasuwela wi atitelela okhala oororomeleya aahaala weeliha nsina na Atiithi awe, nave aahaala weeriha okhala wooweryeya omaliha makacamiho yaawo etannyiwe ni Musaserya.

NTAKHARA HEENI YEHOVA ONNAPHWANELA OMULAPELA WAHU?

6-7. Ntakhara heeni ancipale hanamurumeela Yehova, nave ntakhara heeni nnaphwanelaahu omurumeelaka pahiru Yehova?

⁶ Ancipale olelo, hanamurumeela Yehova nthowa nawi awo nlelo hesuwenle mikhalelo sawe sootikhiniha, nave henawerya woona soothene owo opankeiye wa yaawo. Awo enalikana ni achu o Atena yaawo Paulo aalalenryeiye, awotho hiyaamusuwenle Muluku.—Saw. 17:19, 20, 30, 34.

⁷ Paulo aahaatharihela oowiriyana awe wi Muluku eeparipari “onnaavaha achu oothene okumi, nwiya, ni ichu soothene.” Owo aahaaceererya: “Moorweela wa yoowo, nookhalano okumi, ninniitannya nave nookhala.” Muluku Mpatuxa, “mwa mulopwana mmoha, owo aapaka maloko oothene a achu,” mwawiihiiha, owo ookhalano ophwanelela waakhela omulapela wahu.—Saw. 17:25, 26, 28.

8. Tiheeni Yehova ohinahaaleiye weera, nave ti mwawiihai owo oonihenryeiye wi onnansivela vancipale?

⁸ Ntoko Mpatuxa ni Ooweryaxa a elapo yoothene, Yehova aanwerya waakhinyeererya achu omurumeelaka yoowo. Nyenya, Yehova harwa eerano yeeyo. Ohiya yeeyo, owo onnavahererya sawooniherya sawi owo ookhala nave wi onnamusivela vancipale mmoha ti mmoha a hiyo. Owo onachuna wi achu ancipale ekhale asinthamwene awe okhala wookhala. (1 Tim. 2:3, 4) Ti nthowa nene Yehova onanivyakiheiye wi naahusihe achu vooloca sa yoolakelela awe ni waaleela yaawo vooloca sa ichu saphaama seiyo onahaaleiye oweerela achu. (Mat. 10:11-13; 28:19, 20) Owo oonivaha muloko ni ahooleli oosivela wi enikhapeleleke.—Saw. 20:28.

9. Ti mwawiihai Yehova onooniheryeiye osivela wawe wa oothene?

⁹ Osivela wa Yehova onnooneya mmukhalelo owo onaakhaliheiye yaale ahineemererya wi owo ookhala. Muthokororye sawooniherya iha: Mu iyaakha macikhweene, achu ancipale aalakelela opaka yeeyo enoonaaya okhala yaphaama ni yoonanara ohiya omwiiwelela Yehova. Naamwiihiiha, Yehova ohaavaha mwa mahala soothene enachunaaya wi evakuleleke okumi ni opuha yoowo. (Mat. 5:44, 45; Saw. 14:16, 17) Owo ohaavaha ekari ya okhalano asinthamwene oosivela, emusi ni opuha muteko aya wakuru. (Sal. 127:3; Ekl. 2:24) Yawooniherya yeela, ennooniherya mookwakwaleya wi Atiithi ahu a wirimu annaasivela achu oothene. (Muk. 34:6) Vano hankooni nuupuwelele mathowa yaawo eneerinhe othanla omurumeela Yehova ni ti mwawiihai owo onanreeliheiye.

NTAKHARA HEENI NOOTHANLA OMURUMEELA YEHOVA?

10. (1) Nthowa taani noochuneyaxa nnaneeriha omurumeela Yehova? (Mateyu 22:37) (2) Muniisoona hai osuwela wi Yehova toopixa murima ni aikharari? (Salmu 103:13, 14)

¹⁰ Hiiha ntoko Yesu, ninnamurumeela Yehova nthowa nawi nookhalano osivela otokweene wa Yoowo. (Mwaalakhanye Mateyu 22:37.) Ninniisoona okhala awaacameleya wa Yehova vaavaa nnahuseryaahu vooloca sa mikhalelo sawe. Ntoko yootakiherya, muthokororye opixa murima wa Yehova ni hiyaano. Vaavaa Aisarayeli yaahimwiiwelelaaya Yehova, owo ahaaveka: “Charuwani; mmoha ni mmoha ahiye meecelo awe oonanara.” (Yer. 18:11, PMM) Yehova oosuwela wi na achu oohiphaameya, nave wi na nchupi. (Mwaalakhanye Salmu 103:13, 14.) Vaavaa munuupuwelelaanyu vooloca sa Yehova ni mikhalelo sawe sootikhiniha, apwanne hamunaceenyeryeya omurumeela yoowo okhala wookhala?

11. Mathowa taani makina enaneeriha omurumeela Yehova?

¹¹ Nave tho ninnaceenyeryeya omurumeela Yehova nthowa nawi eyo echu yoophwanelela weera. (Mat. 4:10) Ohiya yeeyoru, noosuwela wi wakhala wi ninnakhala oororomeleya wa Yehova, ichu sincipale saphaama inahaala weereya. Vaavaa nnamurumeelaahu Yehova moororomeleya, ninnakhaviherya weeliha nsina Nawe, ninnooniherya wi Musaserya nawoothe nave tho ninnahakalaliha murima wa Atiithi ahu. Nave wakhala wi noothanla omurumeela Yehova hiihaano, enamunikhaviherya omurumeela yoowo okhala wookhala!—Yoh. 17:3.

12-13. Tiheeni nnahuseryaahu ni yaweereya ya Jane ni Pam?

¹² Vaavaa nryaahu amiravo, nnanwerya wunnuwiha osivela wahu otokweene ntakhara Yehova, nave osivela owo onanwerya otitelela wunnuwa wakhala wi nohuuluvala. Moone yootakiherya ya arokora eeli yaawo eyaryiwe erukulu emoha eniichaniwa Jane ni Pam.a Mmoha aarino iyaakha 11 nave mukina aarino 10 vaavaa yaapacenryaaya omuhuserya Piipiliya. Naamwi asitiithi aya yahaarino nchuno na omuhuserya Piipiliya, awo yaahimweemererya Jane ni Pam omuhuseryaka Piipiliya ni Anamoona a Yehova, wakhala wi awo annaya okerexa vamoha ni emusi omakuchuwelo wa esumana. Jane ooloca: “Yeeyo Anamoona a Yehova ekihusinhaaya orweela Mpiipiliyani yookikhaviherya ovootha okhinyererya wa asinthamwene aka, ohiivoliiherya mu olya mirece ni ocapaheya.”

¹³ Moovira wa iyaakha, asimwali oopiili yaahikhala alaleeryi. Ohoolo waya, yaahivolowa mmuteko woopiyoneeru nave yiiha yaakhapelelaka asitiithi aya awinnuwelavo. Yuupuwelaka yaweereya aya, Jane ooloca: “Koohuserya woopaceryani wi Yehova onnaakhapelela asinthamwene awe moororomeleya hiiha ntoko 2 Timotiyu 2:19 onaloceiye: ‘Yehova ohaasuwela yaale ari awawe.’” Hisaavo minikwa vawi Yehova onnaakhapelela yaale anathanla omusivela ni omurumeela yoowo!

14. Ti mwawiihai nnaakihaahu nsina na Yehova? (Moone tho iruku.)

¹⁴ Nnachuna okhaviherya weeliha nsina na Yehova wa sawootha soothene. Mwaanyiherye yaweereya ela: Nyuwaano mookhalano nthamwene anyu awaacameleya yoowo ori aphaama, amahala ni ookhurumuwela. Mu nihiku nimoha, munnamwiiwa muchu amootheryaka nthamwene anyu yoole alocaka wi owo toonanara murima ni oohiroromeleya. Tiheeni mwaahaalaanyu weera? Nyuwaano mwaahaala omwaakiha. Mmukhalelo mmohamoha, vaavaa Satana vamoha ni ahooleli awe eneereryaaya onanariha ophwanelela wa Yehova moorweela wa omwaramwaxa sawootha vooloca sa Yoowo, hiyaano ninnamwaakiha mwakuru nlocaka eparipari vooloca sa nsina Nawe. (Sal. 34:1; Yes. 43:10) Ninnooniherya wi ninnachuna omurumeela Yehova ni murima woothene moorweela wa malocelo ni saweera sahu.

15. Ntakhara heeni matorokelo Paulo aapankeiye mu okumi awe yaari aphaama wa yoowo? (Afilipi 3:7, 8)

¹⁵ Ninnakhala ooreheryeya opaka matorokelo mu okumi ahu wi nimuhakalalihe Yehova naari opaka sincipale mmuteko awe. Ntoko yootakiherya, murummwa Paulo aalakelela ohiya murici awe woovuwa mu elapo awe wi amuchare Kristu ni omurumeela Yehova. (Aka. 1:14) Ntoko yookhumelela, owo aahikhalano okumi woohakalaliha ni waakhela ekari ya olamulela vamoha ni Kristu wirimu. Owo hintonko okhalano ekeerelani wa yoolakelela aapankeiye ya omurumeela Yehova, nave hiyo tho hinikhalano ekeerelani.—Mwaalakhanye Afilipi 3:7, 8.

16. Tiheeni nnahuseryaahu ni yaweereya ya Julia? (Moone tho iruku.)

¹⁶ Wakhala wi noheeriha muteko wa Yehova okhala woochuneyaxa mu okumi ahu nnanwerya okhalano mphurelo hiihaano ni omwaahiyu. Moone yaweereya emoha ya murokora oniichaniwa Julia. Ahaakumve ohuserya eparipari, ovinyerya onamwane awe Julia aaniipa macipo ookerexa. Mulipa awiipa mu ipa sa vasulu oovuwa, aahoona mavyakelo awe awiipa nave aahimuvyakiha. Moovira wa elukuluku Julia aahisuweliwa wi aari mwaana oovuwa vancipale, nave aaniipa mu ipa sa macipo soovuwa. Vaavaa owo aahuseryeiye mu exikola ya macipo oovuwa, nthamweene awe mmoha ooxikola aapacerya ovaanela ni yoowo vooloca sa Muluku nave amutharihela wi Muluku ookhalano nsina, Yehova. Mu elukuluku vakhaani, Julia aapacerya omuhuserya Piipiliya ikwaha piili va esumana. Moovira wa elukuluku, owo aalakelela otikitherya okumi awe mu omurumeela Yehova ohiya otikitheryeya mu wiipa. Hiwaari wookhweya opaka yoolakelela yeela. Julia ooloca: “Achu ancipale yaanaloca wi ohiya wiipa yaari yoolakelela ya ololo, nyenya miyaano kaachuna opharihela okumi aka woothene wi kimurumeele Yehova.” Olelo sinnaviravo iyaakha opwaha 30, vano Julia aniisoona hai wa yoolakelela yeela aapankeiye? Owo ooloca: “Kookhalano ohakalala ni murecele moorweela wa othanla omurumeela Yehova, nave kiri oolekecheya wi Yehova onahaala waakhwaniherya soochuna soothene sa murima aka.”—Sal. 145:16.

MUTITELELE OMURUMEELA YEHOVA

17. Ti mwawiihai waakuveya wa elukuluku ahu onaavolowelaaya yaale ethanlile omurumeela Muluku ni yaale nlelo ehinamurumeela?

¹⁷ Hiyaano nri waacamelaxa omakuchuwelo wa elapo yeela yoonanara. Murummwa Paulo oorepa: “Vawi ‘ehanle elukuluku vakhaani,’ nave ‘yoole onarwa onahaala ophiya nave halekela.’” (Ahe. 10:37) Eyo enanivolowela hai? Echu yoopacerya ti yawi, elukuluku ehanle vakhaanixa wi achu elakelele waakhanle wi enahaala omurumeela Yehova naari hooye. (1 Ako. 7:29) Waakhanle wi noothanla omurumeela Yehova nnawerya ororomela wi makacamiho yaawo nnahoolelalahu ‘ta elukuluku vakhaanixa.’

18. Tiheeni Yesu ni Yehova enachunaaya wi nipake?

¹⁸ Yesu aahaceenyerya oohuserya awe ohiya pahiru omucharaka yoowo, nyenya tho otitelela omucharaka owo. (Mat. 16:24) Waakhanle wi munnamurumeela Yehova mu iyaakha sincipale, mutitelele ni yoolakelela yeeyo nave muhikookele muculi. Oothene ahu nnaphwanela opaka owetha wahu wi ntitelele omurumeela Yehova. Eyo vakina vaya, enanwerya okhala yoovila, nave yoolakelela yeela enamuneeriha okhalano ohakalala otokweene ni opuha mareeliho hiihaano!—Sal. 35:27.

19. Tiheeni muhusenryaanyu ni yaweereya ya Gene?

¹⁹ Achu akina anuupuwela wi omurumeela Yehova onahaala waayeleeliha ichu sincipale mu okumi aya. Waakhanle wi nyuwaano mwa mmiravo, apwanne omurumeela Yehova onneeriha okumi anyu okhala woovila? Munna mmoha oniichaniwa Gene ooloca: “Miyaano koona wi okumi aka hiwaarino mphurelo nthowa na okhala Namoona a Yehova. Yaakhala ntoko wi asinthamwene aka yaanapuha phaama okumi aya, yaanaya mu ifesta, ocapaheya ni waavonya a xooku a nlala, nave miyaano pahiru kaaya mmithukumano ni mmuteko woolaleerya.” Ti mwawiihai muupuwelo yoola waamvolowenlaaya Gene? Owo ooloca: “Kaapacerya opaka ichu ikina soonanara moovitheya, nave moovira wa elukuluku, kaapacerya woona wi yaari yaphaama. Nyenya eyo hiyaakiruuhenle ohakalala weeparipari. Kaapacerya wuupuwelela iparipari sa Mpiipiliyani seiyo kaalakelenlaaka ohipwacha nave kaalakelela okookela omurumeela Yehova ni murima woothene. Ovinyerya vaavaa, kinnawerya woona mukhalelo Yehova onaakhuleiye mavekelo aka oothene.”

20. Teevi enaphwanela okhala yoolakelela ahu?

²⁰ Mulipa oomurepa Salmu oomwiipela Yehova ariki: “Oohakalala ti yoole nyuwo munamuthanlaanyu nave mmuruuha vakhiviru vanyu, wi akhaleke mmayateni mwanyu.” (Sal. 65:4) Nnachuna okhalano yoolakelela emohamoha yeeyo aarino Yosuwa yoowo aalonce ariki: “Nto miyo ni ahimaaka nnii naalapeke Apwiya [Yehova]!”—Yos. 24:15, PMM.