Nsina na Yehova, Nnataphulela Eheeni wa Hiyaano?

1-2. Nnasuwela hai wi nsina na Yehova ti noochuneya wa Yesu?

HIYAAVO echu ekina yoochuneyaxa wa Yesu opwaha nsina na Yehova. Haavo tho mukina opanke sincipale wi eerihe osuweliwa nsina na Yehova. Ntoko yooniheryiwaaya mmwaha ovirale, Yesu aari ooreheryeya okhwa wa nthowa na nsina na Yehova ni soothene owo oneemeleleiye. (Mar. 14:36; Ahe. 10:​7-9) Nave omanle Olamulelo Awe wa Iyaakha Miili, Yesu onahaala okhala ooreheryeya oveleela owerya woothene ntakhara weela wa nsina na Yehova. (1 Ako. 15:​26-28) Osivela wa Yesu ntakhara Muluku, onnuupulula tho sincipale vooloca sa onthamwene awe ni Atiithi awe. Moohikhwa minikwa, ela ennooniherya wi Yesu onnamusivela Yehova.

² Yesu aarwa veelaponi ya vathi mu nsina na Atiithi awe. (Yoh. 5:43; 12:13) Owo aahaasuweliha oomuchara awe nsina na Atiithi awe. (Yoh. 17:​6, 26) Owo aahihusiha mu nsina na Yehova nave aahipaka sootikhiniha mu nsina nenla. (Yoh. 10:25) Mweeparipari, Yesu aahimveka Yehova wi aakhapeleleke oohuserya awe “wa nthowa na nsina [Nawe].” (Yoh. 17:11) Mweeparipari, tiyawooneya wi nsina na Muluku naari noochuneyaxa wa Yesu opwaha echu vyakala. Vano, ti mwawiihai muchu onahaaleiye oloca wi onnamuchara Yesu aniiha ahisuwenle naari mano opharihela nsina na Yehova?

3. Tiheeni nnahaalaahu woona mmwaha yoola?

³ Wa nthowa na okhala Akristu eeparipari, ninnamutakiherya Yesu moorweela wa wooniherya osivela ni ocicimiha nsina na Yehova. (1 Pet. 2:21) Mmwaha yoola, moone ntakhara heeni Yehova oowiichana ni nsina nawe yaale analaleerya ‘michaka saphaama sa Omwene.’ (Mat. 24:14) Nnahaala othokororya tho yeeyo nsina na Yehova nnataphulelaaya wa mmoha ti mmoha a hiyaano.

“ACHU YII EKUXE NSINA NAWE”

4. (1) Tiheeni Yesu aalonceiye wa oohuserya awe ahaakumve okookela wirimu? (2) Nikoho taani nnakhumelela wa nthowa na masu yaala?

⁴ Ahalaka vakhaani okookela wirimu, Yesu aahiloca wa oohuserya awe: “Munamwaakhela ikuru nave munarwa mukhala anamoona aka o Yerusalemu, o Yuteya woothewene ni o Samariya, ophiyerya weiwo elapo ekotenlaayawo.” (Saw. 1:8) Hiihaa, michaka saphaama saahaala olaleeryiwa ohiya pahiru o Isarayeli. Moovira wa elukuluku, achu a maloko oothene yaahaala okhalano ekari ya okhala oomuchara a Yesu. (Mat. 28:​19, 20) Nyenya Yesu aahi: “Munarwa mukhala anamoona aka.” Apwanne oohuserya yaala avyaani waanachuneya osuwela nsina na Yehova, naari pahiru yaahaala okhala anamoona a Yesu? Saweereya itharihiwe mu ekapitulu 15 ya Saweeriwa ti Arummwa, sinnanikhaviherya waakhula nikoho nenla.

5. Ti mwawiihai arummwa ni atokweene o Yerusalemu yoonihenryaaya wi achu oothene yaanaphwanela osuwela nsina na Yehova? (Moone tho eruku.)

⁵ Mu eyaakha ya 49 E.K., arummwa ni atokweene o Yerusalemu yaahithukumana wi ethokororye yeeyo maloko oohithikiliwa yaaphwanelaaya weera wi yeemereryiwe ntoko Akristu. Wookuchulani wa mwaha, Tiyaku munna awe Yesu aahiloca: “[Petru] aanleela mookwakwaleya mukhalelo Muluku, mu ekwaha yoopacerya, aakookenleiye wa achu a maloko wi iithanlele achu yii ekuxe nsina nawe.” Nsina taani nenlo Tiyaku aaloceiye? Alocaka sa mulipa a miririmu Amosi, owo aahaaceererya: “Wi achu ahanle emwaavye Yehova moowetha, vamoha ni achu a maloko oothene, achu yaawo aniichaneliwa nsina naka, onaloca ti Yehova.” (Saw. 15:​14-18) Oohuserya yaala avyaani, ohiya pahiru yaahaala ohuserya vooloca sa Yehova, nto yaahaala ‘wiichaneliwaka nsina nawe.’ Ela enataphulela wi yaahaala okuxa nsina na Muluku nave tho wi yaahaala osuweliwa ni nsina nenlo.

6-7. (1) Ntakhara heeni Yesu aarwa veelaponi ya vathi? (2) Nthowa taani noochuneyaxa naamweerinhe Yesu orwa veelaponi ya vathi?

⁶ Nsina na mwaneene Yesu nnataphulela “Yehova ti Nivuluxo,” nave Yehova oompharihela Yesu wi aavuluxe achu oothene yaawo arino nroromelo mwa yoowo ni wa Mwana awe. Yesu aarwa veelaponi ya vathi wi avahe ekumi awe ntakhara achu. (Mat. 20:28) Mmukhalelo yoola, owo oheeriha okhala wooweryeya wi awo ekhurumuweliwe soocheka saya ni okhalano ekumi yoohimala.—Yoh. 3:16.

⁷ Vano, ntakhara heeni achu yaanachuna woopola? Waari wa nthowa na yeeyo yeeren’ye mu emaca ya Eteni. Ntoko etharihiwaaya mmwaha ovirale, asitiithi oopacerya a achu, Atamu ni Eva, yaahimmwareela Yehova nave hiihaa yaahiyeleela ekari ya okhala ni okumi okhala wookhala. (Map. 3:​6, 24) Nto Yesu aarwa veelaponi ya vathi wi apake echu yeeyo nlelo yaari yoochuneyaxa opwaha waavuluxa anamwane a Atamu ni Eva. Satana aahiloca sawootha soonanaraxa vooloca sa Yehova. (Map. 3:​4, 5) Mwawiihiiha, waanachuneya wi achu esuwele wi Yehova haapanke echu yoonanara nave wi owo Tiithi oosivela. Nave Yesu aari muchu aphaama wi ooniherye yeeyo, woona wi owo aamweemelela Yehova nave aanapaka moophaameya ichu soothene seiyo Yehova aachuneiye wi owo apake.

8. Tiheeni oothene yaale anamuchara Yesu anaphwanelaaya osuwela?

⁸ Oothene yaawo yaarino nroromelo mwa Yesu, wa Ayuta hiihaa tho wa maloko makina, yaaphwanela osuwela Ehime ya ovuluxiwa waya ni omusuwela Tiithi a Yesu, Yehova Muluku. (Yoh. 17:3) Ohiya yeeyoru, hiiha ntoko Yesu, awo yaahaala wiichaneliwaka ni nsina na Yehova. Awo tho yaaphwanela osuwela ochuneya waya weeliha nsina nenla. Ovuluxiwa waya waarweela mu weerano yeeyo. (Saw. 2:​21, 22) Mwawiihiiha, oomuchara oororomeleya oothene a Yesu, yaaphwanela ohuserya vooloca sa Yehova, ni vooloca tho sa Yesu. Tahi yootikhiniha osuwela wi Yesu aahikuchula nivekelo nawe nrempwe mu Yohani 17 ni masu ala: “Kohaasuweliha yaawo nsina nanyu nave kinarwa kisuweliha, wi osivela yoowo mwaakisivenlaanyuno okhale ni yaawo nave miyo kikhale awiiwanana ni yaawo.”—Yoh. 17:26.

“NYUWO MWA ANAMOONA AKA”

9. Ti mwawiihai nnahaalahu wooniherya wi nsina na Yehova ti noochuneyaxa wa hiyaano?

⁹ Mwawiihiiha, oomuchara eeparipari oothene a Yesu anaphwanela okhalano nchuno na weeliha nsina na Yehova. (Mat. 6:​9, 10) Nnaphwanela woonaka nsina na Yehova okhala noochuneyaxa wa hiyaano. Eyo enavolowela weeravo echu mmakupa ahu. Vano, tiheeni nnaphwanelaahu weera wi neelihe nsina na Yehova ni wooniherya wi yeeyo Satana onaloceiye vooloca sa Yehova tahi eparipari?

10. Tiheeni nnahuseryaahu ni yeeyo erempwe mu liivru a Yesaya 42 ophiyerya 44? (Yesaya 43:9; 44:​7-9) (Moone tho eruku.)

¹⁰ Mu Yesaya ikapitulu 42 ophiyerya 44, ninnahuserya vooloca sa yeeyo nnaphwanelaahu weera wi neelihe nsina na Yehova. Mu ikapitulu seiya, Yehova onnaaveka achu yaawo ahinamurumeela wi yoone waakhanle wi a muluku aya ti eeparipari. Owo onaveka wi anamoona yiisooneihe ni ovahererya onamoona sooloca sa a muluku yaala. Nyenya haavo eenreno!—Mwaalakhanye Yesaya 43:9; 44:​7-9.

11. Tiheeni Yehova olonceiye wa achu awe mwawiiwanana ni Yesaya 43:​10-12?

¹¹ Mwaalakhanye Yesaya 43:​10-12, TNM. Yehova aaloca wa achu awe: “Nyuwaano mwa anamoona aka, . . . nave miyaano ka Muluku.” Yehova onnaveka wi awo yaakhule nikoho nla: “Apwanne ookhalavo Muluku mukina okipwaha miyo?” (Yes. 44:​8, TNM) Mwawiihiiha, nookhalano ekari ya waakhula nikoho nenla. Moorweela wa masu ni saweera sahu, ninnooniherya wi Yehova ti Muluku mmoharu eeparipari. Nsina nawe ti navasuluxa opwaha masina oothene. Nave moorweela wa mukhalelo ahu nnakhalaahu mu okumi ahu, ninnooniherya wi mweeparipari ninnamusivela Yehova nave ninnakhala oororomeleya wa yoowo, naamwi Satana eerihaka eyo okhala yoovila. Mmukhalelo yoola, nookhalano ekari ya okhaviherya ni weeliha nsina Nawe.

12. Ti mwawiihai yaakhwanenlaaya yooloherya ya Yesaya 40:​3, 5?

¹² Vaavaa nnakhaviheryaahu nsina naari makhalelo a Yehova, nnamutakiherya Yesu Kristu. Yesaya tho aahiloherya sa muchu yoowo aahaala ‘orehererya ephiro ntakhara Yehova!’ (Yes. 40:​3, TNM) Eyo yaakhwanenle hai? Yohani Mpatisi aahirehererya ephiro ntakhara Yesu, yoowo aaruule mu nsina na Yehova nave aalonce mu nsina na Yehova. (Mat. 3:3; Mar. 1:​2-4; Luka 3:​3-6) Yooloherya emohamoha yooloca: “Ncicimiho na Yehova nnarwa nuupululiwa.” (Yes. 40:​5, TNM) Mwaha yoola waari hai? Vaavaa Yesu aaruuleiye veelaponi ya vathi, owo moophaameya aamweemelela Yehova, ntoko wi mwaneene Yehova taaruule veelaponi ya vathi.—Yoh. 12:45.

13. Ti mwawiihai nneeraahu nimutakiherye Yesu?

¹³ Hiiha ntoko Yesu, na anamoona a Yehova. Ninnakuxa nsina na Yehova nave ninnaaleela oothene yaawo nnaaphwanyaahu vooloca sa mikhalelo sawe sootikhiniha. Nyenya, wi nikhale Anamoona a Yehova aphaama, nnaphwanela tho waasuweliha achu ichu soothene seiho Yesu opankeiye wi eelihe nsina na Yehova. (Saw. 1:8) Yesu, Namoona a Yehova mutokweene, nave hiyaano nnachariha yootakiherya awe. (Wup. 1:5) Vano, tiheeni nsina na Yehova nnataphulelaaya wa mmoha ti mmoha a hiyaano?

MUKHALELO NSINA NA YEHOVA NRYAAYA NOOCHUNEYA WA HIYAANO

14. Ntoko etharihiwaaya mu Salmu 105:​3, nniisoona hai vooloca sa nsina na Yehova?

¹⁴ Ninniirumiha ntakhara nsina na Yehova. (Mwaalakhanye Salmu 105:3.) Yehova onnahakalala ni wiirumiha wahu vaavaa nnalocaahu sa nsina nawe. (Yer. 9:​23, 24; 1 Ako. 1:31; 2 Ako. 10:17) Ninnoona okhala ekari ocicimiha nsina nawe ni okhaviherya makhalelo awe. Hannaphwanela okhala awuuliwa muru oloca ni asinthamwene ahu oomutekoni, ooxikola, amwaacamani ahu ni akina, wi hiyaano na Anamoona a Yehova! Musaserya onachuna wi nimaale oloca vooloca sa nsina na Yehova wa akina. (Yer. 11:21; Wup. 12:17) Mweeparipari, Satana vamoha ni yaale enamwaramwaxa sawootha sawe enachuna oweeriha achu ocuwala nsina na Yehova. (Yer. 23:​26, 27) Nyenya osivela wahu nsina na Yehova onnaneeriha omucicimiha yoowo “nihiku noothene.”—Sal. 5:11; 89:16.

15. Enataphulela eheeni wiichana nsina na Yehova?

¹⁵ Ntitelele wiichana nsina na Yehova. (Yow. 2:32; Aro. 10:​13, 14) Wiichana nsina na Yehova onnavolowela sincipale ohiya pahiru osuwela naari opharihela nsina na Muluku. Ninnamusuwela Muluku ntoko muchu, ninnamuroromela yoowo, ninnaavya nikhaviheryo nawe nave ninnaavya ohoolela wawe. (Sal. 20:7; 99:6; 116:4; 145:18) Ninnalokoha tho nsina ni mikhalelo sawe wa akina, naaceenyeryaka ocharuwa ni weeravo echu wi ewerye okhalano weemereryiwa ni Yehova.—Yes. 12:4; Saw. 2:​21, 38.

16. Nni nooniherye hai wi Satana mulipa awootha?

¹⁶ Nri ooreheryeya ohooxeya ntakara nsina na Yehova. (Tiy. 5:​10, 11) Vaavaa nnatitelelaahu okhala oororomeleya wa Yehova naahoolelaka makacamiho, ninnooniherya wi Satana nawoothe. Mmahiku a Yupu, Satana aahiloca yawootha yeela ntakhara yaawo anamurumeela Yehova wi: “Muchu onamvaha soothene oreiyeno ntakhara okumi awe.” (Yupu 2:4) Satana aahiloca wi achu yaahaala omurumeelaka Yehova pahiru mu ilukuluku saphaama nave wakhala wi annahoolela makacamiho, anahaala omuhiya Yehova. Yupu moororomeleya aahooniherya wi masu yaala hiyaari eeparipari. Olelo, hiyaano tho nnanwerya wooniherya wi, naamwi vaavaa okumi ahu onakhalaaya woovila naari vaavaa Satana oneereryeiye oniceecheiha, hanrwa nihiya omurumeela Yehova. Nnanwerya ororomela moomalela wi Yehova onahaala onikhapelela wa nthowa na nsina nawe.—Yoh. 17:11.

17. Mmukhalelo taani mukina nnahaalaahu ocicimiha nsina na Yehova ntoko etharihiwaaya mu 1 Petru 2:12?

¹⁷ Ninnooniherya ncicimiho ntakhara nsina na Yehova. (Mas. 30:9; Yer. 7:​8-11) Woona wi achu aasuwela wi na Anamoona a Yehova, yeeyo nnapakaahu enanwerya ocicimiha nsina nawe naari hooye. (Mwaalakhanye 1 Petru 2:12.) Mwawiihiiha, nnachuna opaka soothene nnaweryaahu wi nimucicimihe Yehova moorweela wa masu ahu ni meecelo ahu. Vaavaa nneeraahuno yeeyo, naamwi nri oohiphaameya nnahaala ocicimiha nsina na Yehova.

18. Mukhalelo taani mukina wa wooniherya wi nsina na Yehova ti noochuneya wa hiyaano? (Moone tho enoota.)

¹⁸ Ninnoona wi nsina na Yehova ti noochuneyaxa wa hiyaano opwaha yeeyo achu anuupuwelaaya wa hiyaano. (Sal. 138:2) Ntakhara heeni eyo ti yoochuneya? Nthowa nawi vaavaa nnapakaahu ichu seiho inamuhakalaliha Yehova, ikwaha sincipale achu akhweya henasiveliwa nave ennaloca ichu soonanara vooloca sa hiyaano.a Vaavaa Yesu aakhwileiye, achu yaamoona ntoko mulipa awiipha nave yaanamuuliha muru, nyenya Yesu aari ooreheryeya okhwa mmukhalelo ene yoola wi Yehova awerye ocicimihiwa. Owo ‘haapwanche wuuliwa muru’ moorweela wa ohikhala awuukhuwa naari okhala awuukhuwaxa ni yeeyo akina yuupuwelaaya vooloca sa yoowo. (Ahe. 12:​2-4) Owo aatikitheryen’ye mu opaka yookhwela ya Muluku.—Mat. 26:39.

19. Munoona hai vooloca sa nsina na Yehova, nave ntakhara heeni?

¹⁹ Ninniirumiha ni nsina na Yehova nave ninniisoona okhala oocicimiheya wiichaniwa Anamoona a Yehova. Woona wi nsina na Yehova ti noochuneyaxa wa hiyaano, nnaphwanela otitelela ocicimihaka nenlo naamwi akina eninyemulaka. Nsina na Yehova ti noochuneyaxa wa hiyaano opwaha yeeyo achu anuupuwelaaya wa hiyaano. Mwawiihiiha, nri oolakelela otitelela ocicimiha nsina na Yehova, moohipwacha yeeyo Satana onaweryeiye opaka ntakhara hiyaano. Mmukhalelo yoola, nnahaala wooniherya wi nsina na Yehova ti noochuneyaxa wa hiyaano, hiiha ntoko nryaaya noochuneya wa Yesu Kristu.