Munanwerya Opaka Makupa mu Waataana Wahu Weekiristu—Mwawiihai?
“Wa yowo mwili wothene, wotxophanyeriywa ni wolutxeleliwa phama.” —ÉFESO 4:16.
MACIPO: 53, 107
MWAAHAALA WAAKHULA HAI?
Ti mwawiihai nryaahu awiiwanana mmuteko woolaleerya?
Ichu taani nnaphwanelaahu opaka wi nikhaviherye muloko ahu okhala wawiiwanana?
Atheli enii ekhale hai awiiwanana?
1. Tiheeni eri yawooneya mmiteko sa Muluku ovinyerya woopaceryani?
YEHOVA ni Yesu ari awiiwanana ovinyerya wuupaceryani wa soopatuxiwa. Yehova aampatuxa Yesu ahaakumve opatuxa ichu ikina. Voocharela Yesu aalapa ni yoowo “ntoko mulipa òteka empa.” (Masiposipo 8:30) Akapuro a Yehova tho annalapa mwawiiwanana mmuteko anapharaaya. Ntoko yootakiherya, Noowa ni echoko awe yaampaka mwaaceya vamoha. Ohoolo waya, Aisarayeli yaalapa vamoha wi eteke ekaaxa ya nlakano, yeeyo yaahaala othaamihiwaka. Mu empa ya Muluku, awo yaaniipa vamoha macipo ni sooruma sooreeraxa wi emucicimihe Yehova. Achu a Muluku yaawerya weerano soothene seiya nthowa nawi yaari awiiwanana mukina ni mukhwaawe.—Maphatxuwelo 6:14-16, 22; Namarepela 4:4-32; 1 Matharihelo 25:1-8.
2. (a) Tiheeni yaari yawooneya mmuloko woopacerya Weekiristu? (b) Makoho taani nnahaalaahu othokororya?
2 Akiristu tho a nsana noopacerya yaari awiiwanana mukina ni mukhwaawe. Murummwa Paulo aaloca wi naamwi yaarino mavyakelo ni mirici soohiyana hiyana, awo yaari awiiwanana. Oothene yaanamuchara Muhooleli aya,Yesu Kiristu. Paulo aahaalikanyiha awo ni mwiili orino makupa oohiyanahiyana oothene yaawo analapa vamoha. (Mwaalakhanye 1 Korinto 12:4-6, 12.) Hanka vooloca sa olelo? Nnii niwerye hai wiiwanana mukina ni mukhwaawe mmuteko wa olaleerya, mmulokoni, ni veechokoni?
WIIWANANA MMUTEKO WOOLALEERYA
3. Eneneeryo taani murummwa Yohane aakhenleiye?
3 Mu nsana noopacerya, murummwa Yohane aahoona eneneeryo ya ankeelo athanu yoopaka mapeca. Vaavaa munkeelo aneethanu ompeiye nipeca nawe, Yohane aahoona “etheneri yathomon’we wirimu emorelaka vathi.” “Etheneri” eyo yaapharihela yoohulela wi ehuleno nlici nawiixa. Woopaceryani, munlicini waakhumamo mwiixi, nave voocharela mmwiisini waakhumamo misope. Opwaha onanariha munyepu naari miri, misope saahaapahula ‘atxhu yahirempwe vawutxi eneneryo ya Muluku.’ (Wupulula 9:1-4) Yohane aasuwela wi nikhuuru na misope nahaala onanariha sincipale; iho saaheerano yeeyo o Yiikuputu mu elukuluku ya Moose. (Mukwaha 10:12-15) Misope Yohane onneiye inaweemelela Akiristu awoocihiwa yaawo analaleerya michaka sakuru wa malapelo atheru. Nave macikhwi a akina yaawo anaweherya okumi veelaponi yavathi annakhala ni yaawo. Vamoha, ari awiiwanana mmuteko aya woolaleerya. Muteko yoola onnaakhaviherya achu ancipale okhuma mu malapelo atheru nave okhala ootaphuwa mu ohoolela wa Satana.
4. Muteko taani achu a Muluku anapakaaya, nave tuuvi ori mukhalelo mmoha wa weerano yeeyo?
4 Nookhalano murici wa olaleerya “mutxhaka” waphaama wa achu orukurerya elapo ehaakumve makuchuwelo. Ola muteko mutokweene! (Mateu 24:14; 28:19, 20) Nnaphwanela waawopa oothene yaale arino “nthanana” wi ewurye “mahi a ekumi,” eyo ti wi, nnachuna waahusiha eparipari ya Piipiliya oothene yaale anachuna wiiwexexa. (Wupulula 22:17) Nyenya nnahaala weerano eyo wakhala wi ‘notxophanyeriywa’ nave ninniiwanana mukina ni mukhwaawe mmulokoni.—Éfeso 4:16.
5, 6. Ti mwawiihai nryaahu awiiwanana mu olaleerya michaka saphaama?
5 Naariki naaphwanye achu ancipale, onachuneya wiirehererya phaama mmuteko ahu woolaleerya. Ohoolela nnaakhelaahu mmulokoni onnanikhaviherya weerano yeela. Namala owiriyana muthukumano wa mmacani, ninnaya oloca ni achu sa michaka saphaama sa Omwene. Ninnavaha tho soolaleeryiwa vooloca sa Piipiliya. Mweeparipari, ninnakawa macikhwi a soolaleeryiwa seiya orukurerya elapo. Ikwaha ikina ninnavekiwa opaka makupa mu olaleerya wavameekhaaya. Vaavaa munapakaanyu yeela, munakhala awiiwanana ni macikhwi a akina orukurerya elapo yaawo analaleerya muchaka mmohamoha! Nyuwaano munnalapa tho ni ankeelo, yaawo anaakhaviherya achu a Muluku olaleerya michaka saphaama.—Wupulula 14:6.
6 Ohakalala taani nnakhalaahuno waalakhanya mu Anuário vooloca sa muteko woolaleerya wa elapo yoothene! Muupuwele tho vooloca sa mukhalelo nryaahu awiiwanana orukurerya elapo vaavaa nnaawopahu achu ntakhara muthukumano wa muceche. Mmithukumano seiyo, oothene ninnawiriyana sooleeliherya imohamoha. Miyaha, itrama, ni sawooniherya sinnanceenyerya omvaha Yehova owetha wahu. Ninnakhala tho awiiwanana ni anna ni arokora ahu orukurerya elapo vaavaa nnaphiyaahu va Mukonelo eyaaka eri yoothene. (1 Korinto 11:23-26) Ninnathukumana vamoha mu elukuluku emohamoha, mu oneela wa nsuwa 14 a Nisaani, wi nooniherye othamalela wahu wa yeeyo Yehova opankeiye wa hiyo ni wiiwelela nlamulo na Yesu. Nave mu esumana ohaakumve Mukonelo, ninnalapa vamoha wi naawope achu ancipale wi nikhale vamoha mu yaweereya yeela yookhweleya.
7. Vaavaa nnalapaahu mwawiiwanana, tiheeni nnaweryaahu opaka?
7 Musope mmoha honawerya onanariha sincipale. Nave tho muchu mmoha, hawerya waalaleerya achu oothene. Nyenya woona wi nnalapa vamoha, ninnawerya waaleela macikhwi a achu vooloca sa Yehova ni waakhaviherya akina omucicimiha ni omuthamala yoowo.
WIIWANANA MMULOKONI
8, 9. (a) Niphwanaphwaniho taani Paulo opharihenleiye wi aahusihe Akiristu okhala awiiwanana? (b) Nnii niwerye hai wiiwanana mmulokoni?
8 Paulo aathariha wa Aefeso mukhalelo muloko onakhalaaya wooreheryeya, nave aaloca wi oothene mmulokoni annachuna ‘winnuwa mwa sothene.’ (Mwaalakhanye Éfeso 4:15, 16.) Paulo aapharihela yootakiherya ya mwiili wi atharihe wi Mukiristu ori oothene onanwerya okhaviherya muloko okhala wawiiwanana ni omuchara Yesu, Muhooleli a muloko. Owo aaloca wi makupa oothene a mwiili ‘annakumanela wa solutxelela sothene ni mulapelo wowiwanana wa emohamoha aya.’ Mwawiihiiha honaphwacheya naari amiravo, awunnuwela, naarino ekumi yaphaama naari hooye, tiheen muchu ti muchu onaphwaneleiye opaka?
9 Yesu onnaathanla atokweene wi ehoolele muloko, nave onachuna wi naacicimeheke yaawo nave nicharihe ohoolela ananivahaaya. (Ahebri 13:7, 17) Wiiliwiili eyo tahi yookhweya weerano. Nyenya nnaphwanela oveka nikhaviheryo na Yehova. Munepa awe waweela onahaala onikhaviherya wiiwelela ohoolela woothene atokweene ananivahaaya. Muupuwele tho mukhalelo nneeraahu nikhaviherye muloko wakhala wi nri awiiyeviha nave ninniiwanana ni atokweene. Muloko ahu onahaala okhala wawiiwanana, nave osivelana wahu onahaala wunnuwa.
10. Arummwa oorumeela anakhaviherya hai wiiwanana wa muloko?
10 Arummwa oorumeela tho annakhaviherya wiiwanana wa muloko. Awo annalapa mwakuru wi yaakhaviherye atokweene, nave hiyaano ninnathamalela soothene awo anapakaaya. Ntoko yootakiherya, arummwa oorumeela anniilipixerya wi nikhaleno soolaleeryiwa soophwanelela wi nipharihele mu orummwa, nave awo annawaakhela yaawo anarwa mmithukumano sahu. Annalapa tho mwakuru wi erehererye Empa ya Omwene okhala yaphaama. Vaavaa nniiwananaahu ni anna yaala, ninnakhala awiiwanana nave ninnamurumeela Yehova mmukhalelo wooreheryeya.—Mulikanyihe ni Saweriwa T’arummwa 6:3-6.
11. Tiheeni amiravo anaphwanelaaya opaka wi ekhaviherye muloko okhala wawiiwanana?
11 Atokweene akina annalapa mwakuru mmulokoni mu iyaakha sincipale. Nyenya awo hanawerya olapa ntoko yeerelaaya khalai woona wi annuuluvala. Anna ari amiravo ananwerya waakhaviherya. Wakhala wi aavyakihiwa, ananwerya okhalano mirici mincipale mmulokoni. Nave wakhala wi arummwa oorumeela annalapa mwakuru, anahaala orumeela ntoko atokweene omwaahiyu. (1 Timóteo 3:1, 10) Amiravo akina ari atokweene annaya vahoolo. Akina anarumeela ntoko ooweherya aweececa nave annaakhaviherya anna ni arokora mmiloko mincipale. Hiyaano ninnaathamalela amiravo aniilipixeryaaya waarumeela anna ni arokora.—Mwaalakhanye Salumu 110:3; Eklesiyaste 12:1.
WIIWANANA VEECHOKONI
12, 13. Tiheeni enahaala waakhaviherya oothene a veechokoni okhala awiiwanana?
12 Nnii naakhaviherye hai achu a veechokoni vahu wiiwanana mukina ni mukhwaawe? Okhalano malapelo eechoko esumana eri yoothene enahaala onikhaviherya. Vaavaa asitiithi ni anaaya anamalihaaya elukuluku vamoha ehuseryaka vooloca sa Yehova, osivelana waya mukina ni mukhwaawe onnannuwa. Nave vaavaa ananwiriyanaaya mukina alocaka eparipari nave enawoona oothene a veechokoni emusivelaka nave emucicimiha Yehova annaataana mukina ni mukhwaawe.
13 Atheli enii yiiwananeke hai mukina ni mukhwaawe? (Mateu 19:6) Vaavaa oopiili anamusivelaaya ni omurumeela Yehova vamoha, anahaala okhala oohakalala ni awiiwanana mu othela waya. Anaphwanela tho osivelana mukina ni mukhwaawe hiiha ntoko yenraaya Aaparahamu ni Saara, Isaki ni Repeka, ni Elkana ni Aana. (Maphatxuwelo 26:8; 1 Samuwele 1:5, 8; 1 Pedro 3:5, 6) Vaavaa atheli aneeraaya yeela, awo annakhala awiiwanana mukina ni mukhwaawe nave annamwaacamela Yehova.—Mwaalakhanye Eklesiyaste 4:12.
14. Wakhala wi oothelana anyu hanamurumeela Yehova, tiheene munaphwanelaanyu opaka wi othela wanyu okhale woolipa?
14 Mwawooneya Piipiliya onnaloca wi hannaphwanela othelana ni muchu ohinamurumeela Yehova. (2 Korinto 6:14) Nyenya aakhalavo anna ni arokora yaawo oothelanaaya ohiri Namoona a Yehova. Akina ahusenrye eparipari emanle othela naari otheliwa, nave oothelana aya tahi Namoona. Akina akhweya oothelanaaya aari kapuro a Yehova, nyenya akhuma mmulokoni. Mmikhalelo seiya, Akiristu oothene annapaka yeeyo anaweryaaya wi othela waya okhale woolipa moorweela wa wiiwelela ekano ya Piipiliya. Wiiliwiili honi okhale wookhweya. Ntoko yootakiherya, Mariya ni iyawe Tavite, yaanamurumeela Yehova vamoha. Voocharela Tavite haaya mmithukumano. Nyenya Mariya aatitelela okhala mwaara aphaama nave aanooniherya mikhalelo Seekiristu. Mariya tho aahaahusiha anamwane awe athanu nammoha vooloca sa Yehova nave aatitelela ophiya mmithukumano sa muloko ni sa miceche. Eyaakha ohoolo waya, vaavaa anamwane yunnunwaaya nave oothene ekhumavo vaate, Mariya aatitelela omurumeela Yehova naamwi yaakhala yoovila wa yoowo. Nyenya voocharela, Tavite aapacerya waalakhanya irevista seiyo Mariya amvaheiye. Woovira wa elukuluku, Tavite aapacerya ophiya mmithukumano. Musulwa awe a iyaakha thanu nammoha wiiliwiili aanakhapelela nipuro wi owo akiraathivo, nave wakhala wi Tavite hakelewo omuthukumano ponkwe owo aanaloca: “Olelo nkiwonneeni omuthukumanoni taata.” Tavite aamukookela Yehova ivinrevo iyaakha 25, nave vamoha ni mwaariye ari oohakalala woona wi vano annamurumeela Yehova vamoha.
15. Atheli ari awunnuwela enii yaakhaviherye hai atheli ari amiravo?
15 Olelo Satana onnahiphela ichoko. Ti nthowa nene mulipa oothela ni mwaariye anamurumeela Yehova anachunaaya wiiwanana mukina ni mukhwaawe. Moohipwacha elukuluku muryaanyu atheli, muupuwele yeeyo munaphwanelaanyu oloca naari opaka wi mulipihe othela wanyu. Wakhala wi mwa mutheli awunnuwela, munanwerya okhala yootakiherya yaphaama wa atheli ari amiravo. Akhweya munanwerya waawopa atheli ari amiravo wi yuuke vamoha mmalapelo anyu eechoko. Awo anahaala woona wi hoonapwacheya waaca wa elukuluku evinrevo ntoko atheli, anaphwanela wooniherya osivela mukina ni mukhwaawe nave ekhale awiiwanana.—Tito 2:3-7.
“MURWE, NIWELE MWAKO W’APWIYA [YEHOVA]”
16, 17. Tiheeni akapuro awiiwanana a Muluku anaweheryaaya?
16 Vaavaa Aisarayeli yayaaya opaka efesta o Yerusalemu, awo yaaniiwanana mukina ni mukhwaawe. Awo yaanarehererya echu yoothene yaari yookhweleya mmukwahani. Voocharela, awo yaaneecha vamoha nave yaanakhaviheryana. Mu empa ya Muluku, awo yaanamucicimiha ni omulapela Yehova vamoha. (Luka 2:41-44) Olelo, vaavaa nniirehereryaahu ntakhara okumi mu elapo yahiihaano, ninnachuna okhala awiiwanana nave weera yoothene nnaweryaahu wi niiwanane mukina ni mukhwaawe. Apwanne munnuupuwela makupa munaphwanelaanyu orehererya?
17 Mu elapo yeela achu haniiwanana nave annawana ntakhara ichu sincipale. Nyenya hiyaano ninnamuthamalela Yehova onanikhaviherya okhalano murecele ni wiiwexexa eparipari! Achu awe orukurerya elapo annamulapela mmukhalelo yoowo onachuneiye. Nyenya xaxaxa mmahiku yaala ookuchula, achu a Yehova ari awiiwanana opwaha khalai. Ntoko alipa a miririmo Isaiya ni Mikeya, hiyaano ninnawela va “mwako w’Apwiya [Yehova]” vamoha. (Isaiya 2:2-4; mwalakhanye Mikeya 4:2-4.) Ohakalala taani nki nnahaalaahu okhalano omwaahiyu vaavaa achu oothene veelaponi yavathi eneeraaya ekhale ‘otxophanyeriywa’ ni awiiwanana mukina ni mukhwaawe mu omulapela Yehova!
[Ekaaxa va epaaxina 22]
MASU ATHARIHIWE
Akapuro a Muluku anniiwanana mukina ni mukhwaawe: Mmulokoni, ninnachariha ohoolela woothene nnaakhelaahu. Vaavaa nnalaleeryaahu, ninnalapa vamoha ni anna ni arokora ahu. Mu echoko ahu, ninnooniherya osivela mukina ni mukhwaawe nave wiiliwiili ninnapaka malapelo eechoko vamoha
Akapuro a Muluku anniiwanana mukina ni mukhwaawe: Moohipwacha nipuro nryaahuvo, oothene ahu nnamulapela Yehova nave ninnamwiiwelela Muhooleli ahu, Yesu. Woona wi oothene ninnalaleerya, ninnawerya waaleela macikhwi aachu orukurerya elapo vooloca sa michaka saphaama. Nave tho, oothene ahu ninniiwelela ekano yoorweela Mpiipiliyani yeeyo enanikhaviherya omucicimiha Yehova vamoha