Ester
4 Vaavaa Mortekayi aasuwenleiye soothene seeren’ye, aahaahula soowara sawe, awara esakhwi nave iihela ecuurwa. Voocharela owo aavira veeri va epooma anlaka vatokotoko wa nthowa na osoosiwa murima. 2 Owo aaheeca ophiyerya va mulako mutokweene wa vaate va mwene, woona wi haavo eemereryiwa ovolowa vamulako mutokweene wa vaate va amwene awanre esakhwi. 3 Mu iprovinsiya soothene masu ni nlamulo na amwene saaphin’yaaya, Ayuta yaanathanana vatokotoko, wiinanela olya, winla ni wiikhupanyerya. Ancipale yaakona vasakhwini ni vacuurwaani. 4 Vaavaa anamuteko aasithiyana ni a ewunuku a Ester, mwaara a mwene,* yaamulenlaaya yeeyo yeereya, owo aatepa othanana. Voocharela owo aarumiha soowara wa Mortekayi wi aware ni orula isakhwi, nto owo heemerenrye. 5 Mwa yeela, Ester aamwiichaniha Hataki, mmoha a ewunuku* a mwene yoowo aathanliwe wi amurumeeleke Ester, nave amuruma wi amukohe Mortekayi ntakhara heeni eereiye yeeyo nave tiheeni yeereya.
6 Mwawiihiiha, Hataki aaya oloca ni Mortekayi va n’yate na epooma nenlo naari ohoolo wa mulako mutokweene vaate va mwene. 7 Mortekayi aamuleela soothene seeren’ye nave aaloca waaca wa ikhorowa seiho Hamani aaroromelinheiye oliva mu nipuro na muhakhu wa mwene wi etoloxiwe Ayuta. 8 Aamunnya tho ekaarata waarempwevo nlamulo naalaleiwe o Susani* nenlo naaloca sa otoloxiwa waya. Owo aaphwanela omooniha ni omutharihela Ester, ni omuleela wi aye wa mwene wi aveke mahala ni ikharari ntakhara achu a nloko nawe.
9 Hataki aakooka nave aamuleela Ester yeeyo Mortekayi aalonceiye. 10 Ester aamuruma tho Hataki wi amuleele Mortekayi ariki: 11 “Anamuteko oothene a mwene ni achu a iprovinsiya sa mwene aasuwela wi wakhala wi mulopwana naari muthiyana oovolowa mu esaala ya mpuwa ya mwene ahiichaniwe, nrivo pahiru nlamulo nimoha nnaphwanela ophariheliwa: Muchu owo onamwiiphiwa. Pahiru onahaala otitelela okhala mukumi wakhala wi mwene oomuthoonya ni ekopo awe yoomwene ya ooru. Wa miyaano, vano annaviravo mahiku makhumi mararu* kihiichaniwe wa amwene.”
12 Vaavaa Mortekayi aaleeliweiye yeeyo Ester aalonceiye, 13 owo aamwaakhula Ester ariki: “Ohuupuwele wi wanthowa na okhala vaate va mwene onahaala okophola waapwaha Ayuta akina. 14 Vano wakhala wi weyo woomaala, otaphuliwa ni woopoliwa wa Ayuta onahaala orweela mmakupa makina, nyenya weyo ni ahimaa munahaala otholowa. Nave taani onasuwela waakhanle wi okhanle mwaara a mwene* wi okhaviherye mu elukuluku si yeela?”
15 Voocharela Ester aarumiha masu oomwaakhula Mortekayi ariki: 16 “Haweni, mwaathukumanye Ayuta oothene ari o Susani* nave mwiinanele olya ntakhara miyo. Mmahiku mararu, ohiyu ni othana, muhilye naari owurya, nave miyo tho ni anamuteko aka aasithiyana nnamwiinanela olya. Kinamuya wa amwene, naamwi nlamulo niheemereryaka. Nave wakhala wi kinahaala okhwa, kakhwe.”* 17 Mwawiihiiha, Mortekayi aapwaha nave eerano soothene Ester aamulenleiye.