Ester
6 Ohiyu ene yoole, mwene haawenrye okona.* Wanthowa nenla, owo aalamulela oruuhiwa liivuru a saweereya sa mamwene a elukuluku yeele, nave aahaalakhanyiwa wa mwene. 2 Nave yaaphwanya makupa waarempwevo wi Mortekayi aamulokoha Pikitana ni Teresi, anamuteko eeli a mwene, alipeleli a mulako, yaawo yaavaanenle omwiipha* Mwene Asuweru. 3 Mwene aakoha: “Tiheeni Mortekayi eereliweiye wi acicimihiwe ni othamaleliwa ntakhara yeela?” Akhaviheryi a mwene yaahaakhula: “Heereliwe echu.”
4 Ohoolo waya, mwene aakoha: “Taani ori vaate?” Hamani iiha avolonwe vaate va mwene, wi amveke mwene wi Mortekayi athomeiwe va mwiri yoowo aareherenryeiye. 5 Akhaviheryi a mwene yaahaakhula: “Ti Hamani ori vaate.” Mwawiihiiha mwene aahi: “Mmuleele avolowe.”
6 Vaavaa Hamani aavolonweiye, mwene aamukoha: “Tiheeni enaphwanela weeriwa wa muchu yoowo mwene onachuneiye omucicimiha?” Hamani aahuupuwela mmurimani mwawe: “Taani mwene onachuneiye omucicimiha kihikhanle miyo?” 7 Mwawiihiiha, Hamani aamwaakhula mwene: “Muchu yoowo mwene onachuneiye omucicimiha, 8 siruuhiwe soowara soomwene seiho mwene onawareiye ni kavalo yoowo mwene onanweleiye nave kavalo owo awarihiwe ekhara yoomwene mmuruni mwawe. 9 Soowara ni kavalo sinnyereryiwe wa mmoha a asitokweene oocicimiheya a mwene, nave enaphwanela onwariha muchu yoowo amwene anachunaaya omucicimiha ni onweliha va kavalo ni omweeciha veeri va epooma. Awo anaphwanela omvuwihaka yoowo eriki: ‘Ti yeela oneereliweiye muchu yoowo amwene anachunaaya omucicimiha!’” 10 Vaavaa mwene aahi wa Hamani: “Hawe mwawaakuveya! Wakuxe soowara ni kavalo, wamweerele Mortekayi, Muyuta, yoowo okiranthe vamulako mutokweene vaate va mwene soothene omanlaawe oloca. Ohooceele weerano echu emoharu mano wa soothene oloncaawe.”
11 Mwawiihiiha, Hamani aakuxa soowara ni kavalo, anwariha Mortekayi nave anweliha vakavaloni, apacerya omviriha veeri va epooma amvuwihaka ariki: “Ti yeela oneereliweiye muchu yoowo amwene anachunaaya omucicimiha!” 12 Voocharela, Mortekayi aachikela vamulako mutokweene vaate va mwene, nyenya Hamani aarowa mwawaakuveya, anlaka ni akhuneenle muru.* 13 Hamani aahaaleela amwaariye, Seresi, ni asinthamwene awe oothene ichu soothene saamweenre. Anamiruku awe ni mwaariye Seresi, yaahi wa yoowo: “Waakhanle wi Mortekayi, yoowo mpacenryaanyu omora vamiithoni vawe, ta nloko na Ayuta,* hamuwerya omvootha; chiryene, munahaala omora vamiithoni vawe.”
14 Nlelo erikimuloca ni yoowo, yaaphiya anamuteko a mwene nave emukuxa mwawaakuveya Hamani eyaakano o efesta yeeyo Ester aareherenryeiye.