Yupu
13 “Aa, miitho aka ahoona soothene seiha,
Maaru aka ahiiwa nave ahiiwexexa.
2 Yeeyo musuwenlaanyu, miyaano tho koosuwela;
Nkiri mukhaani wa nyuwo.
3 Wa miyo, kaamusiveliwa kaalonce ni mwaneene Aikuru Soothene;
Kinnachuna waakiha mulacu aka ni Muluku.
4 Nto nyuwo, munnakinyemula ni sawootha;
Oothene anyu muri mameetiku* oohiphuriha echu.
5 Yaamukhala phaama mwaarimoona omaala,
Eyo yaahaala wooniherya wi mwa achu a miruku.
6 Khwoo, nwiriyane masu aka,
Nave nwiriyane phaama wiisaakiha wa eyano aka.
7 Apwanne munahaala oloca moohookololowa mmwaakihaka Muluku,
Ni oloca sawootha mu nsina nawe?
8 Munachuna okhala mmakupa awe?*
Munachuna weererya waakiha mulacu wa Muluku eeparipari?
9 Apwanne onamooreerelamvo wakhala wi owo ohoovareryelaani?
Apwanne mwanwerya onwoka Muluku, hiiha ntoko mwaahaalaanyu weera ni muchu?
10 Mweeparipari owo onahaala woosamelaani,
Wakhala wi moheererya wooniherya nthalu moovitheya.
11 Apwanne ocicimiheya wawe howeerihaani okhala awoova
Nave woopiha wawe hiwoorweelaani?
12 Masu anyu a miruku ari ntoko masiposipo a ecuurwa;*
Wiisaakiha wanyu ti woovyavyaala ntoko oloko.
13 Mmaale, wi kiloce,
Voocharela, ekeere yeeyo eni yeereye!
14 Ntakhara heeni kiniikuhaaka va yawoopiha*
Ni okuha okumi aka mmatani mwaka?
15 Naamwi owo aweryaka okiipha, nlelo kinamuwehereryaka;
Kinamwaakiha mulacu aka* vamiithoni vawe.
16 Hiihaa, owo onamukhala nivuluxo naka,
Woona wi haavo muchu oonanara murima* onawerya wiiperekha vamiithoni vawe.
17 Mwiiwe phaama masu aka;
Nwiriyane phaama sooloca saka.
18 Moone, kohirehererya wi kaakihe mulacu aka;
Koosuwela wi kookhalano rasawu.
19 Taani oni avaanyihane ni miyaano?
Kaamaanle kaamukhwa!*
20 Khwoo Muluku, kinoovekaani pahiru ichu piili,*
Wi kihiipithe wa nthowa na nyuwo:
21 Mukerihe ocai wa miyo ntata nanyu noolimela,
Nave muheemererye wi owoovaani okoopopihe.
22 Mukiichane, nave miyo kinanwaakhulaani,
Naari mukihiye kiloce nave nyuwo mukaakhule.
23 Tisivi iri soohesa saka ni soocheka saka?
Mukoonihe ohiiwelela waka ni yoocheka aka.
24 Ntakhara heeni munavithaanyu ethoi anyu
Nave munakeera mwiicani anyu?
25 Apwanne nyuwaano munahaala weererya woopopiha nikukhu nenlo nnavavihiwa ni echeku
Naari wiikara manaxi awuuma?
26 Tiwi munnatitelela orepela sawootha soowaawa ntakhara miyo,
Nave munnakeeriha ohooxeya nthowa na soocheka kaapankaaka kiri mmiravo.
27 Munnamaka inaani saka va ikhukulu,
Munnahocahoca iphiro saka soothene,
Nave nyuwo munnavareryela inaani saka.