Yupu
12 Voocharela, Yupu aahaakhula:
2 “Mweeparipari nyuwo mwa achu oosuwela,*
Nave miruku inarwa ikhwa ni nyuwo!
3 Nto miyaano tho kinniiwexexa.*
Nkiri mukhaani wa nyuwo.
Taani ohinasuwela ichu seiha?
4 Kookhala echu yootheiha wa asinthamwene aka,
Muchu yoowo onamwiichana Muluku aavyaka naakhulo.
Muchu awookololowa murima ni oohikhalano nthowa, echu yootheiha.
5 Muchu ohinuukhuwa hanapwacha epahu,
Uupuwelaka wi eyo enaarweela pahiru yaale anakwaculiwa.*
6 Alipa a wiiya ari mmureceleni vaate vaya,
Nave yaale anamuroxa Muluku ta wiichaala,
Yaale arino muluku aya mmatani mwaya.
7 Nyenya khwoo, mwaakohe axinama, nave awo anamoohusihaani;
Mukohe tho ipalame sa wirimu, nave iho inamooleelaani.
8 Naari mvarerye* elapo, nave eyo enamoohusihaani;
Nave ihopa sa mphareya inamooleelaani.
9 Taani mwa seiha soothene ohisuwenle
Wi ntata na Yehova nipanke?
11 Apwanne maaru hanalawiha masu,
Hiihaa ntoko nlumi nnalawihaaya yoolya?
12 Apwanne miruku hinnaphwanyeya variyari va awuuluvala,
Nave apwanne wunnuwa honavaha osuwela?
13 Muluku torino miruku ni owerya;
Owo torino ophwanelela wa ovaha ikano nave tori oosuwelaxa.
14 Wakhala wi owo oomwarya echu, haavo tho onawerya oteka wanaawiili;
Yeeyo owo onawaleiye haavo muchu onawerya ohula.
15 Owo amaaliha epula, ichu soothene sinnuuma;
Owo arupiha epula, maahi annasareya veelaponi.
16 Owo ookhalano ikuru ni miruku soophara muteko;
Yoole onahuwela ni yoole onaahuweliha akina ari mmatani mwawe;
17 Owo onnawuuliha muru a miruku,
Nave onnaweeriha alipa oothoriha okhala alolo.
18 Owo onnawaakha owerya mamwene,
Nave onnaamaka muyuununi mwaya ni mikoi.
19 Owo onnawuuliha muru alipa a mukucho,
Nave owo onnaamoriha alamuleli yaawo yiitikithenrye;
20 Owo onnaamaaliha anamiruku yaaroromeliwa
Nave onnawaakha achu awuuluvala* osuwela waya wa ohiyaniha;
21 Owo onnaaruuhela munyemu achu oovuwa,
Nave onnaweeriha achu akuru okhala ooceecheya;*
22 Owo onnuupulula ichu sawiixeela sa weepiiphi,
Nave onneeriha omwaleela waaryela mmapuro ooriipa phii;
23 Owo onnaweeriha maloko okhala oowerya, wi aatoloxe;
Onnawinnuwiha maloko, wi aakerihe wookapuroni;
24 Owo onnaviihamo wiiwexexa* mwa ahooleli a achu
Nave onnaweeriha ohuwahuwa mutakhwani ohirimo mphiro.
25 Awo enneeca yaapareyaka mweepiphini, mwemmo ohirimo omwaleela;
Owo onnaweeriha ohuwahuwa ntoko anamuhapaliwa.