Salmu
LIIVURU ANAAWIILI
(Masalmu 42-72)
Wa muhooleli a macipo. Masikili* a anamwane a Kora.
42 Ntoko ekhomace yeeyo enachunaaxa maahi,
Miyaano tho kinnoochunaanixa* nyuwo, khwoo Muluku.
2 Hiiha ntoko muchu onakhaleiyeno nthanana na maahi, miyaano kookhalano nchuno ntokweene na Muluku mukumi.
Ti liini kineeraka kiwerye oya wiisooneiha vamiithoni va Muluku?
3 Miithori aka, teri yoolya aka othana ni ohiyu;
Nihiku noothene achu annakinyemula, ekohaka eriki: “Muluku aa ori woowi?”
4 Kinnuupuwela ichu seiha, nave kinnayeeha okumi* aka,
Woona wi kaakhovelela weeca ni muloko wa achu;
Kaaneeca ni murima woothene* ohoolo waya ophiyerya o empa ya Muluku,
Ni okhuwela wa ohakalala vamoha ni othamalela,
Wa muloko yoowo waachapela efesta.
5 Ntakhara heeni kihiryaakano ewehereryo?*
Ntakhara heeni kiryaaka awuukhuwaxa?
Kinamunweheryaka Muluku,
Woona wi nlelo kinahaala omucicimiha ntoko Mvuluxa aka Mutokotoko.
6 Khwoo Muluku aka, kooyeleela* eweheryeryo.
Ti nthowa nene kinawuupuwelaakaani nyuwo,
Mu elapo yo Yortano ni mmiyaako so Hermoni,
O mwaako Misar.*
7 Maahi awiixa anniichana maahi awiixa,
Wa oruma mmapuro anyu yaawo maahi anamoraayamo.
Macumuxa anyu oothene awuupa yaakihuruwela.
8 Othana Yehova onamukivaha osivela wawe woororomeleya,
Nave ohiyu ncipo nawe nnamukhala ni miyaano: Nivekelo wa Muluku a okumi aka.
9 Kinahaala oloca wa Muluku, mwala aka:
“Ntakhara heeni mukicuwanlaanyu?
Ntakhara heeni kaahaalaaka weecaka oothanana wa nthowa na ohooxa wa mwiicani aka?”
10 Ni wiica otokweene,* amwiicani aka annakiruwana;
Nihiku noothene awo annakinyemula, ekohaka eriki: “Muluku aa ori woowi?”
11 Ntakhara heeni kihiryaakano ewehereryo?*
Ntakhara heeni kiryaaka awuukhuwaxa?
Kinamunweheryaka Muluku,
Woona wi nlelo kinahaala omucicimiha ntoko Mvuluxa aka Mutokotoko ni Muluku aka.