Salmu
Wa muhooleli a macipo; wi ncharihiweke ni ikaruma sa mikoi. Salmu a Tavite.
61 Mwiiwe, khwoo Muluku, okhuwela waka ntakhara nikhaviheryo.
Nwiriyane nivekelo naka.
2 Kinarwa kikhuwela wa nyuwo ovinyerya weiwo elapo ekotenlaayawo
Vaavaa murima aka oneeraaya ohikhaleno ewehereryo.*
Mukikerihe va mwala woorekamaxa okipwaha miyo.
3 Tiwi nyuwo muri voochawelavo vaka,
Muconco woolipa yoowo onakikhapelela wa amwiicani.
4 Kinahaala okhala muleco mmuxakala anyu okhala wookhala;
Kinamuchawela mu nipuro nawiipithamo na mmuuphelo anyu. (Selaha)
5 Tiwi nyuwo, khwoo Muluku, mohiiwa malakano aka.
Mookinnyererya yoohiyeryiwa ya yaale anacicimiha nsina nanyu.
6 Munahaala waaceererya mahiku a okumi wa* mwene,
Iyaakha sawe inamukhala wa muyareriwo ti muyareriwo.
7 Owo onahaala okiraathi va munyukhu awe* okhala wookhala va miithoni va Muluku,
Mumvahe* osivela woororomeleya ni ororomeleya, wi iho imukhapelele okhala wookhala.
8 Mwawiihiiha, kinamwiipa macipo oocicimiha* nsina nanyu okhala wookhala,
Vaavaa kinakhwaaniheryaaka malakano aka nihiku ti nihiku.