Nnanwerya Wiikhalelaru Aweela
“Nyawani, . . . elihani mirima.”—YAK. 4:8.
SOOREPA INACHARELA SINOOKHAVIHERYAANI HAI WIIKHALELARU AWEELA?
1. Elapo enoona hai weela?
WEELA tahi wawunlaana. Eyo ti yawooneya xaxaxa mweelukuluku ahu. Mu ilapo sincipale, okonihana wa achu a mwiikho woolikana ni opaka sa mwiikho wa achu oohithela enooniwa okhala yaweemereryeya. Mukhalelo yoola wa okumi onnavuwihiwa mu mathatelo. (Sal. 12:8) Ocapaheya ti wawunlaana ophiyerya wi munanwerya okoha, ‘Apwanne chiryene ti wooweryeya okhalano okumi waweela?’ Naakhulo nahu ti nawi: Aai, nnikhaviheryo na Yehova, Akiristu ananwerya wiikhalelaru aweela.—Mwaalakhanye 1 Atesalonika 4:3-5.
2, 3. (a) Ntakhara heeni ti woochuneya owaniha ni minkhela soonanara? (b) Tiheeni nnahaalaahu othokororya mmwaha yoola?
2 Woopacerya, nnaphwanela osuwela wi, naariki nikhaleno okumi waweela, nnaphwanela okhooca minkhela soonanara. Hiiha ntoko nimeso nnaweryaaya olekecha ehopa, muupuwelo woonanara ni minkhela sootakhala—wakhala wi hisikwateleliwe—inahaala wunnuwa ni omuuwiha Mukiristu. Iho inanwerya ovolowela mwiili ahu wooceecheya ni oneeriha opaka yoocheka. Moovira wa elukuluku, owoka wa yoocheka onahaala waaceereryeya ophiyerya wi yoochuna ekhale etokweene. Mweelukuluku yeeyo, vaavaa enakhumelelaaya ekari naamwi ari mulapeli a Yehova onahaala weera mwawiiwanana ni minkhela awe. Aai, “minkhela eyo . . . ennarúha sonanara.”—Mwaalakhanye Yakobo 1:14, 15.
3 Ti yootikhiniha mukhalelo minkhela inunnuwaaya ophiyerya ekhala yoocheka etokweene. Nyenya ti yoolipiha osuwela wi, nnaphwanela osepa meecelo oonanara wi nrapele sookhumelela sa minkhela soonanara! (Akal. 5:16) Hankooni nthokororye ichu raru inahaala onikhaviherya owaniha ni minkhela soonanara: onthamwene ahu ni Yehova, ekano ya Masu a Muluku nnikhaviheryo na Akiristu awunnuwa omunepani.
“MWACHAMELENI MULUKU”
4. Ntakhara heeni ti woochuneya omwaacamela Yehova?
4 Ekano ya Piipiliya wa yaale anachuna ‘omwachamela Muluku’ ti ela: “Nyawani, . . . elihani mirima.” (Yak. 4:8) Vaavaa nnacicimihaahu onthamwene ahu ni Yehova, ninniilipixerya omuhakalaliha mmikhalelo soothene sa okumi ahu, ophitaanyerya muupuwelo ahu. Ninnachuna okhala “éparipari [aweela] murima” orweela wa wuupuwelela yeeyo eri yaweela ni yasisapo. (Sal. 24:3, 4; 51:6; Afil. 4:8) Yehova onniiwexexa ohiphaameya wahu. Owo oosuwela wi ninnakhalano minkhela soohiphwanelela. Ninnasuwela wi ennamuthananiha vaavaa nnannuwihaahu minkhela soonanara ohiya wiilipixerya okhooca. (Map. 6:5, 6) Wuupuwelela yeela enahaala onikhaviherya wiilipixerya okhalano sawaanyiherya saphaama.
5, 6. Nivekelo nnahaala onikhaviherya hai owaniha minkhela soonanara?
5 Mukhalelo mmoha wa wooniherya wi ninnamuroromela Yehova ori ophitaanyerya mu nivekelo mwaha wa owaniha sawaanyiherya soonanara. Vaavaa nnamwaacamelaahu Yehova mu nivekelo, owo tho onnanaacamela. Owo onnanivaha munepa awe waweela mahaleene, alipihaka yoolakelela ahu ya okhooca sawaanyiherya soonanara ni wiikhalelaru aweela. Mwawiihiiha, nimuleele Muluku yoochuna ahu ya omuhakalaliha ni sawuupuwelela sa mmurimani mwahu. (Sal. 19:14) Apwanne ninnaveka wi anaalikhele, oone “mechelo ónanara”—minkhela naari mathitimanelo oohiphwanelela—seiyo inaahaala onikeriha mu yoocheka? (Sal. 139:23, 24) Apwanne ninnamveka moohihiyererya wi anikhaviherye okhapelela ororomeleya wahu vaavaa nneehiwaahu?—Mat. 6:13.
6 Akhweya meecelo ahu akhalai ahunnuwiha mpuwa mwahu nchuno na opaka yeeyo Yehova onawatiiheiye. Naamwi hiiha, owo onahaala onikhaviherya opaka matorokelo anachuneya wi ntitelele omurumeela mwaweemereryeya. Mwene Tavite aahoona yeela. Amanle opaka mararuwo ni Patesepa, Tavite aamveka Yehova: “Mukipachusherye murima wawéla . . . Mureherye munepa wootikitheryeya mpuwa mwaka.” (Sal. 51:10, 12) Meecelo oonanara ananwerya ovolowela mwiili ahu wooceecheya, nyenya Yehova onahaala otikitherya mpuwa mwahu munepa waphaama, nchuno na omwiiwelela. Naamwi minkhela soonanara sitikitheryen’ye ni onanariha muupuwelo ahu, Yehova onahaala onihoolela wi niwerye wiiwelela malamulo awe ni okhalano mphurelo onarweela wa okhala mwawiiwanana ni yaawo. Owo onahaala onikhapelela wi echu yoopahula ehinivolowele.—Sal. 119:133.
MUKHALE AWEERANO MASU
7. Masu a Muluku anahaala onikhaviherya hai osepa sawaanyiherya soonanara?
7 Yehova onnaakhula mavekelo ahu moorweela wa Masu awe, Piipiliya. Miruku inaphwanyeya mu Masu a Muluku “enapacherya okhala yawéla.” (Yak. 3:17) Omwaalakhanya Piipiliya mahiku oothene ni wuupuwelela yeeyo nnaalakhanyaahu enahaala onikhaviherya osepa sawaanyiherya soonanara. (Sal. 19:7, 11; 119:9, 11) Mwawaaceererya, Piipiliya ookhalano sootakiherya ni ikano sookwakwaleya seiyo inahaala onikhaviherya ohimorela mu minkhela soonanara.
8, 9. (a) Tiheeni yaamweerinhe mmiravo mmoha opaka mararuwo ni muthiyana oocapaheya? (b) Mikhalelo taani sa mutano inalikana ni yootakiherya enaphwanyeya mu Masiposipo ecima 7?
8 Mu Masiposipo 5:8, BNM, ninnaalakhanya: “Omurakamele muthiyana yowo [oocapaheya], ohatxamele mulako w’empawe.” Yookhumelela yawoopiha ya ohiiwelela ekano yeela ennooniheryiwa mu ecima 7, enaloca sa mmiravo yoowo oneeca ayaaka waacamela empa ya muthiyana oocapaheya. Ohiyu waanaacamela. Va mphironi, muthiyana onnamwaacamela yoowo akhweya owanre soowara sawooneela. Owo onnamukhupaarela nave onnamunuula. Masu awe oolekecha annatannya nchuno mpuwa mwa mmiravo yoowo onakhala ntoko hawerya osepa. Awo annapaka mararuwo. Mwawooneya, mmiravo ola haalakelenle opaka mararuwo. Owo toolosowa nave haarino muupuwelo waphaama. Naamwi hiiha, owo aahooxeya ni sookhumelela soothananiha sa meecelo awe. Waahaala okhala waphaama ari ocai wa muthiyana ole!—Masi. 7:6-27.
9 Apwanne nnanwerya wooniherya olosowa yoowo, akhweya niihelaka mmukhalelo waweeha yoowo waahaala otannya minkhela soonanara mpuwa mwahu? Ntoko yootakiherya, ohiyu marehereryo a TV hanathanlela miyaha saya. Hanka wakhala wi vakina vaya ninnoona makupa yaawo a TV? Akhweya moohichuna nnanwerya ochara soothoonyerya mu interneti naari ochekula mu interneti seiyo inavuwiha epwitikiri naari meerelo makina a mwiikho. Mmukhalelo yoowo nnahaala okumana ni echu enahaala otannya minkhela soohiphwanelela ni onanariha yoolakelela ahu ya okhala aweela.
10. Ntakhara heeni wooseelelana ti wawoopiha? (Moone eruku yoopacerya.)
10 Mukhalelo mukina Piipiliya onanikhaviheryeiye ori moorweela wa onivaha ikano vooloca sa mukhalelo wa waakhaliha achu a mwiikho woohiyana. (Mwaalakhanye 1 Timoteo 5:2.) Ekano yeela chiryene heneemererya wooseelelana. Akina anoona wi opaka ineneeryo ni mwiili ni oweha mwa wooseelela tahi yoonanara woona wi honavolowela otannya mwiili wa mukina. Nyenya wooseelelana, onanwerya otannya muupuwelo woonanara yoowo onahaala ohoolela opaka mararuwo. Ela enneereya opacerya khalai—nave enahaala tho weereya.
11. Yootakiherya taani Yosefe otikithenryeiye?
11 Yoosefe aahooniherya miruku mmwaha yoola. Vaavaa mwaara a pwiyawe, Potifare, eerenryeiye omulekecha, Yoosefe aakhooca. Nyenya muthiyana ole haavolonle. Nihiku nnihiku aananwopa Yoosefe wi akhale ni yoowo. (Map. 39:7, 8, 10) Mwawiiwanana ni mulipa oomwaalikhela Piipiliya, mwaara a Potifare aari ntoko aaloca wi: “‘Hanko nikhale vamoha mu elukuluku vakhaani,’ aweheryaka wi Yoosefe eerevo echu.” Nyenya, Yoosefe aari oolakelela ohaakhulela, naari weemererya mavyakelo awe oolekecha. Owo aakhooca wooseelela wawe, nave haakhulenle, asepaka wi minkhela soonanara sihunnuwe mmurimani mwawe. Vaavaa aamukhinyerenryeiye wi akoneno, Yoosefe mwawaakuveya, “àmuhiyerya muthiya yòwara ele mmatani, àkhumamo mpa ni àtxhawa.”—Map. 39:12, BNM.
12. Nnasuwela hai wi yeeyo nnawehaahu enanwerya ovolowela murima ahu?
12 Piipiliya tho onnanlopola woopiha wa weemererya wi miitho ahu ehuwelihe murima ahu. Miitho oohithokororya ananwerya otannya naari waaceererya minkhela soonanara sa mwiikho. Yesu aalopola wi “yowo óweha muthiana ni omukhalela nrima vavo arimraruwano hihano m’murimani mwawe.” (Mat. 5:28) Muupuwele yeeyo yeeren’ye ni Mwene Tavite. Ari osulu wa empa awe, Tavite “àmona muthiyana arapaka.” (2 Sam. 11:2, BNM) Owo haawenrye opheruxa miitho awe ni wuupuwelela echu ekina. Eyo yaamweeriha omuchuna muthiyana yoowo aari mwaara a mwaneene nave aapaka marehereryo wi apake mararuwo ni yoowo.
13. Ntakhara heeni ti woochuneya ‘olipela’ ni miitho ahu, nave eyo enaphitaanyerya eheeni?
13 Wi nsepe sawaanyiherya soonanara, nnaphwanela ‘olipela’ ni miitho ahu, hiiha ntoko Yupu eenreiye. (Yobi 31:1, 7, 9, BNM) Nnaphwanela olakelela ovareryela miitho ahu oheemererya wi enwehe muchu mukina ni nchuno. Eyo enaphitaanyerya ohiweha iruku inavuwiha ocapaheya, mu ekhankoonya, va exiri, mu liivuru naari nipuro nikina.
14. Nnii niphure hai ekano ya wiikhalelaru aweela?
14 Wakhala wi mwawiiwanana ni yeeyo nthokoronryaahu mohoona makupa munaphwanelaanyu orehererya mu owaniha wanyu ni minkhela soonanara, mweerevo echu mwawaakuveya. Mwiiwelele ekano ya Masu a Muluku ni murima woothene, eyo enahaala wookhaviheryaani osepa yoocheka ni wiikhalelaru aweela.—Mwaalakhanye Yakopo 1:21-25.
“TÍTCHANE ATOKWENE A MULOKO”
15. Ntakhara heeni ti wookhweleya waavya nikhaviheryo wakhala wi ninnawaniha ni minkhela soonanara?
15 Wakhala wi ninnawaniha ni minkhela sa opaka sa mwiikho, Akiristu akhwiihu ehime ekina ya nikhaviheryo. Mweeparipari, othokororya ni akina mwaha ntoko yoola tahi yookhweya. Nyenya otheteya mwaha ahu moolipa murima wa Mukiristu awunnuwa omunepani nave onanipwacha enahaala onikhaviherya okwatelela minkhela soonanara. (Masi. 18:1; Ahe. 3:12, 13) Oloca sooceecheya sahu ni Mukiristu awunnuwa omunepani enahaala onikhaviherya wiiwexexa phaama mukhalelo ahu. Ela enahaala oneeriha opaka matorokelo anachuneya wi niikhapelele mu osivela wa Yehova.
16, 17. (a) Atokweene mmulokoni enii yaakhaviherye hai yaale anawaniha ni minkhela soonanara? Mooniherye. (b) Ntakhara heeni yaale anoona epwitikiri ti yaphaama oveka nikhaviheryo?
16 Atokweene a mmulokoni aakhalano ophwanelela wa onikhaviherya. (Mwaalakhanye Yakopo 5:13-15.) Mmiravo mmoha o Prasili aanawaniha ni soochuna soonanara mu iyaakha sincipale. Owo onnaloca: “Kaanasuwela wi sawaanyiherya saka saanamunanara Yehova, nyenya kaanuuliwa muru waaleela akina mukhalelo aka.” Moohakalaliha, mutokweene mmoha a mmulokoni aamwaacamela nave aamuceenyerya waavya nikhaviheryo. Mmiravo owo onnuupuwela: “Kaatikhiniheya ni epewe ya atokweene ntakhara miyo, yaakiiwexexa vancipale opwaha vaavaa kiisoonaaka. Awo yaawiriyana phaama makacamiho aka. Yaampharihela Piipiliya wi ekooniherye osivela wa Yehova ntakhara miyo, nave yaavekela vamoha ni miyaano. Eyo yaaheeriha wi okhale wookhweya weemererya ekano yaakivanhaaya.” Iyaakha ohoolo waya, amanle oya ohoolo omunepani, owo aaloca: “Vano kinoonaaka wi ti woochuneya waavya nikhaviheryo ohiya weererya oteexa micapara muchu mukhateiye.”
17 Waavya nikhaviheryo ti woochuneya xaxaxa wakhala wi minkhela soonanara inarweela mu yookhovelela ya woona epwitikiri. Vaavaa muchu onalekeleiye oveka nikhaviheryo, minkhela soonanara inahaala waaceereryeya ekumiheryaka yoocheka yeeyo enahaala waathananiha akina ni onyemuliha nsina na Yehova. Nchuno na omuhakalaliha Yehova ni wiikhalelaru mmulokoni Weekiristu ninnaweeriha akapuro ancipale a Muluku weemererya nikhaviheryo nawe.—Yak. 1:15; Sal. 141:5; Ahe. 12:5, 6.
MULAKELELE WIIKHALELARU AWEELA!
18. Tiivi eri yoolakelela anyu?
18 Vaavaa meecelo a elapo ya Satana anatitelelaaya okhala, Yehova onnahakalala vatokovene owoona akapuro awe yiilipixeryaka okhalano muupuwelo waweela ni ovuwiha malakiheryo awe a vasulu! Wi ela yeereye, hankooni oothene hiyo nikhale oolakelela omwaacamela Yehova ni weemererya ohoolela onavaheiye orweela wa Masu awe ni muloko Weekiristu. Okhala aweela onnavaha ohakalala ni murecele mmuupuweloni hiihaano. (Sal. 119:5, 6) Omwaahiyu, Satana amanle otoloxiwa, nnahaala okhalano ekari ya okhala mweelapo ohirimo ovolowela wawe woonanara.