Mukhale Mwawiiwanana ni Nivekelo na Ntakiheryo—Nikupa I

“Nsina nanyu nélihiwe.”​—MAT. 6:9.

MUNNUUPUWELA?

Tiheeni nnahuseryaahu ni nsu “Atithihu”?

Ntakhara heeni ninnaphwanela ovekela wi nsina na Muluku neelihiwe?

Nnii nikhale hai mwawiiwanana ni yooveka ya wi okhwela wa Muluku weereye vathi?

1. Nnapharihela hai nivekelo nnaphwanyeya mu Mateyu 6:9-13 mu orummwa ahu?

ACHU ancipale annawerya wuupuwela Nivekelo na Apwiya. Mu orummwa ahu wa empa ni empa, ninnapharihela nivekelo nenla wi naakhaviherye anamakhala wiiwexexa wi Omwene wa Muluku olamulelo weeparipari yoowo onahaala oruuha matorokelo aphaama veelaponi yavathi. Ninnapharihela tho yooveka yoopacerya ya nivekelo wi nooniherye wi Muluku ookhalano nsina, nenlo nnaphwanela weelihiwa.​—Mat. 6:9.

2. Nnasuwela hai wi Yesu haachuna wi nivekelo na ntakiheryo nuuluuliweke nsu ni nsu vaavaa nnavekelaahu?

² Apwanne Yesu aachuna wi nivekelo nawe nuuluuliweke nsu ni nsu, hiiha ntoko ancipale awiiseera Akiristu aneeraaya? Hooye. Ahaakumve ovahererya nivekelo nenla na ntakiheryo Yesu aaloca: “Nave vovekela muhúlule ulule siyo hoe.” (Mat. 6:7) Mu ekwaha ekina, aaloca nivekelo nla, nyenya ni masu oohiyana. (Luka 11:1-4) Mwawiihiiha Yesu oonikhaviherya osuwela ichu nnaphwanelaahu oveka nave mu ilukuluku inachuneyaaya. Ti nthowa nene nniichaniwaaya nivekelo na ntakiheryo.

3. Makoho taani nnaphwanelaahu wuupuwelela vaavaa nnathokororyaahu nivekelo na ntakiheryo?

³ Mmwaha yoola ni onacharela, nnahaala othokororya sooveka sa nivekelo na ntakiheryo. Vaavaa nnathokororyaahu, mwiikohe, ‘Nivekelo nla na ntakiheryo nnii nikikhaviherye hai orehererya mavekelo aka? Echu yookhweleyaxa, apwanne kinnakhala mwawiiwanana nnivekelo nenla?’

“ATITHIHU A WIRIMU”

4. Nsu nawi “Atithihu” nnanuupuxerya eheeni, nave mmukhalelo taani Yehova oryeiye “Atithi” wa Akiristu arino ewehereryo ya veelaponi yavathi?

⁴ Nsu “Atithihu,” ohiya “Atithi aka,” ennanuupuxerya wi nnapaka makupa a “anna” yaawo chiryene anasivelana mukina ni mukhwaawe. (1 Pet. 2:17) Ekari taani yasisapo! Akiristu awoocihiwa, yaawo aneeriwa anamwane a Muluku nave arino ewehereryo ya okumi wirimu, anamwiichana Yehova ntoko “Atithi” ni mathowa aphaama. (Arom. 8:15-17) Akiristu arino ewehereryo ya veelaponi yavathi ananwerya tho omwiichana Yehova ntoko “Atithi.” Yehova Namavaha a Ekumi aya, nave onnathokororya soothowa sa alapeli awe oothene. Yaale arino ewehereryo ya veelaponi yavathi anahaala okhala anamwane a Muluku mmukhalelo wawaakhwanela emanle waakhela ophaameya ni wooniherya ororomeleya waya mu yaweeha yookuchula.​—Arom. 8:21; Yaw. 20:7, 8.

5, 6. Yoovaha taani yasisapo asitiithi anaphwanelaaya waavaha anamwane aya, nave tiheeni mwaana ori oothene onaphwaneleiye weera ni yoovaha yeeyo? (Moone eruku yoopacerya.)

⁵ Asitiithi annaavaha anamwane aya yoovaha yaphaama vaavaa anaahusihaaya ovekela ni waakhaviherya omoona Yehova ntoko Tiithi awirimu oothokororya. Munna yoowo onarumeela ntoko ooweherya ekulucu Afrika Oohico onnuupuwela: “Ovinyerya vaavaa kaayanraaka anamwane aka aasithiyana, kaanavekela ni yaawo elukuluku yoothene wakhala wi kaari owaani. Anamwane ahu wiiliwiili yaanaloca wi hiyuupuwela masu a mavekelo naapakaahu. Nyenya yuupuwela mukhalelo waphaama wa oloca ni Tiithi ahu Yehova, ni moonelo woomaaleleya ni wookhapelela. Moovira wa elukuluku vaavaa yaapacenryaaya ovekela, kaanaaceenyerya ovekela mmasu oovuwa wi kiwerye owiiwa emuleelaka Yehova muupuwelo ni moonelo aya. Eyo yaari ekari yootikhiniha ya osuwela yeeyo yaari mmurimani mwaya. Mwawiihiiha kaanawerya waaleela ichu sookhweleya sa nivekelo na ntakiheryo wi mavekelo aya ekhaleno yootaphulela.”

⁶ Moohikhwa minikwa, anamwane aasithiyana ala yaahunnuwa phaama omunepani. Vano, vamoha ni asiiyaya annapuha ohakalala, vaavaa aneeraaya yookhwela ya Muluku mmuteko wa elukuluku yoothene. Hiyaavovo yamahala etokweene asitiithi aneeraaya yaavahe anamwane aya opwaha waakhaviherya wunnuwiha onthamwene ni Yehova. Mwawiihiiha, muchu ti muchu onaphwanela okhapelela onthamwene yoola wasisapo. Weerano yeeyo onaphitaanyerya ohuserya osivela nsina na Muluku, opharihela ni ncicimiho ntokotoko.​—Sal. 5:11, 12; 91:14.

“NSINA NANYU NÉLIHIWE”

7. Ekari taani achu a Muluku aryaayano, nyenya enavolowela eheeni?

⁷ Nookhalano ekari ohiya pahiru osuwela nsina na Muluku nyenya tho weerela onamoona ntoko “atchu a nsina nawe.” (Saw. 15:14; Yes. 43:10) Hiyaano ninnamveka Tiithi ahu a wirimu: “Nsina nanyu nélihiwe.” Opaka yooveka yeela ennaweerihaani omveka Yehova wi ookhaviheryeeni osepa weera naari oloca echu yeeyo yaahaala onyemuliha nsina nawe naweela. Hinnachuna okhala ntoko achu yaale mu nsana noopacerya yaheerano yeeyo yaalaleeryaaya. Murummwa Paulo aarepa wa yaawo: “Ntakhara nsina na Muluku ninnereliwa opwalu ntakhara a nyenyu, véri va amalapo.”​—Arom. 2:21-24.

8, 9. Muloce yootakiherya enooniherya wi Yehova onnaareeliha yaale anachuna weeliha nsina nawe.

⁸ Hiyaano ninnachuna wi nsina na Muluku neelihiwe. Murokora mmoha a o Noruweka iyawe oosiveliwa amanle okhwa aanoona omeekha ni mwanawe a iyaakha piili. Murokora owo onnaloca: “Eyo yaari elukuluku yookacamiha mu okumi aka. kaanavekela mahiku oothene, wi kikhaleno ikuru sa okhapelela moonelo woophimelela wi kihimvahe Satana ekari ya omunyemula Yehova nthowa na opaka yoolakelela yoonanara. Miyaano kaachuna weeliha nsina na Yehova, nave tho kaachuna wi mwanaka awoone atiithi awe mu Parataiso.”​—Masi. 27:11.

⁹ Apwanne Yehova aahaakhula mavekelo yaala? Aai. Murokora ola aahaakhela nikhaviheryo nthowa na otitelela okhala vamoha ni akhwaawe a nroromelo. Ivinre iyaakha thanu, aatheliwa ni mutokweene a muloko. Vano mwanawe orino iyaakha 20 sa oyariwa, nave tho munna oopatisiwa. Murokora onnaloca: “Miyaano koohakalala woona wi iyaka ookikhaviherya omphuwa mwanaka.”

10. Tiheeni enachuneya wi nsina na Muluku neelihiwe mwawaakhwanela?

¹⁰ Tiheeni enachuneya wi nsina na Muluku neelihiwe mwawaakhwanela? Wi eyo yeereye, Yehova onahaala waapahula oothene yaale ahiniiwelela mwaayiini olamulelo awe. (Mwaalakhanye Esekiyeli 38:22, 23.) Vakhaani vakhaani achu anahaala okhala oophaameya. Elukuluku ehanle vakhaani vaavaa achu vamoha ni ankeelo anahaalaaya ocicimihaka nsina na Yehova! Vookuchula, Tiithi ahu a wirimu onahaala ‘okhala sothe sene mu sothe sene.’​—1 Akor. 15:28.

“OMWENE ANYU ORWE”

11, 12. Omakuchuwelo wa nsana 19 wiiwexexa taani Akiristu eeparipari yaakhenlaaya?

¹¹ Yesu ahaakumve okookela wirimu, oohuserya awe yaamukoha: “Apwiya, mahiku yala munakokiherya omwene wa Israyeli?” Naakhulo na Yesu naahooniherya wi hiyaaphin’ye elukuluku wi esuwele ti liini Omwene wa Muluku waahaalaya opacerya olamulela. Yesu aahaaleela oohuserya awe othokororya muteko wookhweleya wa weerela onamoona yoowo waachuneya wi epake. (Mwaalakhanye Saweriwa Tarummwa 1:6-8.) Hiwaavovo minikwa wi Yesu aahaahusiha oohuserya awe owehererya orwa wa Omwene wa Muluku. Mwawiihiiha Akiristu opacerya mahiku a oohuserya annavekela ntakhara orwa wa Omwene.

¹² Vaavaa elukuluku yaacamelaaya wi Omwene wa Muluku mmatani mwa Yesu opacerye olamulela wirimu, Yehova aahaakhaviherya achu awe wiiwexexa elukuluku ene. Mu 1876, mwaha waarempwe ni C. T. Russell waalaleeryiwa mu erevista eniichaniwa Bible Examiner. Mwaha owo waarino muri, “Elukuluku ya Amalapo: Enakuchuwa Liini?,” waathoonya eyaakha ya 1914 ntoko eyaakha yookhweleya. Mwaha waaloca ilukuluku thanu napiili sa yooloherya ya Taniyeli ni “mahiku aya a amalapo” yaalociwe ni Yesu.a​—Tan. 4:16; Luka 21:24.

13. Tiheeni yeeren’ye mu eyaakha ya 1914, nave ovinyerya elukuluku yeele tiheeni saweereya sa elapo inooniheryaaya?

¹³ Mu 1914, yaapacerya ekhoco ya maloko a Europa​—ekhoco yeeyo yinlanne ophiyerya elapo yoothene. Vaavaa yaamanlaaya mu 1918, yaakhalavo etala yaahintoko weereya nave saakhalavo ireca saawiiphale achu opwaha yaale yaakhwile mu ekhoco. Mwawiihiiha “eneneryo” yeeyo Yesu aavanheiye wi osuweliwe orwa wawe ntoko mwene muvyaani a veelaponi yaapacerya waakhwanela. (Mat. 24:3-8; Luka 21:10, 11) Yawooniherya etokweene yaathonya eyaakha ya 1914 ntoko elukuluku yeeyo ‘ávahiweiye koroa’ Pwiya Yesu Kiristu. Yesu “ákhuma ólapihéne wi alapihe.” (Yaw. 6:2) Aapaka ekhoco wirimu amwiikarawo Satana ni masololo awe, yaawo ariheliwe waacamela elapo yavathi. Ovinyerya vaavaa, achu annahooxeya ntoko yawooniherya ya masu ala ooveereliwa: “Ochilu wa moko ni enia, ntakhara musaserya ókhuruwela wa nyuwo, ókhalano wícha mtokotoko, onasuweliye wi emuhalenle mahiku avakhani.”​—Yaw. 12:7-12.

14. (a) Ntakhara heeni nlelo ti yookhweleya ovekela wi Omwene wa Muluku orwe? (b) Ekari taani nryaahuno?

¹⁴ Yooloherya enaphwanyeya mu Yawupulula 12:7-12 ennathariha ntakhara heeni oyariwa wa Omwene wa Muluku waalikanela ni opacerya wa saweereya soonanara inaahooxa achu. Yesu, Mwene a Omwene wa Muluku, opacenrye olamulela variyari va amwiicani awe. Ophiyerya waakhwaniherya ovootha wawe ni waamaliha amwiicani veelaponi yavathi, nnaphwanela otitelela ovekela wi Omwene wa Muluku orwe. Mu elukuluku emohamoha, nnaphwanela okhala mwawiiwanana ni mavekelo moorweela wa wuuka mu waakhwanela wa yawooniherya yootikhiniha ya “eneneryo.” Yesu aaloherya: “Nave mitchaka eyo ya Omwene enarwa-elaleyeryiwa velaponi yothene ya vathi vano, ekhale namona wa atchu a maloko othene; nave vavo enarwa-ephiya makutchuwelo.”​—Mat. 24:14.

“OKHWELA WANYU WEREYE . . . VATHI VANO”

15, 16. Nnii nikhale hai mwawiiwanana ni yooveka ya wi okhwela wa Muluku weereye veelaponi yavathi?

¹⁵ Iyaakha 6.000 ivinre, okhwela wa Muluku waaneereya veelaponi yavathi. Ti nthowa nene Yehova aavarenreiye mapacereryo aphaama aavanheiye achu nave aloca: “Sari txhiri sorèrasa.” (Map. 1:31, BNM) Ovinyerya vaavaa Satana aamwaren’yeiye, achu ancipale haneerano yookhwela ya Muluku veelaponi. Nyenya olelo nookhalano ekari ya okhala mu elukuluku yeeyo achu awaakhwana 8.000.000 a Anamoona tahi wi pahiru anavekela wi okhwela wa Muluku weereye veelaponi yavathi nyenya tho anniilipixerya okhala mwawiiwanana nnivekelo nenla. Anneerano yeeyo moorweela wa mukhalelo aya wa okumi ni wuuka mwa mvai mmuteko wa waapaka oohuserya.

¹⁶ Ntoko yootakiherya, misiyonaario mmoha a mwaamuthiyana opatisiwe mu 1948 nave aarumeenle o Afrika ooloca: “Mwawiiwanana nnivekelo na ntakiheryo, kinnavekela wiiliwiili wi achu oothene ari ntoko ipucepuche elociweno ni okhaviheryiwa wi emusuwele Yehova elukuluku ehaakumve omala. Navetho vaavaa kinalaleeryaka, kinnaveka miruku wi kiwerye otannya murima wa muchu. Nave vooloca sa yaale alaleeryiwe anakhala ntoko ipucepuche, kinnamveka Yehova wi areelihe wiilipixerya wahu wi naakhaviherye.” Hiwaavo minikwa wi murokora yoola a iyaakha 80 sa oyariwa ookhalano mphurelo mmuteko awe nave, nnikhaviheryo na akina, onnaakhaviherya ancipale okhala Anamoona a Yehova. Chiryene munnawerya wuupuwela sootakiherya saphaama sa yaale aniiyeeha mukhataaya moohipwacha mukhalelo wa iyaakha wi yeereno yookhwela.​—Mwaalakhanye Afilipi 2:17.

17. Munoona hai vooloca sa yeeyo Yehova onahaaleiye weera ntoko naakhulo na nivekelo nahu wi okhwela wawe weereye veelaponi yavathi?

¹⁷ Ophiyerya vaavaa amwiicani a Muluku eneeraaya epahuliwe, nnaphwanela otitelela ovekela wi okhwela wa Muluku weereye. Nnahaala woona okhwela wa Muluku weereyaka mmukhalelo wawaakhwanela vaavaa macikhwi a achu anahaalaaya oviihiwa mookhwani mu parataiso veelaponi. Yesu aaloca: “Muhitikhine ni ela wi nihiku ninnorwa, nenlo othene ari m’mahiyeni [anuupuweliwa] enarwa yiwa masu awe, [a Yesu] ekhuma.” (Yoh. 5:28, 29) Enahaala okhala elukuluku yoohakalaliha owaakhela oosiveliwa ahu akhwile! Muluku “anarwa-avuta mithori yothene ovíha’mo m’mithoni [mwahu].” (Yaw. 21:4) Ancipale a yaawo anahaala oviihiwa anahaala okhala “óhikhala ékhaikhai,” yaawo yaakhanle nave ekhwa ehaakumve ohuserya sa Yehova Muluku ni Mwanawe. Enahaala okhala ekari etokweene waahusiha yookhwela ya Muluku, ni waakhaviherya ophwanelela “okumi wohimala.”​—Saw. 24:15; Yoh. 17:3.

18. Tiivi siri soothowa itokotoko sa achu?

¹⁸ Murecele ni wiiwanana wa veelaponi yoothene onahaala okhalavo moorweela wa weelihiwa nsina na Yehova moorweela wa Omwene wa Muluku. Mwawiihiiha, naakhulo nawaakhwanela na sooveka chaaru soopacerya sa nivekelo na ntakiheryo inahaala waakhwaniherya soothowa itokotoko sa achu. Navetho, sookhalavo ichu ikina xexe sookhweleya ihanle seiyo inalociwa mu nivekelo na ntakiheryo na Yesu. Iho inahaala othokororyiwa mu mwaha onacharela.

[Nsu na vathi]