Yohani Onachuna Osuwela Orweela wa Yesu

Mu eyaakha emoha, Yohani Mpatisi ori mukalaposo. Nlelo, owo onniiwa sa miteko sootikhiniha sa Yesu. Nkuupuwelani mukhalelo Yohani onooneiye vaavaa amuhuserya awe anamuleelaaya wi Yesu omviiha mookhwani mwaana a Naamukhwele o Nayini. Nyenya, Yohani onachuna osuwela orweela wa Yesu waakhanle wi owo ti Mesiya. Mwawiihiiha Yohani onnaarumiha amuhuserya awe eeli. Wi epake eheeni? Wi yamukohe Yesu: “Ti weyano yole onahawela orwa nari nnaphwanela nin’wehereryeke mukina?”—Luka 7:19.

Apwanne nla nikoho noohiphwanelela? Yohani mulopwana oororomeleya, yoowo elukuluku ampatinseiye Yesu waacamela iyaakha piili muculi, oonne munepa waweela wa Muluku omukhuruwelaka Yesu nave iwale nsu na Muluku nimweemereryaka. Hinaano nthowa na wuupuwela wi nroromelo na Yohani ninnavukuwa. Mmukhalelo mukina, Yesu hakaalonce sincipale sa Yohani, hiiha ntoko eerenleiye. Nyenya waakhanle wi Yohani haanono minikwa, ntakhara heeni onapakeiye nikoho nenla wa Yesu?

Mwawooneya, Yohani onachuna wi Yesu mwaneene aloce wi ti Mesiya. Eyo enahaala omulipiha Yohani, yoowo onatitelela okhala mukalaposo. Nikoho na Yohani, mwawooneya nookhalano yootaphulela ekina. Owo oosuwela phaama sooloherya sa Piipiliya seiyo sinooniherya wi Oothanliwa Mmoha a Muluku onahaala okhala mwene ni moopoli. Nyenya, miyeeri mincipale Yesu amanle opatisiwa, Yohani ori mukalaposo. Mwawiihiiha Yohani onakoha waakhanle wi ookhalavo mukina onarwa wi amuraceele Yesu, yoowo onahaala okhwaaniherya sooloherya soothene Mesiya aahaaleiye opaka.

Opwaha pahiru waaleela amuhuserya a Yohani, wi ‘Chiryene ka Mmoha yoowo aahaala orwa,’ Yesu onnavaha yawooniherya wi ookhalano nikhaviheryo na Muluku moorweela wa waapenusa achu ancipale mikhalelo soothene sa ireca ni masoso oothene. Voocharela onnaaleela amuhuserya: “Haweni, mwamulèle Yohani yeyo munonanyu ni yeyo muniwanyu: alipa èvasi annona, alipa òrakala annetxa, alipa a maretxa annapenusiwa, alipa òhiwa anniwa, alipa òkhwa annahuhumuwa, nave Mutxhaka Waphama onnàlaleriwa alipa òhawa.”—Mateu 11:4, 5.

Nikoho na Yohani akhweya nookhalano ewehereryo yawi Yesu onahaala opaka sincipale opwaha onapakeiye hiihaano nave akhweya onahaala omoopola Yohani mukalaposo. Nyenya Yesu, onamuleela Yohani wi ahiweherye sincipale opwaha sootikhiniha seiyo onapakeiye.

Vaavaa amuhuserya a Yohani anapwahaaya, Yesu onnaleela muloko wi Yohani ompwaha mulipa a miririmu. Owo ti “namutxhaka” a Yehova oloheryiwe mu Malakiya 3:1. Owotho ti mulipa a miririmu Eliya, yoowo aaloheryiwe mu Malakiya 4:5, 6. Yesu onnathariha: “Tchiri kinalocha wa nyuwo, Hávinnye mwa óyariwa ti athiana mutchu mtokotoko ópwaha Yohane Mbatisi; nyenya yowo ori óyeva mu Omwene wa Wirimu annamunnuwela yowo.”—Mateu 11:11, Nlakano Nahihano.

Moorweela wa oloca wi yoowo ori ooyeva mu Omwene wa Wirimu annamunnuwela Yohani, Yesu onooniherya wi Yohani hani akhale mu Omwene wa wirimu. Yohani oorehererya ephiro ya Yesu nyenya onakhwa Kristu ahaakumve ohula ephiro ya wirimu. (Ahebri 10:19, 20) Yohani, ti mulipa a miririmu oororomeleya a Muluku nave onahaala okhala namurala a Omwene wa Muluku.