Mwaana a Muchu Onahaala Orwa

Yesu nlelo ori o Samariya naari o Kalileya. Afarisi vano annamukoha vooloca sa orwa wa Omwene, yoowo anaweheryaaya okhala nihiku na efesta ni ochapa. Nyenya, owo onnaloca: “Omwene wa Muluku orwa waya hononeya! Hàvo oni awerye wi: onani ori va! Onani ori vale! Ntakhara omwene wa Muluku ori veri vanyu.”—Luka 17:20, 21.

Akina akhweya anuupuwela wi Yesu onaloca wi Omwene onalamula mmurimani mwa akapuro a Muluku. Nyenya, henaphwanela okhala hiiha, ntakhara wi Omwene hori mmurimani mwa Afarisi yaawo Yesu onaloceiyeno. Nto, owo ori veeri vaya woona wi oothanliwa Mwene a Omwene wa Muluku, Yesu, ori ni yaawo.—Mateu 21:5.

Akhweya Afarisi emanle opwahavo, Yesu onnavahererya sooleeliherya ikina wa amuhuserya awe vooloca sa orwa wa Omwene. Vooloca sa ophiya wawe mu owerya wa Omwene, voopaceryani onnaalopola: “Enamphiya elukuluku muneranyu munakhwela wona nihiku nimoharu na Mwana a mutxhu, nto munamotxela wona.” (Luka 17:22) Yesu onooniherya wi olamulelo wa Mwaana a muchu mu Omwene onahaala okhala omwaahiyu. Ehaakumve ophiya elukuluku yeeyo, amuhuserya akina akhweya annaweherya, nyenya awo annaphwanela otitelela oweherya ophiyerya vaava Muluku olakelenleiye orwa wa Mwaana a muchu.

Yesu onnatitelela: “Eni enamulotxa wa nyuwo eriki: onani, ori va! Onani, ori vale!, Muhitximule nari muhiyewo. Eparipari ntoko overunya onakhumaya wirimu ni onaryaya okina, hiha enamwereya ni Mwana a mutxhu mwa nihiku nawe.” (Luka 17:23, 24) Amuhuserya a Yesu anahaala okhapeleleya hai wi ehaachare amesiya awootha? Yesu olonce wi orwa wa Mesiya eeparipari anahaala okhala ntoko overunya onamwaleela makupa mancipale. Yawooniherya ya ophiya wawe mu owerya wa Omwene onahaala okhala wawooneya wa oothene yaale anavarerya.

Voocharela Yesu onnalikanyiha saweereya sakhalai sinooniherya mukhalelo miyoonelo sa achu sinahaalaaya okhala omwaahiyu: “Ntoko yeren’yaya mwa mahiku a Nowe, hihatho enamwereya mwa mahiku a Mwana a mutxhu . . . Ntoko yeren’yayatho mwa mahiku a Loti: atxhu yànalya, yànawurya, yànakula ni yànakuliha, yànala ni yànateka ipa, nto nihiku Loti avinnyeiyewo o Sodóma, wàrwa wirimu moro ni enxofre ewipha atxhu othene. Nihiku Mwana a mutxhu onakhweleiye orwa, enamwereyatho hiha.”—Luka 17:26-30.

Yesu hanaloca wi achu mmahiku a Nowa ni mmahiku a Loti yaakhwile nthowa na waavya ichu sookhweleya ntoko olya, owurya, okula, okuliha, waala, naari oteka. Nowa ni Loti vamoha ni imusi saya yaaneerano ichu ikina sa seiya. Koma achu akina yeerano hiiha ehithokororyaka yookhwela ya Muluku nave hiyaapwacha echu mu elukuluku yeele yaakhalaaya. Mwawiihiiha, Yesu onaalopola amuhuserya awe wi epwache yookhwela ya Muluku nave ekhale ooweiwa mu weerano yeeyo. Vano owo onawooniherya mukhalelo wa okhala ookhapeleleya—eyo tiwi, mukhalelo wa otitelela okhala—vaavaa Muluku oneereiye atoloxe elapo ela omwaahiyu.

Amuhuserya anahaala ochuna osepa okhala awaakanyeryeya ni ichu sa mulaponi saarukurenrye, ichu “sa muchuli.” Yesu onnaloca: “Nihiku nenlo yowo anarwa-akhala vasulu va nipatho, nave mirichi awe m’pa, ahikhuruwe okusha ela; nave yowo ori m’machani emohamoha ahikóke o sawe sa muchuli. Upuwelani mwara a Loti.” (Luka 17:31, 32, Nlakano Nahihano) Owo aahitathuwa nluku na maakha.

Atitelelaka oloca sa mikhalelo sinahaala okhalavo vaavaa Mwaana a muchu onahaaleiye olamulela ntoko Mwene, Yesu onnaaleela amuhuserya awe: “Ohiyu yowo atxhu eli yakona nipha nimoha, onamukusiwavo mmoha ni ahiwevo mukina.” (Luka 17:34) Mwawiihiiha akina anahaala waakhela nivuluso, nyenya akina anahaala onyanyaliwa, eyeleelaka ekumi aya.

Amuhuserya annakoha: “Wowi, Pwiya?” Owo àwakhula: “Weiwo oni okhalewo murutxhu, onamuthukumanawotho inaka.” (Luka 17:37) Chiryene, akina anahaala okhala ntoko inaka sawooneya. Amuhuserya yaala anahaala othukumana wa Kristu eeparipari, Mwaana a muchu. Mu elukuluku yeeyo yoomwaahiyu, Yesu onahaala waavahererya amuhuserya awe eparipari yoovulusa ekumi wa yaale arino nroromelo.