1. Yesu taani?

Yesu munkeelo akuru yoowo onakhala wirimu. Ihaakumve opatusiwa ichu soothene, Yehova Muluku aapacenrye ompatuxa Yesu. Ti nthowa nene oniichaniweiye “òpatxerya mwa itxhu sopatusiwa sothene.” (Kolosi 1:15, BNM) Piipiliya onnamuloca Yesu ntoko “mwanawe mmoharu” a Muluku, woona wi pahiru Yesu taapatuxiwe ni mwaneene Yehova. (Yohani 3:16) Yesu aanalapa vakhivirukhiviru ni Atiithi awe, Yehova, aakhaviheryaka tho Yaawo vaavaa yaapatuxaaya ichu soothene. (Mwaalakhanye Masiposipo 8:30.) Yesu onnatitelela opuha onthamwene wawaacameleya ni Yehova. Owo onnatitelela okhala oororomeleya ntoko “Nsu” na Muluku, ela ti wi owo onnahusiha michaka ni mahusiheryo a Yehova.—Yohani 1:14, BNM.

Hiyaano ninnacheka, ohooxeya, ni okhwa nthowa nawi mutheli oopacerya, Atamu ni Eva, hiyaamwiiwelenle Muluku.a Moohiphwacha mikhalelo seiya nookhalano ewehereryo. Yehova oonivahererya mukhalelo mmoha wi noopowe wa yoocheka ni okhwa, moorweela wa Mwanawe Yesu Kristu. Piipiliya onnahusiha wi moorweela wa okhwa wa Yesu, owo oovahererya woopola. Woopola epereesu enalimvwa wi oopoliwe muchu. Epereesu Yesu olimveiye ti yasisapo wa hiyo okumi awe woophaameya. (Mwaalakhanye Mateu 20:28.) Vaavaa Yesu aahin’yeiye ekumi awe yoophaameya wirimu nave arwa veelaponi ya vathi, aahula ephiro wi hiyaano nikookele okhalano ekumi yeeyo Atamu ni Eva ayeleenlaaya mwaayiini. Yesu ahooniherya tho ti mwawiihai owo ni Yehova ananisivelaaya. Mwaha yoola onahaala wookhaviheryaani mukhalelo muneeraanyu mooniherye othamalela wanyu ntakhara okhwa wa Yesu.

1. Nni niphurevo hai orweela wa okhwa wa Yesu olelo?

Woona wi na soocheka, ninnapaka ichu sincipale ihinamuhakalaliha Yehova. Nyenya wa nthowa na yeeyo Yesu opankeiye wa hiyaano, nnanwerya okhurumuweliwa soocheka sahu. Mwawiihiiha nnaphwanela omveka Yehova wi anikhurumuwele moorweela wa Yesu, niilipixerye wi nihikookele opaka soocheka imohamoha. Neerano hiihaa nnanwerya opuha onthamwene wawaacameleya ni Muluku. (1 Yohani 2:1) Piipiliya oni: “Tiwi Kristu ohoona masooso omoha weiwo wa nthowa na soocheka sahu, awookololowa murima mu nipuro na aweera soonanara, wi oohooleeni wa Muluku.”—1 Pedro 3:18.

2. Ti mwawiihai okhwa wa Yesu onahaalaaya onikhaviherya muhoolo?

Yehova aahimurumiha Yesu wi avahe okumi awe woophaameya “wi oothene yaale anamuroromela [Yesu] ehirimeele, nto ekhaleno okumi woohimala.” (Yohani 3:16) Nthowa na yeeyo Yesu eenreiye, Yehova moohilekela onahaala omaliha ichu soothene soonanara ikhumelenle moorweela wa ohiiwelela wa Atamu. Eyo enooniherya wi wakhala wi ninnaroromela mukucho wa Yesu, nnahaala okhalano ekari ya okhalano ekumi yoohimala veelaponi ya vathi!—Isaiya 65:21-23.

OHUSERYA MWAWIISEELA

3. Okhwa wa Yesu woonoopola wa yoocheka ni okhwa

EXILEMA: Por que Jesus morreu?—Parte 1 (2:01)

• Ekari taani Atamu ni Eva ayeleenlaaya vaavaa yahaamwiiwelenlaaya Muluku?

Mwaalakhanye Aroma 5:12, nave muthokororye nikoho nla:

• Ti mwawiihai yoocheka ya Atamu enoovolowelaayani?

Mwaalakhanye Yohani 3:16, nave muthokororye nikoho nla:

• Ntakhara heeni Yehova aamuruminheiye mwanawe veelaponi ya vathi?

1. Atamu aari muchu oophaameya yoowo ahaamwiiwelenle Muluku nave aahenle achu mu yoocheka ni okhwa

2. Yesu aari muchu oophaameya yoowo aamwiiwelenle Muluku nave aahenle achu mu ephiro ya ophaameya ni ekumi yoohimala

4. Okhwa wa Yesu onanwerya okhala wa mphurelo wa achu oothene

EXILEMA: Por que Jesus morreu?—Parte 2 (2:00)

• Ti mwawiihai okhwa wa muchu mmoha onaweryaaya okhala wamphurelo wa achu oothene?

Mwaalakhanye 1 Timóteo 2:5, 6, nave muthokororye nikoho nnacharela:

• Atamu aari muchu oophaameya nave wa nthowa na ocheka achu oothene annacheka ni okhwa. Yesu tho aari muchu oophaameya hiiha ntoko Atamu aareiye. Mwawiihiiha ti mwawiihai ovaherenryeiye yawoopola yoophwanelela?

5. Yawoopola yamahala ya Yehova wa nyuwaano

Asinthamwene a Yehova annoona yawoopola ntoko yamahala enarweela wa yoowo. Ntoko yootakiherya, mwaalakhanye Galasya 2:20, nave muthokororye nikoho nnacharela:

• Ti mwawiihai murummwa Paulo mmoonelo awe onaloceiye yawoopola ntoko yamahala enarweela wa Muluku?

Vaavaa Atamu aachenkeiye, owo ni muyareriwo awe waathoriheriwa okhwa. Nyenya Yehova aamurumiha Mwanawe wi akhwe ntakhara nyuwaano wi nwerye okhalano ekari ya opuha okumi woohimala.

Vaavaa munaalakhanyaanyu iversikulu inacharela, mwaanyiherye mukhalelo Yehova iisoneiye vaavaa aamooneiye Mwanawe ahooxeyaka. Mwaalakhanye Yohani 19:1-7, 16-18, nave muthokororye nikoho nla:

• Muniisoona hai vooloca sa yeeyo Yehova ni Yesu apankaaya wa nyuwaano?

MUKWASU

Okhwa wa Yesu onnavahererya mathipelo wi Yehova alevelele soocheka sahu, ni onivaha ekari ya opuha ekumi okhala wookhala.

Makoho awuuluulela

• Ntakhara heeni Yesu aakhwa?

• Ti mwawiihai okumi woophaameya wa Yesu oryaaya yawoopola yoophwanelela?

• Ti mwawiihai okhwa wa Yesu onooruuhelaayani mphurelo?

OTHOLATHOLA

Muhuserye ntakhara heeni okumi woophaameya wa Yesu oniichaniwaaya yawoopola.

“Como o sacrifício de Jesus pode servir como ‘resgate por muitos’?” (Artigo do jw.org)

Moone tiheeni nnaphwanelaahu weera wi noopoliwe.

“O que quer dizer ‘Jesus salva’?” (Artigo do jw.org)

Apwanne Yehova onanwerya olevelela soocheka itokotoko?

“Perguntas bíblicas respondidas” (A Sentinela, 1.º de maio de 2013)

Moone ti mwawiihai ohuserya vooloca sa mukucho wa woopola wa Yesu waamukhavihenryaaya mulopwana yoowo aahooxeya ni moonelo woohiphwanelela.

“Eu Não Sou Mais Escravo da Violência” (Mwaha wa mu jw.org)

1. Tuuvi ori mukhalelo mmoha wa wooniherya othamalela wa yeeyo Muluku ni Kristu apankaaya wa hiyo?

Piipiliya onnaroromeliha wi “oothene yaawo anamuroromela [Yesu]” ananwerya okhalano ekumi yoohimala. (Yohani 3:16) Nni neereno hai yeeyo? Eyo enataphulela wi nnaphwanela opaka ichu sincipale ohiya pahiru okhalano nroromelo mwa Yesu. Nnaphwanela tho wooniherya nroromelo nahu moorweela wa soothanla nnapakaahu ni ichu nnapaakaahu. (Tiyako 2:17) Vaavaa nnooniheryaahu nroromelo nahu moorweela wa yeeyo nnapakaahu ni nnalocaahu, ninnalipiha onthamwene ahu ni Yesu vamoha ni Tiithi awe, Yehova.—Mwaalakhanye Yohani 14:21.