MWAHA WA EKAAPA | MULUKU ONOONA HAI IKHOCO?

Muluku Oona Hai Ikhoco Mu Nsana Noopacerya?

Arummwa yaanahooxeya. Moolikana ni makholo aya, Ayuuta a nsana noopacerya yaanavekela wi Muluku awoopole mu ohooxa wa Olamulelo wa Roma. Voocharela yaahiiwa sa Yesu, yoowo aahaala okhala Mesiya aalaiheryiwe. Tahi yootikhiniha wi ancipale ‘yànaroromela wi ti yowo arwenle wopola Isarayele’ mu ohooxa wa Roma. (Luka 24:21) Nyenya hinaarivo naakiho. moohiyana, mu 70 E.K., anakhoco a Roma yaarwa emutoloxa Yerusalemu ni empa ya malapelo.

Tiheeni yeeren’ye? Ntakhara heeni Muluku haawaninhe wi awaakihe Ayuuta ntoko enreiye khalai? Naari ntakhara heeni haalamulenle owana wi yiisaakihe wa amwiicani aya? Apwanne moonelo wa Muluku vooloca sa ekhoco waarimutorokeya? Hooye. Nyenya yookhala yaatoroken’ye ni Ayuuta. Awo yaakhooca omweemererya Yesu ntoko Mesiya. (Saweriwa T’arummwa 2:36) Mwawiihiiha, ntoko nloko yaayeleela waataana waya ni Muluku.​—Mateu 23:37, 38.

Nloko na Ayuuta ni Elapo ya Nlakano yaahiya waakhela naakiho na Muluku, nave Ayuuta hiyaaphwanela omveka Muluku wi ewanihe ekhoco yaweemereryiwa ni yoowo. Ntoko Yesu aalohenryeiye, Aisarayeli oomwiilini yaahaala waakhiwa mareeliho a Muluku nave nivahiwe nloko nivyaani, nloko noomunepani nenlo Piipiliya oniichaneiye “Isarayele a Muluku.” (Galasya 6:16; Mateu 21:43) Muloko wa Akiristu oothanliwa ni munepa taakhanle Isarayeli a Muluku. Mu nsana noopacerya, awo yaaleeliwa: “Vano mwa nloko na Muluku.”​—1 Pedro 2:9, 10.

Woona wi Akiristu a nsana noopacerya hiyaari “nloko na Muluku,” apwanne Muluku aawaniha wi awoopole mu ohooxa wa Roma? Naari aahaalamulela wi ewane wi yiisaakihe? Hooye owo henreno. Ntakhara heeni? Vooloca sa ikhoco saweemereryiwa ni Muluku, ti yoowo mwaneene onalakelela elukuluku ene enahaalaaya weereya, ntoko yooniheryiwaaya mmwaha ovirale. Muluku haawaninhe ekhoco ntakhara Akiristu a nsana noopacerya, nave tho haalamulenle wi ewane. Chiryene, nsana noopacerya hiyaari elukuluku yoophwanelela wi Muluku awane ni amutakhali.

Mwawiihiiha, alapeli a Muluku a nsana noopacerya yaaphwanela owehererya elukuluku yeeyo Muluku aahaaleiye omaliha onanara woothene. Mweelukuluku emohamoha, awo hiyaalamuleliwe ti Muluku wi ewane ni amwiicani aya. Yesu Kiristu aahooniherya phaama yeela mu ohusiha wawe. Ntoko yootakiherya, owo haalamulenle oohuserya awe owaniha, nyenya moohiyana aahaaleela: “Mwakhweleke amwitxana anyu, ni mwavekeleleke yale anawikarani.” (Mateu 5:44) Aloheryaka sa elukuluku yeeyo Yerusalemu aahaaleiye otoloxiwa ni anakhoco a Roma, Yesu aahaaleela oomuchara awe wi ehiwanihe, nyenya yaaphwanela ochawa, nave ti yeeyo yenraaya.​—Luka 21:20, 21.

Mwawaaceererya, murummwa Paulo mooveereliwa aarepa: “Muhiwinlele ikuhu akhwinyu, . . . wona wi yorempwa: Ti waka ovaha ekoi. Ti miyo kini kivahe nlivelo.” (Aroma 12:19) Paulo uuluulele masu yaawo Muluku aalonceiye khalai anaphwanyeya mu liivuru a Onamukutxho 19:18 ni Malamulo 32:35. Ntoko yooniheryiwaaya mmwaha ovirale, mukhalelo mmoha wa Muluku owoopola achu awe a khalai waari owana ni amwiicani aya. Mwawiihiiha, masu a Paulo annooniherya wi moonelo wa Muluku vooloca sa ikhoco hiwaatoroken’ye. Mu nsana noopacerya, Muluku nlelo oona ekhoco ntoko mukhalelo wa owoopola alapeli awe ni otoloxa mukhalelo woothene wa onanara. Hiiha ntoko yeereyaaya khalai, Muluku taalakelela elukuluku ene ni taani aahaala owana.

Chiryene, Muluku haalamulenle Akiristu a nsana noopacerya wi ewaniheke. Nyenya hanka olelo? Apwanne nookhalavo nikhuuru nenlo Muluku olamulenleiye wi niwaniheke? Naari wi ela elukuluku yoophwanelela wi Muluku awanihe awaakihaka alapeli awe? Muluku onoona hai ikhoco olelo? Mwaha wookuchula onahaala waakhula makoho yaala.