Mulipihe Nroromelo Nanyu Mwa Yeeyo Munaweheryaanyu

Nroromelo “ti nlipiseryo na itxhu nnawehereryahu.”—AHEBRI 11:1.

MACIPO: 81, 134

MWAAHAALA WAAKHULA HAI?

Achu a Yehova akhalai yaatitelenle hai olipiha nroromelo naya?

Tiheeni Yehova onanivaheiye wi anikhaviherye olipiha nroromelo nahu?

Wakhala wi nookhalano nroromelo noolipa, tiivi enahaala okhala yookhumelela?

1, 2. (a) Ichu nnawehereryaahu sinahiyana hai ni ichu achu akina anawehereryaaya? (b) Tiheeni nnahaalaahu othokororya mmwaha yoola?

YEHOVA onnanivaha yoowehererya yootikhiniha. Owo oolaiherya weeliha nsina nawe wi okhwela wawe weereye ntoko wirimu hiiha vathi va. (Mateu 6:9, 10) Iho ichu sookhweleya nnawehereryaahu. Yehova oonilaiheryatho onivaha ekumi yoohimala, moohipwacha ewehereryo ahu yaari wirimu naari veelaponi yavathi. Ela ewehereryo yoohakalaliha! (Yohani 10:16; 2 Pedro 3:13) Nave ninnaweherya woona mukhalelo Yehova onahaaleiye otitelela waahoolela ni waakhaviherya achu awe mmahiku yaala oomaliherya.

² Piipiliya onnaloca wi nroromelo ti “nlipiseryo na itxhu nnawehereryahu.” Ela enataphulela wi yaale arino nroromelo anneemererya wi ichu Yehova olaihenryeiye sinarwa sikhwaanela. (Ahebri 11:1) Achu ancipale olelo annaweherya ichu, nyenya awo hasuwenle waakhanle wi ichu iho inahaala okhwaaniheryeya. Ntoko yootakiherya, muchu akhweya onnawehererya ovootha mu mapokha, nyenya hanasuwela phaama waakhanle wi onahaala ovootha chiryene. Mmwaha yoola, nnahaala woona tiheeni nnaphwanelaahu opaka wi nlipihe nroromelo nahu mu soolaiherya sa Muluku. Nnahaala tho othokororya mukhalelo nroromelo noolipa nnahaalaaya onikhaviherya hiihaano.

3. Ntakhara heeni ninnaroromela wi soolaiherya sa Muluku sinarwa sikhwaanela?

³ Hiyaano hannayariwa ni nroromelo. Wi nikhaleno nroromelo, ti woochuneya weemererya wi munepa waweela ohooleleke mirima sahu. (Galasya 5:22) Munepa waweela onamunikhaviherya omusuwela phaama Yehova. Vaavaa nniiwexexaahu wi toowerya woothene ni amiruku, ninnalekecheya wi owo ookhalano owerya wa opaka soothene olaihenryeiye. Yehova mwaneene onoona soolaiherya sawe ntoko wi sohaakhwanela nave onnaloca: ‘Sohèreya!’ (Mwaalakhanye Wupulula 21:3-6.) Ninnasuwela wi Yehova mahiku oothene onnapaka yeeyo olaihenryeiye. Owo ti “Muluku òroromeleya.” Ti nthowa nene nneemereryaahu soothene owo onanleeleiye vooloca sa omwaahiyu.—Malamulo 7:9.

AKAPURO A MULUKU AKHALAI YAAWO YAARINO NROROMELO NOOLIPA

4. Tiheeni akapuro a Muluku akhalai yaaroromelaaya?

⁴ Ahebri ecima ya 11 onnanleela masina a alopwana ni athiyana awaakhwana 16 yaawo yaarino nroromelo noolipa mwa soolaiherya sa Yehova. Onnaaromola tho ancipale yaawo yaamusivelinhe Yehova ‘nthowa na wemererya [naari nroromelo] naya.’ (Ahebri 11:39) Oothene yaala yaawehererya “nloko [evyo]” yeeyo Yehova aalaihenryeiye. Awo yaanasuwela wi “nloko [evyo]” yaahaala waatoloxa amwiicani oothene a Muluku ni opaka elapo yavathi okhala parataiso wanaawiili. (Maphatxuwelo 3:15) Nave akapuro yaala a Muluku yaakhalano nroromelo noolipa wi yeeraaya ekhwe Yehova aahaala waakookiherya okumi. Mwawooneya, hiyaaweherya oviihiwa mookhwani ntakhara okumi wa wirimu, woona wi Yesu nlelo iiha ahaakumve orwa veelaponi yavathi. (Galasya 3:16) Moohiyana, yaaweherya okhalano ekumi yoohimala veelaponi yavathi mu parataiso ooreera.—Salumu 37:11; Isaiya 26:19; Oseya 13:14.

5, 6. Tiheeni Aparahamu ni emusi awe yaawehereryaaya? Awo yaatitelenle hai olipiha nroromelo naya? (Moone eruku yoopacerya.)

⁵ Ahebri 11:13 onnaloca sa akapuro yaala oororomeleya a Yehova: “Atxhu othene ala akhwile n’wemereryani, ehakunve wakhela itxhu Muluku aroromelin’heiye. Yàhona ni yàtxhuna itxhu seiyo eri otxiwene elokohaka wi yari anamarwa ni aletxo vathi va.” Yaanaweherya elapo evyaani ni wiisaanyiherya ekhalaka mwemmo. Mmoha a yaawo aari Aparahamu. Yesu ooloca wi Aparahamu “òhakalala wa nthowa na wona” elukuluku yeeyo. (Yohani 8:56) Sara, Isaki, Yakopo ni akina yaanaweheryatho elukuluku Omwene naari nipooma nenlo “nthipeliwe phama, nlepeliwe ni ntekiwe ti Muluku,” nnahaalaaya olamulela elapo yoothene.—Ahebri 11:8-11.

⁶ Ti mwawiihai Aparahamu ni emusi awe yaatitelelaaya olipiha nroromelo naya? Awo yaatitelela ohuserya sincipale vooloca sa Yehova. Ikwaha ikina Yehova aanaloca ni yaawo moorweela wa ankeelo, sawoona naari sooloha. Akhweya yaahuseryatho orweela wa makholo aya oororomeleya naari mu soorepa sakhalai. Emusi ya Aparahamu hiyantonko ocuwala soolaiherya sa Muluku, nave yaanasiveliwa wuupuwelela seiyo. Ntoko yookhumelela, vaya hiyaakhwa minikwa wi Yehova aahaala waakhwaniherya soolaiherya sawe. Mwawiihiiha awo yaakhala oororomeleya wa yene ophiyerya tho vaavaa yaakumanaayano makacamiho ni wiikariwa.

7. Tiheeni Yehova onivanheiye wi nlipihe nroromelo nahu, nave tiheeni nnaphwanelaahu weera?

⁷ Tiheeni enahaala onikhaviherya olipiha nroromelo nahu? Yehova oonivaha Piipiliya wi anihusihe vooloca sa soolaiherya sawe sa omwaahiyu. Mwemmo, owo onnanooniherya yeeyo nnaphwanelaahu opaka wi nikhale oohakalala. Ti nthowa nene oryaaya waphaama omwaalakhanya Piipiliya mahiku oothene ni ochariha ohoolela wawe. (Salumu 1:1-3; mwaalakhanye Saweriwa T’arummwa 17:11.) Yehova tho onnanivaha “yolya mwa elukuluku yophwanelela” moorweela wa “mulapeli òroromeleya ni awisuwela.” (Mateu 24:45) Moolikana ni achu a Muluku akhalai, ti woochuneya otitelela waalakhanya soolaiherya sa Muluku ni wuupuwelela mwawiiseela. Ela enahaala onikhaviherya okhala oororomeleya wa Muluku ni owehererya elukuluku yeeyo Omwene awe oneeraaya olamulele elapo yoothene.

8. Nivekelo nnalipiha hai nroromelo nahu?

⁸ Echu taani ekina yaakhavihenrye achu a Yehova akhalai olipiha nroromelo naya? Awo yaanavekela wi Yehova aakhaviherye, nave vaavaa yoonaaya wi ohaakhula mavekelo aya, nroromelo naya naanakhala noolipa. (Nehemiya 1:4, 11; Salumu 34:5, 16, 18; Daniyeli 9:19-21) Moolikana, wakhala wi nohoona wi Yehova ohaakhula mavekelo ahu nave oonivaha echu yeeyo nnachunaahu chiryene mu elukuluku yoophwanelela, nroromelo nahu wa yoowo nnakhala noolipa. (Mwaalakhanye 1 Yohani 5:14, 15.) Nnaphwanela tho otitelela ‘oveka’ wi Yehova anivahe munepa awe waweela wi niwerye okhalano nroromelo nawaaca.—Luka 11:9, 13.

9. Ichu taani nnaphwanelaahu oromola vaavaa nnavekelaahu?

⁹ Vaavaa nnavekelaahu wa Yehova, hannaphwanela omveka pahiru wi anivahe yeeyo nnachunaahu. Nnaphwanela tho omuthamalela ni omvuwiha mahiku oothene. Owo onnapaka ichu sootikhiniha! (Salumu 40:6) Achu a Yehova annaavekelela tho anna ni arokora aya orukurerya elapo. Ntoko yootakiherya, ninnatitelela ‘owupuwela alipa owaleliwa mukalaposo.’ Ninnaavekelelatho yaale ari “aholi.” Vaavaa nnoonaahu mukhalelo Yehova onaakhuleiye mavekelo ahu, nroromelo nahu wa yoowo ninnalipa nave ninnamwaacamela.—Ahebri 13:3, 7.

AWO YAATITELELA OROROMELEYA

10. Tiheeni yaakhavihenrye ancipale okhala oolipa murima ni ororomeleya wa Muluku?

¹⁰ Mu Ahebri ecima ya 11, murummwa Paulo aaloca: “Athiyana akina yàkòkela waphwanya atxhu òkhwa aya, yavìhiwe mokhwani. Atxhu akina yàrimuhosiwa ophiyerya okhwa, nave yàkhotxa wopoliwa wi ephwanye ovinya mokhwani waphamasa.” (Ahebri 11:35) Ancipale yaavilela makacamiho nave yiikhalelaru oororomeleya wa Muluku nthowa nawi yaakhalano nroromelo noolipa mu ovinya mookhwani yoowo Muluku aalaihenryeiye. Vaya yaanasuwela wi omwaahiyu, Yehova aahaala waakookiherya okumi nave yaahaala okhalano ekumi yoohimala veelaponi yavathi. Nkamuupuweleeni Napoti ni Sakariya. Awo yaavonyiwa maluku ophiyerya okhwa nthowa na omwiiwelela Muluku. (1 Mamwene 21:3, 15; 2 Matharihelo 24:20, 21) Taniyeli aavonyeryiwa munlicini mwa amwaco oovoliwa, nave asinthamwene awe yaavonyeryiwa mu cukuca a mooro. Yaahiivaha okhwa wi ekhale oororomeleya wa Yehova. Alopwana yaala yaakhalano nroromelo noolipa wi Yehova ahaala waavaha munepa awe waweela ni waakhaviherya ovilela makacamiho.—Daniyeli 3:16-18, 20, 95; 6:13, 16, 21-23; Ahebri 11:33, 34.

11. Makacamiho taani alipa miririmu avileenlaaya nthowa na nroromelo naya?

¹¹ Alipa miririmu ancipale, ntoko Mikeya ni Yeremiya yaawasuliwa, ophiyerya ovonyeriwa mukalaposo. Akina ntoko Eliya, “yatxhawela mmiyakoni, mutakhwani, ni yakhala mmakhukuni ni mmalitxini.” Oothene yaavilela makacamiho nave yiikhalelaru oororomeleya wa Muluku nthowa nawi yaakhalano ‘nlipiseryo na itxhu yawehereryaya.’—Ahebri 11:1, 36-38; 1 Mamwene 18:13; 22:24-27; Yeremiya 20:1, 2; 28:10, 11; 32:2.

12. Yootakiherya taani yaphaama nnaphwanelaahu ochariha? Tiheeni yaamukhavihenrye ovilela makacamiho?

¹² Yesu Kristu aavilela nikacamiho ntokweene nave aatitelela okhala oororomeleya wa Yehova. Tiheeni yaamukhavihenrye ovilela? Paulo aaloca: “Owo, nari avahiwe ohakalala, òhawa va [mwiri] ahipwatxhaka wuliwa muru, nave vano òkirathi mono wolopwana wa ehitxhe ya Muluku.” (Ahebri 12:2) Ohoolo waya Paulo aahaaceenyerya Akristu wi ‘yupuweleke’ yootakiherya ya Yesu. (Mwaalakhanye Ahebri 12:3.) Hiiha ntoko Yesu, Akristu ancipale mu nsana noopacerya yaakhwa nthowa nawi yaari oororomeleya wa Yehova. Mmoha a yaawo ti Antipa. (Wupulula 2:13) Akristu ala aamwaakhela phatamari aya, moohiyana ni akapuro akina a Muluku akhalai yaawo yaawehererya ekumi yoohimala veelaponi yavathi. (Ahebri 11:35) Elukuluku ekina Yesu amanle okhala Mwene mu 1914, Akristu oothanliwa yaawo yaakhwile yaaviihiwa ntakhara okumi woohikhwa wirimu, nave awo vamoha ni Yesu anahaala waalamulela achu.—Wupulula 20:4.

AKAPURO A MULUKU A MAHIKU AHU ARINO NROROMELO NOOLIPA

13, 14. Makacamiho taani Rudolf Graichen aavilenleiye, nave tiheeni yaamukhavihenrye okhala oororomeleya wa Muluku?

¹³ Macikhwi macikhweene a akapuro a Muluku annachariha yootakiherya ya Yesu. Awo annuupuwelela soolaiherya sa Muluku nave annatitelela okhala oororomeleya wa yoowo variyari va makacamiho. Mmuthokororye Rudolf Graichen, yoowo oyariwe o Alemanya mu 1925. Aareiye mmiravo, makholo awe yaathomeya iruku sa saweereya sa Mpiipiliyani mpa mwaya. Owo ooloca: “Eruku emoha yooniherya miici ni epucepuche, mwaana ni nipwerere, emope ni mwaco—oothene mmureceleni, ehooleliwaka ni mwaana mukhaani.” (Isaiya 11:6-9) Ela yaamukhaviherya Rudolf wuupuwela sincipale sa Parataiso veelaponi yavathi ni olipiha nroromelo nawe. Ntoko yookhumelela, aatitelela okhala oororomeleya wa Yehova, naamwi aahoosiwe mu iyaakha sincipale ni akhoco o Alemanya.

¹⁴ Rudolf aavilela makacamiho makina. Amannya yaakhwa mu nipuro naalipa oophariwa o Ravenspruk. Apapa awe yaaheemererya orepa ekaarata ekhoocaka okhala Namoona a Yehova. Nyenya Rudolf aakhapelela nroromelo nawe noolipa. Amanle woopoliwa mukalaposo, aarumeela ntoko ooweherya aweeceeca. Ohoolo waya aawompwa ovolowa mu Exikola ya Kiliyati nave aarummwa oya o Chile, weiwo aarumeela tho ntoko ooweherya aweeceeca. Weiwo owo aamuthela murokora Patsy, yoowo aari misiyonaariya. Nyenya moohiciha, eyaakha ohoolo waya, mwanaya mwaamuthiyana aakhwa. Vahilekenle Patsy tho aakhwa. Owo aarino pahiru iyaakha 43. Moohipwacha makacamiho yaala oothene, Rudolf aatitelela omurumeela Yehova. Naamwi aari awuuluvala nave ahikhanleno ekumi yaphaama, owo aarumeela ntoko piyoneero a elukuluku yoothene ni mutokweene. Nnanwerya waalakhanya yaweereya awe ya okumi mu Mulipeleli 1 a Akostu a 1997 ipaaxina 20-25 (a ekunya).^[1] (Moone masu avathi omakucuwelo.)

15. Mvahe sootakiherya sa anna ni arokora olelo anamurumeela Yehova moohakalala naamwi yiiciwaka.

¹⁵ Olelo, anna ni arokora ahu ancipale annamurumeela Yehova moohakalala naamwi yiiciwaka. Masana masaneene awaleliwe o Eritrea, Sinkapore, ni Koreya Oohico nthowa na ‘okuha nsipatxa.’ (Mateu 26:52) Ntoko yootakiherya, Isaac, Negede ni Paulos aawaleliwa mukalaposo o Eritrea mu iyaakha opwaha 20! Weiwo awo annakhalihiwa moonanara. Nave variyari va iyaakha seiya soothene, awo hathenle nave hanawerya waakhapelela asitiithi aya. Naamwi hiiha, awo anakhala oororomeleya wa Yehova nave nroromelo naya ti noolipa. Ophiyerya wi amulipeleli a ekalaposo annaacicimiha. Sookhalawo iruku sa anna yaala mu site jw.org. Awo ari oohakalala, naamwi ehooxeyaka.

16. Nroromelo noolipa nnaweerihaani opaka eheeni?

¹⁶ Achu ancipale a Yehova hanariheliwa mukalaposo naari ohooxiwa ntoko anna yaawo aromoliwe. Nyenya ancipale annahooxeya nthowa na ohaawa, ipahu, ni ikhoco. Akina annachariha yootakiherya ya Aparahamu, Isaki, Yakopo ni Mose nave annahiya oculi ovuwa naari oreela wi eweiwe mu omurumeela Yehova. Tiheeni enaakhaviherya annihu otitelela ohakalala emurumeelaka Yehova? Nthowa na omukhwela ni weemererya waya woolipa mu soolaiherya sawe. Awo annasuwela wi owo onahaala waavaha phatamari akapuro awe oororomeleya ni ekumi yoohimala mu elapo evyaani, mwemmo onahaala okhalamo ekhaikhai.—Mwaalakhanye Salumu 37:5, 7, 9, 29.

17. Muni mulipihe hai nroromelo nanyu, nave tiheeni nnahaalaahu othokororya mmwaha onacharela?

¹⁷ Mmwaha yoola nohoona mukhalelo nroromelo nraaya “nlipiseryo na itxhu nnawehereryahu.” Wi nikhaleno nroromelo ntoko nenla, ti woochuneya ovekela wa Yehova ni otitelela wuupuwelela soolaiherya sawe. Voocharela nnahaala owerya ovilela nikacamiho nri noothene. Mmwaha onacharela nnahaala othokororya sincipale vooloca sa yootaphulela ya nroromelo.

[Masu a vathi]

[Yooleeliherya va epaaxina 17]

Vaavaa nnoonaahu mukhalelo Yehova onaakhuleiye mavekelo ahu, nroromelo nahu wa yoowo ninnalipa

[Yooleeliherya va epaaxina 18]

Akapuro a Muluku annakhala oororomeleya wa yoowo nthowa nawi aakhalano nroromelo noolipa mu ovinya mookhwani yoowo Muluku olaihenryeiye

[Ekaaxa va epaaxina 20]

MASU ATHARIHIWE

Wi nikhaleno nroromelo mwa yeeyo nnawehereryaahu: Okhala oolekecheya wi soothene Muluku olaihenryeiye vooloca sa omwaahiyu sinarwa sikhwaanela