MWAHA 28
Mooniherye Othamalela wa Yeeyo Yehova ni Yesu Apankaaya wa Nyuwo
Munoona hai vaavaa nthamwene anyu onoovaheiyeeni yamahala? Akhweya, munnatepa ohakalala nave munachuna wooniherya wa nthamwene anyu wi munnathamalela yamahala eyo. Yehova ni Yesu aanivaha yamahala yaphaamaxa opwaha soothene, Yawoopola. Nni nooniherye hai othamalela wahu ntakhara woopola?
1. Tuuvi ori mukhalelo mmoha wa wooniherya othamalela wa yeeyo Muluku ni Kristu apankaaya wa hiyo?
Piipiliya onnaroromeliha wi “oothene yaawo anamuroromela [Yesu]” ananwerya okhalano ekumi yoohimala. (Yohani 3:16) Nni neereno hai yeeyo? Eyo enataphulela wi nnaphwanela opaka ichu sincipale ohiya pahiru okhalano nroromelo mwa Yesu. Nnaphwanela tho wooniherya nroromelo nahu moorweela wa soothanla nnapakaahu ni ichu nnapaakaahu. (Tiyako 2:17) Vaavaa nnooniheryaahu nroromelo nahu moorweela wa yeeyo nnapakaahu ni nnalocaahu, ninnalipiha onthamwene ahu ni Yesu vamoha ni Tiithi awe, Yehova.—Mwaalakhanye Yohani 14:21.
2. Yaweereya taani yavameekhaaya enanikhaviherya wooniherya othamalela wahu wa yeeyo Yehova ni Yesu apankaaya?
Ohiyu ahaakumve okhwa, Yesu aahaaleela oomuchara awe vooloca sa mukhalelo mukina wa owooniherya othamalela ntakhara mukucho awe. Owo aahaaleela othukumana vamoha ntakhara yaweereya yavameekhaaya yeeyo Piipiliya oniichaneiye “yoolya ya ohiyu ya Apwiya,” nave tho esuweliwe ntoko Wuupuwelela Okhwa wa Kristu. (1 Korinto 11:20) Yesu aachuna wi arummwa awe—ni Akristu oothene yaahaala orwa muhoolo—yuupuweleleke wi owo oovaha ekumi awe ntakhara hiyo. Vooloca sa yaweereya yeela, Yesu oolamulela: “Mweerekeno yeela mukuupuwelaka miyo.” (Luka 22:19) Vaavaa munaphwanyeyaanyu va yaweereya yeela, nyuwaano munnooniherya wi munnathamalela vancipale osivela yoowo Yehova ni Yesu aryaayano wa hiyaano.
OHUSERYA MWAWIISEELA
Muhuserye mikhalelo sincipale sa wooniherya othamalela wanyu otokweene ntakhara osivela otokweene wooniheryiwe ni Yehova vamoha ni Yesu. Muhuserye ntakhara heeni Wuupuwelela okhwa wa Kristu oryaaya woochuneyaxa.
3. Tiheeni nnaphwanelaahu weera wi nooniherye wi na achu oothamalela?
Mwaanyiherye wi muri mmaahini mmiryeyaka nave muchu onnarwa wi oovuluxeni. Apwanne mwaahaala ocuwala vooloca sa yeeyo muchu owo opankeiye ntakhara nyuwo? Naari wi mwaahaala waavya mikhalelo saahaala wooniherya wi munnathamalela yeeyo owo enreiye?
Nookhalano ewehereryo ya okhalano okumi okhala wookhala wa nthowa na yeeyo Yehova opankeiye. Mwaalakhanye 1 Yohani 4:8-10, nave muthokororye makoho ala:
Ntakhara heeni mukucho wa Yesu oryaaya yamahala yavameekhaaya?
Munoona hai vooloca sa yeeyo Yehova ni Yesu apankaaya ntakhara nyuwo?
Nni nooniherye hai othamalela yeeyo Yehova vamoha ni Yesu apankaaya wa hiyo? Mwaalakhanye 2 Korinto 5:15 ni 1 Yohani 4:11; 5:3. Mmanle waalakhanya yoorepa ti yoorepa, muthokororye nikoho nla:
Mwawiiwanana ni yoorepa yeela, tiheeni nnaphwanelaahu weera wi nooniherye othamalela?
4. Mmutakiherye Yesu
Mukhalelo mukina wa wooniherya othamalela wahu ori moorweela wa omutakiherya Yesu. Mwaalakhanye 1 Pedro 2:21, nave voocharela muthokororye nikoho nla:
Mmikhalelo taani muneeraanyu muchare inaani sa Yesu vakhiviru khiviru?
Yesu aanasivela Masu a Muluku, aanalaleerya michaka saphaama, nave aanaakhaviherya akina
5. Mphwanyeye va muthukumano wa Wuupuwela okhwa wa Kristu
Wi musuwele yeeyo yeeren’ye mu yoolya ya ohiyu ya Apwiya yoopacerya, mwaalakhanye Luka 22:14, 19, 20. Voocharela muthokororye makoho ala:
Tiheeni yeeren’ye va Yoolya ya Ohiyu ya Apwiya?
Ephaawu ni eviinyu eneemelela eheeni?—Moone iversikulu 19 ni 20.
Yesu aachuna wi oomuchara awe Yuupuweleke Okhwa wawe ekwaha emoha vayaakhani mu nihiku nenlo aakhwileiye. Mwawiihiiha, Anamoona a Yehova annathukumana vamoha eyaakha ti eyaakha wi yuupuwelele okhwa wa Kristu, mmukhalelo owo aalamulenleiye. Wi musuwele sincipale vooloca sa muthukumano yoola woochuneya, moone EXILEMA. Nave muthokororye nikoho nnacharela.
Tiheeni eneereya va Wuupuwela wa okhwa wa Yesu?
Ephaawu ni eviinyu sookhala ineemelelaaya. Ephaawu eneemelela mwiili wa Yesu owo ovelenleiye ntakhara hiyo. Eviinyu eneemelela nikhami
ACHU AKINA ANI: “Wi muchu avuluxiwe echu onaphwaneleiye weera ori omweemererya Yesu.”
Mwaahaala ompharihela hai Yohani 3:16 ni Tiyako 2:17 wi mooniherye wi sookhalavo ichu ikina inachuneya?
MUKWASU
Ninnooniherya wi ninnathamalela yeeyo Yesu opankeiye wa hiyo moorweela wa omuroromela yoowo ni ophwanyeya va muthukumano wa Wuupuwelela okhwa wawe.
Makoho awuuluulela
Enataphulela eheeni omuroromela Yesu?
Mmukhalelo taani mwaahaalaanyu ochuna wooniherya othamalela wa yeeyo Yehova ni Yesu apankaaya ntakhara nyuwo?
Ntakhara heeni oryaaya woochuneya ophwanyeya va muthukumano wa Wuupuwelela Okhwa wa Kristu?
OTHOLATHOLA
Okhwa wa Kristu onanceenyerya weera eheeni?
Muhuserye sincipale vooloca sa nroromelo ni mukhalelo nnahaalaahu wooniherya othamalela.
“Mooniherye Nroromelo Nanyu mu Soolaiherya sa Yehova” (Mulipeleli a Otupuru a 2016)
Mmwaha “Eu me sinto limpa, viva e realizada,” moone mukhalelo okumi wa muthiyana mmoha waatoroken’yaaya amanle wiiwexexa yootaphulela ya mukucho wa Kristu.
“A Bíblia muda a vida das pessoas” (A Sentinela, 1.o de agosto de 2011)
Moone ntakhara heeni va yawuupuserya achu a vakhaani tanalya ni owurya eviinyu.
“A Ceia do Senhor—por que as Testemunhas de Jeová celebram de modo diferente?” (Artigo do jw.org)