Nnii Nooniherye Hai wi Ninnamusivela Yehova?
‘Nimukhweleke [nimusiveleke] Muluku, ntakhara owo topatxenrye onikhwela.’—1 YOHANI 4:19.
MACIPO: 56, 138
MUNOONA HAI VOOLOCA SA YEHOVA VAAVAA MUNUUPUWELAANYU SA MUKHALELO . . .
onathokororyeiye soothowa sanyu?
oohusinheiyeeni eparipari?
onoolakeiyeeni?
1, 2. Yehova onihusinhe hai omusivela?
MUKHALELO waphaama tiithi waahusiha anamwane awe ori moorweela wa yootakiherya awe. Vaavaa onooniheryeiye osivela ntakhara anamwane awe, onnaahusiha wooniherya osivela. Haavovo muchu onanisevela vancipale ntoko Tiithi ahu Yehova. Mwawiihiiha noohuserya osivela ‘ntakhara owo topatxenrye onikhwela.’—1 Yohani 4:19.
2 Mmukhalelo taani Yehova oonihenryeiye wi ‘topatxenrye onikhwela’? Piipiliya onii: “Nryahu atxhu òtxheka, Yesu t’okhwileiye wa nthowa na hiyo.” (Aroma 5:8) Tiithi ahu oosivela Yehova, oomvaha Mwanawe ntoko mukucho wi anoopole mu yoocheka ni okhwa. Yoovaha eyo yasisapo yoheeriha wi nikhaleno onthamwene ni Yehova nave nooniherye osivela wahu wa yoowo. Mu weerano yeeyo, Yehova oovaha yootakiherya. Oonihusiha wi nnaphwanela okhalano osivela weeparipari.—1 Yohani 4:10.
3, 4. Nnooniherya hai wi ninnamusivela Muluku?
3 Osivela mukhalelo woopacerya wa Yehova. Mwa yeeyo nnanwerya wiiwexexa ntakhara heeni Yesu aaloca nlamulo nawi: “Wakhweleke Apwiya Muluku-à, ni murima-à wothene, ni mupuwelo-à wothene, ni ekumi-à yothene, ni ikuru sà sothene.” (Marko 12:30) Yehova onachuna wi nimusivele ni ‘murima wothene.’ Enahaala omuhiciha Yehova wakhala wi ninnamusivela muchu naari echu opwaha omusivela yoowo. Omusivela wahu onaphwanela okhala weeparipari. Yehova tho onaweherya wi nimusivele ni ‘mupuwelo wothene’ ni ‘ikuru sothene.’ Eyo enataphulela omusivela ni muupuwelo ni saweera sahu.—Mwaalakhanye Mikeya 6:8.
4 Mwawiihiiha nnaphwanela omusivela Yehova ni omuchu ahu ni yeeyo nryaahuno. Moorweela wa omuhela mu nipuro noopacerya mu okumi ahu, ninnooniherya wi ninnamusivela mweeparipari. Mmiyaha ivirale, noothokororya mikhalelo Yehova onooniheryeiye osivela wawe otokweene ntakhara anamwane awe. Hankooni vano noone mukhalelo nnahaalaahu wunnuwiha osivela wahu ntakhara Yehova nave nooniherye wi ninnamusivela.
MMOONIHERYE YEHOVA OTHAMALELA WANYU
5. Vaavaa nnuupuwelaahu soothene Yehova onapakeiye ntakhara hiyo, tiheeni nnachunaahu weera?
5 Vaavaa muchu onoovaheiyeeni echu, munnooniherya othamalela. Nave nthowa na esisapo ya yoovaha eyo munnapharihela tho. Yaakopo oorepa: “Sothene saphama ni sawakhwanela nnakhelahu inarwela wirimu, inarwa wa Atithi a ekamama. Mwa yawo hiwamo othatuwa nari mano murusi wa marukunuwelo.” (Tiyako 1:17) Ninnathamalela vancipale Yehova onivaha echu eri yoothene wi nikhale nave nihakalale. Ninnoona osivela otokweene onooniheryeiye wa hiyo nave nnachuna omooniherya wi ninnamusivela tho. Apwanne munoona hiiha?
6. Tiheeni Aisarayeli yaaphwanelaaya weera wi Yehova atitelele waareeliha?
6 Aisarayeli yaahaakhela ichu sincipale orweela wa Yehova. Mu iyaakha nsana, aahaahoolela ni malamulo awe nave aahaavaha echu yoothene yaachunaaya wi ekhaleno okumi. (Malamulo 4:7, 8) Nave Aisarayeli yaaphwanela wooniherya omuthamalela waya Yehova moorweela wa wiiwelela malamulo. Ntoko yootakiherya, vaavaa yaamvahaaya Yehova ephepa, yaaphwanela omvaha “sòhepha sòrèrasa sòpatxerya sa mmatxani” mu elapo ya nlakano. (Mukwaha 23:19) Aisarayeli yaasuwela wi Yehova aahaala otitelela waareeliha wakhala wi annamwiiwelela ni omvaha ophiyerya yaaweryelaayavo.—Mwaalakhanye Malamulo 8:7-11.
7. Nnii nipharihele hai “muhakhu” ahu wi nooniherye wi ninnamusivela Yehova?
7 Hiyaano tho nnamooniherya wi ninnamusivela Yehova moorweela wa omvaha “muhakhu” ahu. (Masiposipo 3:9) Ninneerano moorweela wa opharihela yeeyo nryaahuno wi nimucicimihe. Ntoko yootakiherya, nnawerya opharihela soovaha sahu wi nikhaviherye muteko wa Omwene mmuloko ahu nave orukurerya elapo yoothene. Moohipwacha wakhala wi nrino ichu vakhaani naari sawaaca, oothene yeehu nnaphwanela opharihela yeeyo nryaahuno wi nooniherya omusivela wahu Yehova. (2 Korinto 8:12) Aakhalavo makhalelo makina nnaphwanelaahu wooniherya omusivela wahu.
8, 9. Tuuvi ori mukhalelo mukina nnooniheryaahu wi ninnamusivela Yehova? Tiheeni Mike ni emusi awe yenraaya?
8 Yesu oonihusiha wi nipacerye waavya Omwene nave nihikhale awuukhuwa vooloca sa yoolya ni yoowara. Tiithi ahu onnaroromeliha onivaha yeeyo nnachunaahu. (Mateu 6:31-33) Hiyaano ninnamuroromela Yehova nave noosuwela wi onahaala okhwaaniherya yeeyo ororomelinheiye. Opwaha soothene, vaavaa munamusivelaanyu muchu mweeparipari, munnamuroromela muchu yoowo. Wakhala wi ninnamuroromela Yehova, ninnooniherya wi ninnamusivela. (Salumu 143:8) Mwawiihiiha nnaphwanela wiikoha: ‘Soolakelela ni mukhalelo kinapharihelaaka elukuluku ni ikuru saka sinnooniherya wi kinnamusivela Yehova mweeparipari? Mahiku oothene, kinnaroromela wi Yehova onahaala othokororya soothowa saka?’
9 Mike ni emusi awe yaamuroromela Yehova. Vaavaa Mike aareiye mmiravo, aanachuna olaleerya mu elapo ekina. Amanle othela ni okhalano anamwane eeli, nlelo aakhalano nchuno nenlo. Vaavaa Mike ni emusi awe yaalakhanyaaya vooloca sa anna ni arokora yaarumeela weiwo waariwo nchuno ntokweene, awo yaalakelela okhweiha okumi aya. Awo yaatumiha empa aya nave ethaamela mu nipuro nikhaani. Mike aavukula tho mukhalelo wa nakoso awe nave aaphwanya mukhalelo mukina wa omweeca nakoso mu elapo ekina moorweela wa ompharihela interneti. Ntoko yookhumelela, Mike ni emusi awe yaawerya othaamela mu elapo ekina, nave yaapuha vancipale orummwa aya mu elapo yeeyo. Mike ooloca: “Hiyaano nohoona waakhwaniheryeya wa masu a Yesu anaphwanyeya mu Mateyu 6:33!”
MUUPUWELE YEEYO YEHOVA OOHUSINHEIYEENI
10. Ntoko Mwene Tavite, ntakhara heeni oryaaya wookhweleya wuupuwelela yeeyo nnahuseryaahu vooloca sa Yehova?
10 Mwene Tavite aarepa: “Sawirimu sinnalaleyerya nchichimiho na Muluku; Nave erimu ennoniha muteko wa matáwe.” Owo aahaaceererya: “Malamulo a Yehova ari óphameya, ókokiherya okumi; Anamona a Yehova ari ókilatheya, awavaha ólosowa miruku.” Vaavaa Tavite uupuweleleiye miruku sa malamulo a Yehova ni oreera wa soopatusiwa, owo aanamwaacamela Yehova nave aanachuna wooniherya osivela wawe ntakhara yoowo. Tavite aaloca: “Masu a m’wano mwaka ni sawupuwelela sa m’murima mwaka semyeryeryeye va mithoni vanyu, Yehova, mwala aka, ni ókopola aka.”—Salumu 19:1, 7, 14, Nkalano Nahihano.
11. Nnii nipharihele hai nsuweliho Yehova onivanheiye wi nooniherye omusivela wahu? (Moone eruku yoopacerya.)
11 Olelo, Yehova onnanihusiha vancipale vooloca sa yoowo, yookhwela awe, soopatusiwa ni Masu awe. Elapo ennaaceenyerya achu ohuserya, nyenya mahusiheryo a vasulu wiiliwiili annaweeriha oyeleela omusivela waya Muluku. Moohiyana, Yehova, tahi pahiru onachuna wi nikhaleno nsuweliho, nyenya tho onnanikhaviherya okhala a miruku. Owo onachuna wi nipharihele yeeyo nihusenryaahu wa mphurelo ahu ni waakhaviherya akina. (Masiposipo 4:5-7) Ntoko yootakiherya, onachuna wi nuuke nsuweliho ‘neparipari’ ni akina nave naakhaviherya wi evulusiwe. (1 Timóteo 2:4) Ninnooniherya omusivela wahu Yehova ni achu moorweela wa ohusiha sincipale vooloca sa Omwene wa Muluku ni yeeyo onahaalaaya weera ntakhara achu ophiyerya nnaweryelaahuvo.—Mwaalakhanye Salumu 66:16, 17.
12. Tiheeni nahano mmoha olonceiye sa yoovaha yoorweela wa Yehova?
12 Amiravo tho ananwerya wuupuwelela seiyo Yehova aavanheiye ni aahusinheiye. Shannon onnuupuwela mukhalelo oonneiye o muthukumano wa muceche aakeleiyewo arino iyaakha 11 sa oyariwa ni murokora awe aarino iyaakha 10. Variyari va nikupa “Devoção Piedosa” na Muthukumano wa Muceche, amiravo oothene ophitaanyerya Shannon ni murokora awe, yaavekiwa okiraathi nikupa na vameekhaaya. Woopaceryani, murokora awe aari awuukhuwa. Nyenya aatikhiniheya vaavaa amiravo oothene yaavahiwaaya liivuru Os Jovens Perguntam—Respostas Práticas. Yoovaha eyo yaavolowenle hai moonelo awe vooloca sa Yehova? Owo onnaloca: “Kaahoona wi chiryene Yehova teeparipari nave onnakisivela vancipale. Chiryene ninnahakalala vancipale woona wi Yehova oonivaha mahaleene yoovaha yaphaama, ni yawaakhwanela!”
MWEEMERERYE OLAKA WA YEHOVA
13, 14. Nnaphwanela waakhulela hai vaavaa Yehova onanlakeiye, nave ntakhara heeni?
13 Piipiliya onnanuupuserya: “Apwiya anawokolola yale anakhweleya ntoko tithi ni anàwe òkhweleyasa.” (Masiposipo 3:12) Vaavaa nneemereryaahu olaka wa Yehova ni weemererya wi anivyakihe, ninnahuserya opaka yaphaama nave ninnakhalano murecele. Eparipari wi, “vopatxerya, nakhelaka malakano, hananeliha murima, nto t’awitxela.” (Ahebri 12:11) Mwawiihiiha, nnaphwanela waakhulela hai vaavaa Yehova onanlakeiye? Tahi yaphaama wiicuwaliha ekano ya Yehova naari onyeenyeya wakhala wi yeeyo niiwalaahu henisivenle. Ninnamusivela Yehova, mwawiihiiha ninnamwiiwelela nave ninnapaka matorokelo anachuneya.
14 Mweelukuluku ya Malakiya, Ayuuta ancipale hiyaamwiiwelela Yehova. Awo hiyaapwacha waakhanle wi mikucho saya saari soophwanelela naari hooye. Mwawiihiiha, Yehova aahaavaha ekano yoolipa. (Mwaalakhanye Malakiya 1:12, 13.) Awo yaakhooca ikano sa Yehova naamwi aaloponle ikwaha sincipale. Mwa yeeyo aahaaleela: “Kinamophoreihani, kinamulumela nrèliho nanyu.” (Malakiya 2:1, 2) Ti yawooneya wi natitelela okhooca ekano ya Yehova naari wuupuwela wi ekano eyo tahi yoochuneya, nnahaala oyeleela onthamwene ni yoowo.
15. Muupuwelo taani nnaphwanelaahu osepa?
15 Elapo ya Satana ennaaceenyerya achu okhala awiirumiha ni a nrima. Ancipale hanasiveliwa ovahiwa ekano naari oleeliwa echu yaweera. Akina anamoona owiriyana ekano. Hannaphwanela okhala ntoko yaawo. Piipiliya onnanleela wi ‘nihitxharihe makhalelo a elapo yela.’ Moohiyana, nnaphwanela wiiwexexa yeeyo Yehova onaweheryeiye wa hiyo ni opaka yeeyo enamuhakalaliha. (Aroma 12:2) Owo onnapharihela marehereryo awe wi anivahe ekano mweelukuluku yoophwanelela. Ntoko yootakiherya, ninnuupuxeryiwa sa omukhaliha muchu a mwiikho woohiyana, mukhalelo wa waathanla asinthamwene ni mathatelo. Vaavaa nniiwelelaahu ekano ya Yehova ni opaka matorokelo mwawaakuveya, ninnooniherya wi ninnathamalela ohoolela wawe nave wi ninnamusivela mweeparipari.—Yohani 14:31; Aroma 6:17.
MMUROROMELE YEHOVA WI OOKHAVIHERYEENI NI OWAAKIHAANI
16, 17. (a) Ntakhara heeni nnaphwanela waavyaavya osuwela moonelo wa Yehova nihaakumve opaka soolakelela? (b) Tiheeni Aisarayeli yenraaya opwaha omuroromela Yehova?
16 Anamwane annaaroromela asitiithi aya wi yaakhaviherye ni owaakiha. Nave tho achu awunnuwa annaveka nikhaviheryo na asitiithi aya. Annasuwela wi naamwi eweryaka opaka soolakelela saya, asitiithi aya anahaala ovaha ekano yaphaama. Tiithi ahu Yehova, onnaneemererya opaka soolakelela sahu. Nave nthowa na omuroromela ni omusivela wahu, wiiliwiili ninnamveka nikhaviheryo nave ninniilipixerya osuwela muupuwelo awe nihaakumve opaka yoolakelela. Wakhala wi ninnamuroromela Yehova, onahaala onivaha munepa awe waweela wi onikhaviherye opaka yaphaama.—Filipi 2:13.
17 Mweelukuluku ya Samuwele, Aisarayeli yaavoothiwa mu ekhoco ni Afilisti. Ohiya omukoha Yehova echu yaweera, awo yaahi: “Hankoni n’ye o Silo, namukuse Arka a watàna a Apwiya, wi akhale veri vahu ni anòpole wa amwitxana ahu.” Teevi yaari yookhumelela ene? “Wàri ovòthiwa otokotoko, ntakhara yahiphiwa atxhu a Isarayeli matxikhwi makhumi mararu. Arka a Muluku àkusiwa.” (1 Samuwele 4:2-4, 10, 11) Aisarayeli yuupuwela wi Yehova aahaala waakhaviherya ni owoopola pahiru moorweela wa omukuxa Arka a Waataana. Nyenya hiyaavenke nikhaviheryo na Yehova naari waavyaavya osuwela muupuwelo awe. Moohiyana, yenreno yeeyo yoonaaya okhala yaphaama, nave yaahooxeya vancipale.—Mwaalakhanye Masiposipo 14:12.
18. Piipiliya onoohusihaani eheeni vooloca sa omuroromela Yehova?
18 Namarepa a Salumu yoowo aamusivela ni omuroromela Yehova, aarepa: “On’wehererye Muluku: nivano kinammutxitximiha: owo nivuluso na ethoni aka ni Muluku aka.” (Salumu 42:5, 6) Munoona hiiha vooloca sa Yehova? Mohaataana ni yoowo ni omuroromela? Munanwerya ohuserya omuroromela ni murima woothene. Piipiliya onnanleela: “Waroromeleke Apwiya ni murima à wothene, ohiroromeleke osuwela wà. Mwa sothene onerawe owupuweleke Apwiya nave awo anamothònyerya ephiro yaphama.”—Masiposipo 3:5, 6.
19. Nnii nooniherye hai wi ninnamusivela Yehova?
19 Yehova oonihusiha mukhalelo wa omusivela moorweela wa opacerya onisivela. Hankooni moohihiyererya nuupuweleke seiyo enreiye ntakhara hiyo ni wuupuwelela osivela wawe. Nave nooniherye wi ninnamusivela ni murima woothene, okumi, muupuwelo ni ikuru soothene.—Marko 12:30.
[Ekaaxa va epaaxina 31]
MASU ATHARIHIWE
Yehova oonihusiha mukhalelo wa omusivela: Yehova tahi wi onamoona onleela wi onnanisivela, nyenya tho onneera ichu inooniherya osivela wawe. Vaavaa nnuupuwelelaahu yeeyo, osivela wahu ntakhara yoowo onahaala wunnuwa nave nnahaala ochuna omutakiherya