Mwaakhaviherye Yaale Nlelo Ahimwaalakhannye Liivuru Piipiliya Onahusiha Eheeni
1. Liivuru Piipiliya Onahusiha Eheeni onahaala waasivela achu oothene woopaceryani? Mutharihe.
1 Wi muchu akhale mulapeli a Yehova, owo onaphwanela ohuserya yeeyo Piipiliya onahusiheiye. Nyenya, akina anakhala mu ikerexa ihiri Seekiristu nave hanamuthokororya Piipiliya ntoko Masu a Muluku. Akina hanamweemererya Muluku mu soothene, nave hanamucicimiha Piipiliya. Ikaruma taani seemereryiwe okhala sa mphurelo wa yaale woopaceryani ahinamweemererya Liivuru Piipiliya Onahusiha Eheeni? Miruku iri vathi va inarweela mu sooloca sa alaleeryi a ilapo 20 soohiyana.
2. Wakhala wi muchu oonileela wi hanamweemererya Muluku, tiheeni nnaphwanelaahu weererya osuwela, nave ntakhara heeni?
2 Yaale Ahinamweemererya Muluku: Wakhala wi muchu olonce wi hanamweemererya Muluku, ori waphaama osuwela ntakhara heeni. Nthowa nawi owo oneemererya wi ichu irimphacuwa? Owo oyeleenle nroromelo mwa Muluku nthowa na ohikhalavo ekhaikhai veelaponi nari owoka wa ikerexa? Owo ta elapo weiwo ohineemereryiwawo Muluku? Akhweya owo hanakhooca wi Muluku ookhala, nyenya owo hantonko woona okhweleya waya omweemererya Yoowo. Alaleeryi ancipale anasuwela moorweela wa okoha, “Nyuwano elukuluku yoothene muupuwela hiihaa?” mumveke muchu owo aloce. Munwiriyane nave muhimukwace. Vaavaa nniiwexexaahu ntakhara heeni muchu hanamweemererya Muluku, hiyaano nnahaala osuwela moota wa waakhula nave yoolaleeryiwa taani nnaphwanelaahu ovaha.—Masi. 18:13.
3. Nnii nooniherye hai ncicimiho wa muchu ni soororomela sawe?
3 Vaavaa munaakhulaanyu, mukhaleno ephoole wi musepe omweeriha muchu owo wuupuwela wi munavolowela moonelo awe. Miruku iha inarweela o Estados Unidos: “Ti yookhweleya wi ncicimihe otaphuwa wa achu wa olakelela yeeyo awo aneemereryaaya. Ohiya weererya ovootha sooloca, eri yaphaama opaka makoho wi niweerihe achu wuupuwela ni olakelela moonelo aya.” Amanle owiriyana masu a namakhala, ooweherya aweececa mmoha wiiliwiili onnaakhula moorweela wa okoha, “Nyuwano montoko othokororya ela ntoko yooweryeya?”
4. Nnii naakhaviherye hai yaale ari ma Budista?
4 Moonelo wa Muluku ori woohisuweliwa ni ancipale yaawo ari Axiina nari ma Butista. Alaleeryi ancipale o Britaniya onnaasivela opharihela eproxura Como Ter Verdadeira Paz e Felicidade vaavaa anaalaleeryaaya yaawo. Yamala othokororya mapaceriho, awo annathokororya nikupa “Existe realmente um Criador supremo?” ni nikupa “Um guia prático para beneficiar toda a humanidade.” Ohoolo waya, awo poti ompaceryiha Liivuru Piipiliya Onahusiha Eheeni, nave emuleele namakhala, “Naamwi muhimweemereryaka Muluku, omuhuserya Piipiliya ti wa mphurelo nthowa nawi owo ookhalano ohoolela woophara muteko.” Piyoneero mmoha o Estados Unidos onarumeela mu ekulucu ya a Axiina ooloca: “Ancipale mu ekulucu ahu annasiveliwa waalakhanya. Mwawiihiiha awo wiiliwiili annaalakhanya yoolaleeryiwa yoothene nihaakumve okookelewo. Nyenya awo haniiwexexa moonelo wa omuhuserya Piipiliya. Mwawiihiiha onnakisivela ovaha eproxura Michaka Yaphaama woopaceryani nthowa nawi eyo erempwe mmukhalelo wookhweya othokororya.” Ooweherya esirkwitu yoowo onarumeela mu esirkwitu ya elocelo ya Exiina o Estados Unidos ooloca wi ti yooweryeya ompaceriha Liivuru Piipiliya Onahusiha Eheeni woopaceryani. Mwawiihiiha, poti okhala yaphaama opaceryiha yoohuserya va ekapitulu 2, yeeyo enaloca sa Piipiliya, ohiya ekapitulu 1, yeeyo enamuthokororya Muluku.
5. Ntakhara heeni ovilela ti wookhweleya?
5 Eyo ennamaliha elukuluku wi muchu ateke nroromelo mwa Muluku, mwa yeeyo ovilela ti wookhweleya. Ovaanela wahu woopacerya poti muchu oheemererya wi Mpatuxa ookhala. Akhweya woovira wa elukuluku owo onahaala osuwela wi eyo ti oweryeya, nari owo poti oloca wi onniiwexexa ntakhara heeni muchu mukina anwerya ophiyerya moonelo yoola.
6. Ntakhara heeni achu annayeleela nchuno mwa Piipiliya?
6 Yaale Ayelenle Nchuno nari Nroromelo mwa Piipiliya: Wiiliwiili, muchu onasuwela wi Muluku ookhala poti ohichuna yeeyo Piipiliya onahusiheiye ntakhara owo haneemererya wi awo Masu a Muluku. Akhweya owo ookhala mu elapo ohiriwo Akiristu nave onamwaataniha Piipiliya ni Ekiristu yoowoka. Nari owo poti okhala mu elapo eniichaniwa ya Akiristu nyenya achu ene ehiphitaanaka ni malapelo, nave poti omweeriha wuupuwela wi Piipiliya hanahaala okhala a mphurelo wa yoowo. Nnii naakhaviherye hai awo wi yunnuwihe nchuno mwa Piipiliya nave wi yeemererye omuhuserya liivuru Piipiliya Onahusiha Eheeni?
7. Tuuvi ori mukhalelo waphaama yoowo wiiliwiili onatannya nchuno mwa Piipiliya?
7 Efiliyale ya Gresiya yoorepa: “Mukhalelo waphaama wa waakhaviherya yaale ayelenle nchuno mwa Piipiliya ori pahiru omuhula Piipiliya ni owooniha awo yeeyo eri mwemmo. Alaleeryi ancipale annoona wi ovolowela wa muchaka wa Piipiliya mmurima wa muchu ti wakuruxa opwaha echu eri yoothene awo mukhataaya anaweryaaya oloca. (Ahe. 4: 12) Woona nsina na Muluku mu Piipiliya ennaakhaviherya ancipale wunnuwiha nchuno naphaama mwa Piipiliya.” Efiliyale ya Indiya yoorepa: “Eparipari vooloca sa okumi ni okhwa chiryene ennaalekecha ma Hindu ancipale—ntoko tho yoolaiherya ya Piipiliya ya elapo ohirimo nthalu.” Oloca makacamiho a vanipuroni wiiliwiili ennaavaha alaleeryi ekari ya wooniherya yeeyo Piipiliya onaloceiye sa yeeyo Omwene wa Muluku onahaalaaya opaka wi otoroke ichu.
8. Tiheeni nnaphwanelaahu oloca ni yaale arino moonelo woonanara mwa Piipiliya nthowa na Ekiristu yoowoka?
8 Wakhala wi muchu ookhalano moonelo woonanara vooloca sa Piipiliya nthowa na Ekiristu yoowoka, mmukhaviherye owo osuwela wi malapelo atheru hanampharihela mwaphaama Piipiliya ni mahusiheryo awe. Efiliyale ya Indiya yoorepa: “Mu ilukuluku ikina hiyaano ninnachuna waakhaviherya achu wi yoone wi ikerexa tahi akaneene a Piipiliya.” Awo aarepa wi ma Hindu annakuxeya murima ni nikupa na 4 na eproxura Qual é o Objetivo da Vida? Como Encontrá-lo?, yeeyo enathariha ti mwawiihai ikerexa ineereryaaya onanariha ni otoloxa Masu a Muluku. Piyoneero mmoha o Brasili aahaaleela achu: “Ntakhara heeni himunaavya sincipale vooloca sa miyaha sa Piipiliya? Achu ancipale anneerano yeela ni muupuwelo woohuleya, ehirino ovolowela wa ekerexa pure. Nyuwano poti otikiniheya ni yeeyo munahuseryaanyu.”
9. Ntakhara heeni hinnaphwanela omaala wakhala wi woopaceryani akina haanono nchuno wa yeeyo Piipiliya onahusiheiye?
9 Yehova onnoona murima wa khata muchu. (1 Sam. 16:7; Masi. 21:2) Owo onaapurula yaale arino mukhalelo waphaama wa murima wi evolowe mu malapelo eeparipari. (Yoh. 6: 44) Ancipale a yaawo hantonko ohusihiwa vooloca sa Muluku nari yaarino mahusiheryo vakhaani a Piipiliya. Orummwa wahu onnaavaha awo ekari yawi “evuluwe, wi ephiye vorora eparipari.” (1 Tim. 2:4) Mwawiihiiha, wakhala wi woopaceryani akina haanono nchuno wa yeeyo Piipiliya onahusiheiye, muhimaale! Mpharihele emoha ya ikaruma inaphwanyeya mu elocelo anyu wi mutannye nchuno naya. Woovira wa elukuluku, nyuwano munanwerya othaamiha othokororya wi mukerihe mu ekaruma ahu yoopacerya ya weecihano soohuserya sa Piipiliya, Liivuru Piipiliya Onahusiha Eheeni Chiryene?
[Ekaaxa va epaaxina 8]
Wakhala wi namakhala ooloca wi hanamweemererya Muluku, mweererye ela:
• Mmukohe, “Nyuwano elukuluku yoothene muupuwela hiihaa?” wi musuwele ntakhara heeni.
• Wakhala wi owo Butista, mpharihele eproxura Como Ter Verdadeira Paz e Felicidade, ipaaxina 9-12.
• Wakhala wi owo oneemererya wi ichu irimphacuwa, ikaruma iha poti omukhaviherya:
Makupa a Despertai! “Teve um Projeto?”
Eviitiyu As Maravilhas da Criação Revelam a Glória de Deus
Eproxura Como Ter uma Vida Satisfatória nikupa 4; A Vida—Teve um Criador? ni A Origem da Vida—Cinco Perguntas Que Merecem Resposta
• Wakhala wi owo oyeleenle nroromelo wa Muluku nthowa na ohikhalavo ekhaikhai ni makacamiho, ikaruma iha poti omukhaviherya:
Liivuru Existe um Criador Que Se Importa com Você?, ekapitulu 10
Iproxura Importa-se Deus Realmente Conosco? nikupa 6, ni Qual é o Objetivo da Vida? nikupa 6
• Othaamela mu Liivuru Piipiliya Onahusiha Eheeni waahaala ohula mwawaakuveya muupuwelo wa namakhala wi Muluku ookhala. Enahaala okhala yaphaama opacerya ni ekapitulu 2 nari mwaha mukina woophwanelela wa namakhala.
[Ekaaxa va epaaxina 9]
Mweererye ela wakhala wi namakhala hanamweemererya Piipiliya:
• Muthokororye ikapitulu 17 ni 18 sa liivuru A Vida—Qual a Sua Origem? A Evolução ou a Criação?
• Wa ma Hindu, mpharihele eproxura Por Que Devemos Adorar a Deus com Amor e Verdade?
• Wa Ayuuta, mpharihele eproxura Haverá Algum Dia um Mundo sem Guerra? ipaaxina 3-11.
• Muthokororye mphurelo wa ochariha malakiheryo a Piipiliya. Soolaleeryiwa seiyo munaphwanelaanyu omooniha muchu esisapo yoophara muteko wa Piipiliya tiiha:
Makupa a Despertai! “Ajuda Para a Família”
Eviitiyu A Bíblia: O Poder Dela na Sua Vida.
Iproxura Michaka Yaphaama Yoorweela Wa Muluku! Soohuserya 9 ni 11; Um Livro Para Todas as Pessoas ipaaxina 22-26; ni Como Ter uma Vida Satisfatória, nikupa 2
Wa ma Butista, mpharihele eproxura O Caminho para a Paz e Felicidade, ipaaxina 3-7.
Wa Amaka, mpharihele eproxura Verdadeira Fé—O segredo de uma Vida Feliz, nikupa 3.
Wakhala wi munalaleerya mu nipuro weiwo ohinachuniwawo Piipiliya, enahaala okhala yaphaama ohiperekha ehime ya miruku yeeyo munuukaanyu ni yaawo, muhaakumve opaka oxekurya wawaaca.
• Mutharihe moota sooloherya sa Piipiliya inaakhwaniheryeyaaya mweeparipari. Soolaleeryiwa munaphwanelaanyu opharihela muteko ti iha:
Eviitiyu A Bíblia—História Exata, Profecias Confiáveis
Eproxura Um Livro Para Todas as Pessoas, ipaaxina 27- 29
• Muthaamele mu liivuru Piipiliya Onahusiha Eheeni muchu amala okoha tiheeni Piipiliya onahusiheiye mu miyaha soohiyana.
[Ekaaxa va epaaxina 10]
Wakhala wi namakhala ooloca: “Nkinamweemererya Muluku,” nyuwano poti oloca:
• “Mwawaakuveya poti kiloce yeeyo yaakilekenche wi kimweemererye Mpatuxa?” Mwamala muuke iponto sa liivuru Raciocínios, ipaaxina 94-98, nari mpake marehereryo wi mmuruuhele yoolaleeryiwa yeeyo yoosivelaani waalakhanya.
• “Nyenya waakhanle wi Muluku ookhala, mwaachuna wi owo aakhanle awiihai?” Anamakhala ancipale anaakhula wi awo yaaphwanela omwaacamela Muluku oosivela, ekhaikhai, ni aikharari, yoowo ohirino nthalu. Mmoonihe orweela Mpiipiliya wi Muluku ookhalano mikhalelo seiya. (Eyo poti okhala yooweryeya omooniha ekapitulu 1 ya liivuru Piipiliya Onahusiha Eheeni, opacerya va eparakrafo 6.)
Wakhala wi namakhala ooloca: “Nkinamweemererya Piipiliya,” nyuwano poti oloca:
• “Aakhalavo ancipale arino moonelo yoola. Ancipale arino muupuwelo wawi Piipiliya tahi liivuru a siyensiya nari wi malakiheryo a Piipiliya hanaphara muteko. Nkakileeleni, montoko okhalano ekari ya omwaalakhanya Piipiliya? [Muweherye naakhulo. Mmoonihe woopaceryani wa epaaxina 3 ya eproxura Um Livro Para Todas as Pessoas, nave mumvahe eproxura.] Ancipale annamuhiya Piipiliya nthowa na ikerexa ohicicimiha mahusiheryo awe. Ekwaha enacharela kaachuna wi nthokororye yootakiherya emoha enaphwanyeya va ipaaxina 4 ni 5.”
• “Achu ancipale aakhalano moonelo ntoko wannyu. Miyaano poti owonihaani yeeyo yaakitikhininhe vooloca sa Piipiliya? [Mwaalakhanye Yobu 26:7 nari Yesaya 40:22, seiyo sinooniherya wi Piipiliya onnavarihana ni siyensiya.] Piipiliya tho ookhalano ikano sa miruku wi ikhaviherye imusi. Ekwaha enacharela kaachuna wi kiwooniheeni yootakiherya emoha.”
• “Koothamalela okileela wanyu yeela. Waakhanle wi Muluku oomurepa liivuru wa achu, munuupuwela wi tiheeni yaahaala okhalamo?” Mmoonihe muchu owo, orweela mu Piipiliya echu eniiwanana ni waakhula wawe.