Okhalano Moonelo wa Soorempwa wa Ovitha Muruchu​—Nikupa 4

Vaavaa Nnayaahu Ovitha Muruchu Onahooleliwa ni Oohiroromela

¹ Oya ovitha muruchu onahooleliwa mwawiiwanana ni soororomela sa ikerexa satheru, va ekerexa nari va mucecheni, owo mwaha mutokotoko. (Moone “Perguntas dos Leitores” mu A Sentinela 15 a Maiyu a 2002). Ti yaphaama wuupuwela wi meerelo a ekerexa a ovitha muruchu meerelo a malapelo nave poti ovolowela mahusiheryo nari masu anacicimiherya soororomela sihiniwanana ni Soorempwa, ntoko ohikhwa wa okumi wa muchu, ni phatamari wa achu oothene aphaama wirimu. Okoneleliwa muruchu, wiipa macipo a malapelo, mavekelo wa makholo akhalai, iphepa sa asinama, oyeeha makhurwa, ni mihapo mikina sa amalapo seiyo wiiliwiili inapakiwa va ovitha miruchu mmucecheni.

² Ilukuluku ikina, eyo poti wooniwa ntoko nlamulo wa amusi wi anaphwanela opaka makupa mu mihapo sa vameekhaaya sa ovitha muruchu. Ntoko yootakiherya, mwaana oopacerya oyariwa poti owehereryiwa wi apake muhapo ohiniiwanana ni Soorempwa va ovithiwa wa muruchu wa apaapawe ahiri Namoona. Nari Mukiristu ori naamukhwele poti owehereryiwa wi iiwelele mihapo ya amalapo ya ovitha muruchu. Mu makhalelo yaala, nnaphwanela wiikasopa wi nsepe meerelo oonanara. Mwawooneya, hiyaano hinnachuna owehererya wi okhalevo okhwa wi nooniherye moonelo ahu mu miyaha seiyo inasuweliwa phaama ni amusi oohiroromela. Wakhala wi awo aamala osuwela moonelo ahu, enahaala okhala yookhweya wi nooniherye mphimo ahu woomunepani vaavaa nnakumanaahu ni oceecheya wa muupuwelo ni okhinyererya wiiliwiili onatannyiwa ni nookhwe.

³ Hanka muchu asuwela wi okhala va makhwelo, yaahaala omweeriha opaka ichu ihiniiwanana ni Ekiristu nari waakwaculiha akina nari waakhulana ni amusi oohiroromela? Emoha ya seiya nthowa naphaama Mukiristu wi alakelele ohiyawo ovitha muruchu. Wakhala wi muchu oolakelela ohiyawo, haavo mmoha a mmulokoni onaphwanela omphwanyerya mathowa nthowa na yoolakelela awe nari omphuca. Akina annalakelela weecelela emusi ekhweliwe ovitha ohaakumve nari omanle weeriwano. Mu ilukuluku seiya, emusi ekhweliwe poti okhala ooreheryeya mmuupuweloni wi ewiriyane yeeyo Piipiliya onaloceiye. Ovaha nikhaviheryo noomwiilini mwawiiphini mu ilukuluku seiha, enooniherya wi yeeyo nnavaahaahu enakhaviherya emusi mukhataaya.

⁴ Muhivevule Yawoopiha: Ancipale anoona ovitha muruchu ntoko yaweereya yaphaama yeeyo enaavaha awo ekari wi yawoone achu nave wi yapuhe yoolya ni yoowurya seiyo wiiliwiili inavahiwa. Owoona achu ni wooniwa mu ovitha muruchu onooniwa ntoko echu yookhweleya. Mwawiihiiha, ocompela ovitha muruchu poti wooniwa ntoko yoocheka etokotoko wa amusi akhweliwe. Akina wiiliwiili anoona wi wakhala wi awo annacompela ovitha miruchu sa akina, achu vakhaani tanahaala waakhaviherya wakhala wi aakhweliwa! Nthowa na yeeyo, enneeriha wi achu ekhaviheryeke ovitha miruchu miili, miraru, nari mincipale va omala wa esumana, naamwi awo ehimusuweka mulipa okhwa owo nari waapwacha amusi ahanle. Moonelo yoowo wa okhaviherya ovitha miruchu onniiwanana ni moonelo wa Muluku?

⁵ Ntoko alapeli a Yehova, nnaphwanela wuupuwelela yookhumelela ya okhaviherya wiiliwiili ovitha muruchu yaahaalaaya okhalano mmukhalelo ahu woomunepani. Yaahaala okhala ya miruku oyeeha elukuluku yincipale nikhaviheryaka ovitha miruchu va omala wa isumana ehalaka elukuluku vakhaani mmuteko wa mmacani ni miteko mikina soomuluku? (Aef. 5:15, 16) Woona wi ovitha miruchu seelapo wiiliwiili onavarihana ni meerelo oonanara ntoko owuryawurya ni ocapaheya, yaahaala chiryene okhala ya miruku, oya ovitha miruchu nari omurumiha mutheli nari mukina a emusi, wa ovitha muruchu oneeriwa mmuceche nari epooma yoorakamela? Nnaphwanela okhalano ephoole ya okhaviherya miteko sa ovitha muruchu seiyo ihinamucicimiha Yehova, woona wi eyo yaahaala okhalano yookhumelela yoonanara mu oya wahu vahoolo mmukhalelo woomunepani ni omuchu ahu Weekiristu.​—Yaw. 18:4.

⁶ Mu ilukuluku ikina, Akiristu oolosowa annavevula yawoopiha nave annavolowela meecelo oonanara nave annayeleela mirici saya sa muteko, nyenya akina aniikariwaaya mmulokoni Weekiristu. “Mutxhu a miruku, onnona yawopiha, ipitha,” onnalopola Piipiliya. (Masi. 22:3, Bibiliya Nsu na Muluku) Wiiwexexa nlakiheryo nla ni othokororya yawoopiha vooloca sa mukhalelo woomunepani ni meecelo oonanara enaphwanela oneeriha wi nikhaleno ephoole vaavaa nnathokororyaahu wakhala wi nnamuyawo ovitha muruchu wa alipa oohiroromela nari hooye.

Moonelo wa Soorempwa Ti Woophimelela ni Wawiiweya

⁷ Mu 1 Akorinto 10:21, hiyaano ninnaleeliwa: “Hamuwerya owuryerya ekahi ya Apwiya ni ekahi ya masololo.” Achu a Muluku anniiwelela olopola yoola weeparipari. Tiheeni yaahaala weereya wakhala wi nthowa na okhinyereryiwa ni amusi oohiroromela, nari amwaacamani, muchu a mmulokoni oopaka makupa mmuhapo weelapo va ovitha muruchu? Wakhala wi muchu oopaka echu ya olapela soophwaniherya nari wuuka malapelo atheru, eyo yahaala okhala yaaweera ya omwaryeya, nave yahaala othokororyiwa wi muloko otitelele okhala waweela.​—Malam. 18:9-13; Yer. 7:16-19.

⁸ Wooniherya Moonelo Woophimelela wa Okhwa: Tiheeni enahaala onikhaviherya wi nikhaleno moonelo woophimelela vooloca sa okhwa ni meerelo a ovitha muruchu yaawo athokororyiwe? Vathi va murima ahu nnaphwanela omusivela Yehova ophiyerya wi ‘nichanekeno yonanara.’ (Sal. 97:10) Mihapo sa ovitha muruchu inavarihana ni yoororomela yawi alipa ookhwa annavolowela ikumi sa achu, inaphwanela osepiwa moomalela. Mu elukuluku emohamoha, osivela wahu woolipa wa akina onaphwanela oneeriha osepa yaaweera eri yoothene yahaala waakwacula Akiristu akhwiihu nari onanariha yawuupuxerya-ya-murima aya.​—1 Akor. 10:32, 33.

⁹ Wiiwexexa wawooneya mukhalelo wa alipa okhwa onnanikhaviherya wi nsepe muupuwelo ni moonelo wa achu yaawo ari mu epiphi yoomunepani. Mwawiihiiha hiyaano ninnasepa ovoloweliwa ni yaale anahoolela ovitha muruchu orino yoolakelela ya waathamala ni waacicimiha alipa ookhwa nari wooseela mukhalelo nari mirici saya. Hiyaano hinnaphwanela weemererya wi marehereryo a ovitha muruchu evolowele miteko sookhweleya soomuluku. Hinnaphwanela waakuvela onanariwa wakhala wi mukina onnalakelela ohiyawo ovitha muruchu nari akhweya oonihela okhwipi wa marehereryo a ovitha muruchu. Akiristu eeparipari anuupuwela nave aneera moohiyana nthowa nawi awo anahooleliwa ni ekamaama ya eparipari ya Piipiliya. (Aef. 5:8) Hiyaano ninnathanana nave ninnaavitha oosiveliwa ahu akhwile mmukhalelo woocicimiheya yoowo onooniherya wiiwexexa woomunepani, mmukhalelo wawiiyeviha, woophimelela, ni mwawiiwanana ni eparipari ya Piipiliya.​—1 Ates. 4:13; 5:5, 8, 11.

¹⁰ Muhiwoove Akumi: Hiyaano hinnaphwanela waakwaculiha akina. Hiiha ntoko miteko saphaama sa Yesu saahaananara yaale yaheemererya eparipari ya Soorempwa, waakiha wahu malapelo eeparipari poti waananara achu. (Yoh. 6:60, 66) Okhooca wahu wuuka ovitha muruchu wa mihapo sa amalapo poti okhumelela waakaahiwa, oruwaniwa, weereliwa opwaalu, ni wiiciwa ni alipa oohiroromela. (1 Pet. 4:4) Anamoona a Yehova akina anniikariwa va emusi, ehinakhaviheryiwa, ni wiiciwa nthowa na weerano yeeyo eri yaphaama. (Yoh. 15:19) Akina annakhaleliwa minikwa ni wootheriwa wi hanathata ni akina nave wi haanaacicimiha alipa ookhwa. Naamwi meerelo ntoko yaale tahi oohakalaliha, hiyaano ninnawehererya ophuciwa hiiha, nsuwelaka wi nri oohiyana ni elapo. (2 Tim. 3:12) Nyenya, opwaha ovoloweliwa ni owoova achu, hiyaano ninniihiya wi nlamuleliwe moorweela wa woova ohimuhakalaliha Yehova Muluku.​—Masi. 29:25; Saw. 5:29.

¹¹ Mwaahiye Awo Yoone Ohiyana: Akina annaneeha moorweela wa oloca, “Anamoona a Yehova hanasuwela moota wa waavitha alipa ookhwa aya.” Apwanne masu yaala annaninanara? Mano ilukuluku ikina hiyaano ninnachuna weererya wooniherya wa akina wi chiryene noosuwela moota wa waavitha oosiveliwa ahu akhwile? Hiyaano poti wuupuwela wi vaavaa Satana aamweenheiye Yesu wi ooniherye wi aari Mwaana a Muluku moorweela wa wiirihela mukhateiye vathi va empa ya Muluku, Yesu heemerenrye. Owo hahuwelihiwe mu weerano echu yoonanara wi aatikhinihe akina. (Mat. 4:5-7) Moophwanaphwana hiyaano poti osepa saweeha wi neererye wooniherya wa akina moorweela wa otakiherya mukhalelo wa ovitha miruchu onahooleliwa ni oohiroromela wi hiyaano noosuwela chiryene moota wa waavitha alipa ookhwa ahu. Eyo enahaala weereya hai? Mucharihe yootakiherya ya Yesu.

¹² Achu a Muluku hanaphwanela oviihavo saweera sa malapelo atheru moorweela wa oraceeliha mihapo seiyo ni yeeyo yaahaala wooneya ntoko ichu sa malapelo eeparipari woona wi eyo yahaala ovaha moonelo wawi Anamoona a Yehova aakhalano meerelo aya a mihapo seiyo sa amalapo. (Akal. 6:12; Malam. 12:30) Moohiyana, hiyaano ninnaroora wi mihapo seiya ti soonanara, sinnamunyemula Muluku, nave hasiniiwanana ni malapelo eeparipari. (1 Akor. 10:20) Vaavaa nnatitelelaahu okhalano moonelo yoola, ninnaavaha achu ekari wi ‘yoone ohiyana variyari wa yeeyo eri yawookololowa ni yoonanara, variyari wa yaale anamulapa Muluku ni yaale ahinamulapa owo.’​—Malak. 3:18, BNM.

¹³ Voohilekela okhwa onahaala omala. Miithori ahu, sawiicela sahu, wiicela wa murima ahu inahaala omalihiwa vaavaa Yehova onahaaleiye waaviiha yaale akhwile. (Yaw. 21:4) Ewehereryo ahu ya owoona wanaawiili oosiveliwa ahu akhwile enarweela wa wooniherya nroromelo nahu hiihaano. Woona wi nnawehererya weereya wa soolaiherya seiya itokotoko, hankooni nikhale oolakelela wi niphwanyiwe ni Yehova nihirino mathepa, murala, ni ohipaka makupa ni elapo yeela yoonanara ni saweera saya sinamunyemula Muluku!​—2 Pet. 3:14.