Oxekurya Wawaakuveya ti Woochuneya

Opacerya vaavaa Site ahu ovonyiweiye, sooveka sa soohuserya sa Piipiliya ti sooya vahoolo. Sooveka ikina sookhumelela sa olaleerya wa vanlakani. Efiliyale ennathokororya mwawaakuveya sooveka seiyo. Ntoko yootakiherya, wakhala wi yooveka epakiwe mu jw.org, asitokweene a muloko a muceche wa muchu oonihenrye nchuno wiiliwiili annaakhela muchaka wa efiliyale evinre mahiku meeli. Soolokoha inarwa mmacani, sinnooniherya wi akina yaawo avenke yoohuserya ya Piipiliya hanaxekuryiwa isumana sincipale. Nnahaala othokororya hai wi nivahe nikhaviheryo wa muchu ahaakumve oyeleela nchuno?​—Marko 4:14, 15.

Wakhala wi muchu oonihenrye nchuno hanakhala mmuceche anyu, mwawakuveya murepele yoorepela Queira Visitar (S-43) nave mumvahererye namarepa mmuthukumano onacharela. Mpuwa wa nihiku nimoha naari meeli, namarepa onahaala oleela muloko wawaacamela naari orepela Efiliyale apharihelaka ekhankoonya ya muloko mu jw.org. Asitokweene anaphwanela ovareryaka mu Site moohimaalela. Wakhala wi awo ahaakhela muchaka wi emuxekurye muchu, awo anaphwanela othokororya mwawaakuveya. Mulaleeryi yoowo onahaala ovekiwa wi apake oxekurya onaphwanela athokororye eyo ntoko echu yoopacerya. Wakhala wi muchu hari owaani, akhweya nyuwaano munanwerya orepela numero nanyu nave muhiye.