MWAHA 53
Nlakano Na Yefita
EKWAHA ekina moontoko opaka nlakano, nave vachuli vaya moona okhala woovila waakhwaniherya? Ela yaaheereya ni mulopwanana ola veerukuni va, nave va nthowa nla owo ootepa othanana. Ti mulipa oothoriha oolipa murima a Isarayeli awiichaniwa Yefita.
Yefita aakhala mu elukuluku yeeyo aIsarayeli yahaamurumeelaaya Yehova. Yeeranotho yeeyo yaari yoonanara. Va nthowa nla, Yehova aaheemererya wii achu a Amooni yaaphoreihe. Vanonto awo yaahikhuwela wa Yehova: ‘Noocheka. Khwoo, nivuluxeeni!’
Awo yaahiikhupanyerya wa yoonanara yeeyo yeenraaya. Yaahithoonyerya ocharuwa waya mu omurumeelatho Yehova. Nave owo aahikhala aakhaviheryaka.
Achu yaahimuthanla Yefita wii awane ni asinaAmooni oonanaraawo. Yefita ahichuna wii akhaviheryiwe ti Yehova mu ekhochweeyo. Va nthowa nla aahilakana ni Yehova: ‘Mwaakivaha opwaha wa asinaAmooni, vanonto muchu oopacerya ookhuma owannyaka oya okithikirerya kikookaka mu opwaha iwo, miyo kinahaala wovahaani.’
Yehova aahiiwa nlakano na Yefita nave ahimvaha opwaha. Akookelaka owaani, mano moomusuwela taani yoowo Yefita apacenryiiye okumanano? Mwanawe mwamuthiyana mmoharu. ‘Hiii mwanaka!’ aahikhuwela Yefita. ‘Onakithananiha mwawiihai weyo. Nyenya, koopaka nlakano wa Yehova nave nkinawerya okookela muchuli.’
Vavaa mwaana mwamuthiyana a Yefita aasuwenliiye sa nlakano nlo, wuupaceryani owotho aahithanana, nthowa nawii ahaala waahiya atiithinya ni asiinthamwenaawe. Nyenya, aari awiirehererya oviriha okumi awe woohaleloowo amurumeelaka Yehova mu tabernaakulu o Siilo. Owo aahi wa atiithinya: ‘Mwaapanke nlakano wa Yehova munnaphwanela waakhwaniherya.’
Hiihaa, mwaana mwamuthiyana a Yefita aahirowa o Siilo nave aahiviriha okumi awe amurumeelaka Yehova mu tabernaakulu awe. Athiyana aIsarayeli yaanayawo omweecheechela, ekhalaka vamoha ni yoowo mahiku maxexe vayaakhani. Achu yaanamusivela mwaana mwamuthiyana a Yefita nthowa na okhala murummwa aphaama a Yehova.
Amuthoriha 10:6-18; 11:1-40.