MWAHA 90
Ari Vamoha Ni Muthiyanoowo Veehimeni
YESU aahemela veehimeni o Samariya, wii aichuuwe. Oohuseryawe yaahirowa omuchecheni oya othuma yoolya. Muthiyanoowo Yesu onlociiyeno aarweenle orika maahi. Owo aahi wa yoowo: ‘Okivahe maahi kiwurye.’
Muthiyanoowo aahitikhina vancipale. Mano moosuwela nthowa nene? Nthowa nawii Yesu aari muYuuta nave owo aari musinaSamariya. Nave aYuuta ancipale hiyaasiveliwa ni asinaSamariya. Nari mano olocaru ni yaawo! Nyenya, Yesu aachunela oothene saphaama. Va nthowa nla, owo aahi: ‘Wamusuwenle yoowo ovemke maahi owurya, weyo waahaala omveka maahi yaawo anavaha okumi nave owo aahala wovaaha weyo.’
‘Apwiya,’ aahi muthiyanoowo, ‘ehime eri yawixa naari yorikela maahi hamwinono. Munahaala orika woowi maahi yaawo enavaha okumi?’
‘Weyo wawurya maahi a ehime ela onarwa-ovoliwatho nchanana,’ aahimuthoriherya Yesu. ‘Nyenya maahi awo yaawo kiniriaka koovahe anahaala omweriha muchu okhala mwawikhalelaru.’
‘Apwiya,’ aahi muthiyanoowo, ‘kivaheni miyo maahi yaawo! Hiihaa, nkirwa kivoliwa nchanana. Nave nkirwatho wino orwa orika.’
Muthiyanoowo uupuwela wii Yesu aaloca sa maaheenexa maahi. Nyenya, owo aaloca sa eeparipari vooloca sa Muluku ni omwene awe. Eeparipari ene yeela eri ntoko maahi yaawo anavaha okumi. Ennawerya omvaha muchu okumi woohimala.
Yesu aahiinto wa muthiyanoowo: ‘Hawe wamwichane iyaa, orwe wino.’
‘Nkinono iyaka,’ aahaakhula yoowo.
‘Woloca phaama,’ aahi Yesu. ‘Nyenya weyo wokhalano alopwana athanu, nave yoowo onakhalaweno hihano hari iyaa.’
Muthiyanoowo aahihaleeliheya, ntakhara wii yaari eeparipari. Mano Yesu aasuwela hai ichu sene seiya? Aasuwela ntakhara wii aari Oolakaniwa owo ti Muluku, nave Muluku aahimusuweliha sa seiya. Mu elukuluku yeeyo, oohuserya a Yesu yaahikoka, yaawo yaatikhina omoona owo alocaka ni musinaSamariya.
Mano nnahuserya eheni sa yeeyo? Nnahuserya wii Yesu aari aphaama wa achu a maloko oothene. Navetho hiyo nnaphwanela okhala awihiihaa. Hinnaphwanela omoona muchu okhala oonanara nthowaru nawii pahi owo ta nloko nikina. Yesu onachuna wii oothene esuwele eeparipari yeeyo enahoolela wukumini woohimala. Nave hiyo nnaphwanela wakhaviherya akina ohuserya sa eyo.